هه‌ورامان هانه‌به‌رچه‌م
تەقەو ساجی

دادە زارا هامساما بێ ، مامام واچێ دڵش هانە چەمەن ، شانەش شل کەرۮەن پەی وەزنۆ  شاهۆی ، حەر  بە وێش گنۆ  رۆسەموو زاڵیش نیان لا چاکیش .

مامام گرۮ جارێو واچێ واڵە زارا پەڕوو پۆسیش پیانە ، پیای پیایانە . ئێمەیچ عاۮەتوو زاڕۆڵا خوێنمێ واچێنمێ ماما ئانە چێش ماچی ؟ کێ پیان ؟
واچێ زارا پیسە ڤەرڤۆ شاهۆی ڕوەش چەرمێنە ، تا لاو هەورا باڵاش بەرزا ، ترازیێ خوۮایش نامنەینێرە لا پالامناش ئاشکرا عاڵەمی بەهەشتەکەو چیروو پایاش مشارۆ وە .
هێزی نەوەشەبێ مامام وێش ساجەکەش  پەی بەرزە ، ئەیرش کەوتەبێ ونە ، واچێ نۆبە نانشا و دیاریچش نیا  !
ئاخر حەرچی یەرەشەمێ خوۮای بێنێ چاشتەنگا ساجەکەیما بەرێ گەلەو بێرەی ئارێشەوە .
ئێتر دادە زارا پی جۆرە گرۮ یەرەشەمانێو وەرکەوتەی دمای گەلە ڕامای تەقەو ساجیش ئەی .
پنەو ماۮەش دا منەرەو تا یانەشانە گۆشەو دۆڵەش مەرزنارە پەیش ، خەریکەبێ تەڵیشێ نیێ پۆوەوە و ئارگاش گەرمە کەرۆ پەی ، دەسش بەرد بن بەخەڵوو کەواکەیشەرە بە لامشتێو تشە وشکە منش ڕوانە کەردا .
حەر ئاننەم زانا مامام حەر چەمێوش بیەن کۆتەرێو و کڵەکەو چەماش شۆریابێ ملو چارەکڵەکەیشەرە و کز و مەلوول زیانەوە  بەرە.
تمەس بە مێمانی ڕوێوی بیێنە جاسووسۆ ساڵێوی .
تەقەو ساجوو ساڵەوەختێڤوو دادە زارەیش وستەن سارا .
بە دەم هەنسکوو گرەوەوە پێسەشە گێڵناوە پەیم : واڵە زارای هەتیم بارە پی چننە ساڵە کەوچێو هارۮیش نەبیێنێ ! کەنووڵەو هارۮاش حەر پێرار گزی دریان ! جا چەنی ئا زاڕوڵێشە ساچنەینێ ؛ خوۮا مزانۆ ! مەر بە هەواو خوۮای ژیونەیباش .
ماچۆ ، واتش : واڵێ نەدرکنی چننە ئامەینا پەی ساجی واتەنم با بەرووبان نەواچا حاڵێو یا سەودێو !
ساجەم ئارۮەن و قەۮەرە سەعاتێو  بەزم و رەزم و نان پەتەیم وسەن ڕا  ؛ زاڕوڵێم هێقمێ کەرۮێنێ نەواچا هارۮیما نیەنێ ، ئەۮام درۆ مۮۆ نانە مەپەچۆ !
بە بەلوە وشکە ، تفی ، سەرە نینۆر و نارزان و چێو ساچنەینێم و قەناعەتم کەرۮێنێ پنە بەش و بارە و ئێمە ئینەنە ڕۆڵە ؛ با حەر خوۮا بە سڕیما بزانۆ !
چی مەگیرە پی چننە ساڵە،  ئی ساج بەرزەی و ئی تەقەو ساجی  پی وەر کەوتەو گردوو یەرە شەمما ، پەی پارێزنای ئاوەڕوو وێش و زاڕوڵاش بیەن .

ڕەحیم ڕەحمانی
وێت کەرە کەڕ

چوار پەنجێو سەروو پرۮێوێنە پرەی پرێنێوە، ناکامێوەنە دوێشا کەوتێنە دلێ تێژاڤۆ ڕوخانەکەی .
گرکەس جەم بیەوە دەوروو ڕۆخانەکەی گاهەز تاوا یاردەیشا بۮا .
بەڵام دیشا ئاوەکێ فرێنەو حیچشا پنەمەکریو .
خەڵکەکە پا دوە نەفەرەی واتشا دەسەڵاتێوما نیاو مەتاومێ بەرتا بارمێو ئێننەتازانا خنیکیایدێ .
چا ئەوەڵەوە دوە پیاکە حەر گۆششا نەۮا بە خەڵکەکەی دەسوو پا فڕنێنێ ،وێ رزگار کەرا .
بەڵام عەشرەتەکە حەر وەنەشا گوششارە پەلەقاژێ مەکەردێ ، شمە مەرۮێندێو ڕەیوەتا نیەنە .
دمای ماوێوی یوشا ناهۆمێۮ بیو ویش دا ئاویەرە .
بەڵام ئەوشا بە گردوو هیزیشەوە حەر تەقەلا دێ .
ئانێچ لەڤوو ڕۆخانەکەینە مدرەیبێنێ حەر ئاواخوا کەرێنێوە:  مەکەرە !مەتاوی ! تویچ وێت دە ئاوی !
بەڵام حەر چی ئەی فرەتەر دەسوو پا شانێ تا ئاخرش چا ڕۆخانە سامناکەی وێش رزگار کەرد.
وەختێ ئاماوە قەراخ زاناشا کابرا کەڕا .
پاچننە وەختە ئەجیابێش ئا خەڵکە هانیش مۮۆ وتاریفێش کەرا .
وختێ گرکەس ئاواتات پڕووپوچێ مزانوو وێت کەرە کەڕ تا بە مراۮ  بیاوی .
ئێمەیچ پەی پارێزنای زوانەکەیما حەر کەڕێ بیێنمێو حەتا حەتایچ گۆشاما باخەنمێ تا بانگەوازوو یونسکویچ نەژنەڤومێو وزمێشەوە درۆوە .
تا شاهۆو کۆساڵان مەنێبا زوانی هەورامی حەر مەنۆ .
برگرفتە از فارسی با اندکی تصرف
رحیم رحمانی



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، کۆڵه‌داستانه‌و هه‌‌ورامی، ڕەحیم ڕەحمانی،
برچسب ها:هورامان هه‌ورامان‌هانه‌به‌رچه‌م-کتابخانه‌ هورامان؛یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-هورامان تخت ژاورود-پاوه-نودشه(نۆتشه)زرده-پریان-رێژاو(ریجاب)-کندوله-ته‌وێڵه(طویله)-بیاره-ساور-نودیجه-حلبچه(هه‌له‌بجه)-خۆرماڵ مریوان-سروآباد-کرمانشاه-کردستان-دالانی-ایلام-کامیاران-روانسر-جوانرود-چهارقلعه‌عبدالملکی(زاغمرز-زینوند-حسین‌آباد-امیرآباد هورامی های شمال ایران)-عکس-شبک(شه‌به‌ک)-سنجار- کاکه‌یی-یارسان-ساور-نودیجه-زازا-زازاکی)-قلعه قروه-چورژی-هانه‌به‌رچه‌م-هۆمایون محه‌مه‌دنژاد،وه‌سیه‌ت په‌ی مه‌زهه‌ری،سه‌فه‌ره‌کێ گالیوێری،تەقەو ساجی؛ وێت کەرە کەڕ :کاکه ڕەحیم ڕەحمانی،
نوشته شده در تاریخ چهارشنبه 9 تیر 1395 توسط همایون محمدنژاد
.: Weblog Themes By Abdollah Habibi :.