داستانێوه جه کاکه مه‌هدی ئه‌بری(هه‌ورام)
هه‌ورامان هانه‌به‌رچه‌م

داستانێوه جه کاکه مه‌هدی ئه‌بری(هه‌ورام)
هه‌شت ساڵێم بێ . ڕۆ جمعه‌ی بێ .سه‌رو باخیوه‌  مامام گونکێ پێچێ و باوایچم په‌له‌و نماو جمعه‌یش بێ .منیچ  قه‌ڵماسکێ ده‌سموه‌ بێنێ و مریچڵیه‌ دلێ دلقه‌کانه‌ بێ .نزیکه‌و ساعه‌تیه‌ بێ قه‌ڵماسکێش ته‌قنێنانه‌ .نه‌ به‌رشێ و نه‌ پێکیێ په‌یم .
باوام :  هه‌تیم ده‌ی وه‌روو ئا وه‌ریوه‌ بیه‌ی به‌ چڵۆسکه‌ ،تۆ که‌ی پیاو مریچڵه‌ کوشته‌ینی .بۆ ده‌مو ئا جوجه‌ڵه‌ وه‌ی تۆپایاوه‌ با نه‌لا دلێ زه‌رحاته‌که‌ی ...
ئه‌رێ ژه‌نه‌کێ  خۆ نانوو زه‌ماوه‌ننێ  نیه‌ن ،چێش بی نه‌ته‌مامیا .دێره‌ن ئانه‌ سه‌ڵاتشا که‌رد .
مامام : ئاخ پیاکه‌ من مه‌ردایاناو ده‌سوو ئی هه‌وڵه‌هه‌وڵو تۆوه‌ نه‌جاتم بیایا .عاقیبه‌ت خێر ده‌ی خۆ تا نما کۆڵیه‌ش مه‌نه‌ن.
باوام: هه‌تیم ئانه‌ به‌ کێمه‌ن ؟.بۆ ده‌مو ئا جووجه‌ڵاوه‌
منیچ واتم نا مشیه‌ۆ حه‌ر کشونه‌ش .
باوام:ئینه‌ ته‌ڵاقش بۆ ئا مریچڵێ کوشینه‌ په‌نج تمه‌نێت مده‌و په‌نه‌
په‌ی من که‌ ته‌نیا پووڵیه‌ دریابێم په‌نه‌ په‌نج قه‌رانی بێ ئادیچ هه‌فتیه‌ جاریه‌ ،په‌نج  تمه‌نێ  حۆکموو خه‌زێنه‌‌‌یش بێ.هه‌لاسکێ فرێ ، به‌سته‌نی ،چننه‌ پیاڵێ تۆم ،فه‌کی ،...مه‌ژگمه‌نه‌ مجیه‌ێنێره‌  .پێسه‌و فیلمه‌ هندیه‌کا ده‌سم به‌رد په‌ی ته‌وه‌نێ و نیام دلێ مانێ و چاکڵه‌کێم سفت گێرته‌ و هه‌ردوه‌ ده‌سه‌ تا زۆرم بێ قایشێم کێشای و تیره‌م ته‌قنا .مریچلێ به‌سه‌زوانه‌ بێ خه‌به‌ر جه‌ هێزوو ته‌ماعێ که‌ حه‌ر به‌ پیام حه‌ساو نه‌که‌رێ و زانێ بوو به‌ ئاوریچ یاگێ وێم نمه‌سووچنو خه‌ریکو هه‌رمانه‌و وێش بێ تا زرم .... پێکیا و که‌وته‌ره‌.منیچ که‌ وه‌خته‌بێ شادی مه‌رگ بوو قێڕنام کۆشته‌م ..کۆشته‌م باوا  کۆشته‌م
ده‌سم به‌رد دلێ دلقه‌کا و به‌رم ئاورده‌. ڕه‌مانی لاو باوایم نیشانه‌م دا .باوام چننه‌ حاڵش وه‌ش بێ وه‌شته‌ر بی .قسێش په‌ی نامێ . یاواشیه‌ ده‌سش که‌رد باخه‌ڵه‌شه‌ره‌ و  په‌نج تمه‌نیه‌ش به‌ر ئاورد و نیاش دلێ ده‌سیم .
مامام: پیاکه‌ ئانه‌ هۆشت هه‌نا چکۆ ،جوجه‌ڵه‌کا لواێنێ دلێ زه‌رحاته‌که‌ی .
مه‌راقه‌و په‌نج تمه‌نی و ئۆرایی و نماو جمعه‌ی باوایچمش وه‌ش پێک که‌رده‌بێ .دارێیه‌  تێژه‌ لاو ده‌سیشه‌نه‌ بێ نه‌ماشه‌نه‌ و چه‌نی واته‌و کش وه‌ی تۆپای ...  فڕه‌ش دا په‌ی جووجه‌ڵا و گردیش ته‌ختو زه‌مینی که‌ردێ .مامام ئاماوه‌ ده‌نگ و ئانه‌ش که‌ په‌نه‌ کریه‌ی که‌ردش .باوایچم که‌ گه‌ره‌کش بێ چی وه‌زعێ  به‌ربشۆ  واتش ئا مه‌نگاو به‌سه‌زوانێ ته‌ژنه‌شه‌ن با به‌روش سه‌روو هه‌سارێ ئاویه‌ش بده‌و په‌نه‌ .هه‌نگامه‌ش ‌نیا بلۆ ، پاش کێشاش پووتیه‌ره‌ که‌ وه‌روو پاێشوه‌ بێ . به‌ ته‌قه‌و پووتی مه‌نگاوه‌ سڵش که‌رد و پیچیا و که‌وته‌ زه‌مین .باوام هاوارو چه‌قوێش که‌رد و هامساێ ڕفیای و ئامی هاناوه‌  . چه‌قوه‌شا نیا ته‌نافێ و ناستشا مداره‌وه‌ بۆ .ته‌نافه‌ که‌ پڕچیا مه‌نگاوه‌ نیاش دلێ ده‌خڵ و زه‌رحاتی چێلاوه‌ لوا گه‌نمشامه‌که‌ش ماڵا .چه‌ولاوه‌ ئاما هه‌ڕه‌ش دا به‌ بیبار و ته‌ماته‌یوه‌ . هه‌رچیه‌یچش که‌ نه‌شێلیابێ هامساکاما شؤنی مه‌نگاوێره‌ شێلا .به‌ هه‌ر به‌دبه‌ختیه‌ نه‌بۆ گێرته‌شا و که‌رده‌شا گه‌وڕ .
بێده‌نگ گردی ته‌ماشاو فه‌زێحه‌ته‌که‌ی که‌رێنێ که‌ من په‌ی وێشیرینی واتم باوا نماکێت دێره‌ بیه‌
باوام :کۆره‌ نماو چێشی ،پی به‌ختێوه‌ ئارۆ ڕوه‌ش که‌ردێنه‌ من  ،ته‌رسوو بلو چاگه‌یچه‌ مامۆسا بنه‌مۆ سۆڕنای و حاجیچ سه‌رچۆپیه‌و ڕه‌شبه‌ڵه‌کی گێرۆ .بازه‌ با به‌ ده‌رده‌و وێموه‌ کاسیه‌وره‌ .ئارۆ ڕۆ من نیه‌ن.
قۆتیه‌ لاو ده‌سیشه‌نه‌ بێ نیاش چیرو سه‌ره‌یش ، نانیچش نه‌وارد و وت .


مه‌هدی ئه‌بری(هه‌ورام)



طبقه بندی: ادبیات/شعر، زوانی هه‌ورامی، کۆڵه‌داستانه‌و هه‌‌ورامی، مه‌هدی ئه‌بری(هه‌ورام)،
برچسب ها:هورامان هه‌ورامان‌هانه‌به‌رچه‌م-کتابخانه‌ هورامان؛یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-هورامان تخت ژاورود-پاوه-نودشه(نۆتشه)زرده-پریان-رێژاو(ریجاب)-کندوله-ته‌وێڵه(طویله)-بیاره-ساور-نودیجه-حلبچه(هه‌له‌بجه)-خۆرماڵ مریوان-سروآباد-کرمانشاه-کردستان-دالانی-ایلام-کامیاران-روانسر-جوانرود-چهارقلعه‌عبدالملکی(زاغمرز-زینوند-حسین‌آباد-امیرآباد هورامی های شمال ایران)-عکس-شبک(شه‌به‌ک)-سنجار- کاکه‌یی-یارسان-ساور-نودیجه-زازا-زازاکی)-قلعه قروه-چورژی-هانه‌به‌رچه‌م-هۆمایون محه‌مه‌دنژاد،وه‌سیه‌ت په‌ی مه‌زهه‌ری،سه‌فه‌ره‌کێ گالیوێری،داستانێوه جه کاکه مه‌هدی ئه‌بری(هه‌ورام)،
نوشته شده در تاریخ شنبه 3 مهر 1395 توسط همایون محمدنژاد
.: Weblog Themes By Abdollah Habibi :.