گلێرگاو غه‌زه‌ڵوو ئارۆ هه‌ورامانی

غەزەڵ ئانا نەوەش کەوتەن شەرابێ چا دەمی بارە

قەسیدێ ڕەزڵەشا بڕیا جە زوڵفوو لاچەمی بارە

چەن و نەیما نیا حاجەت موژە و گیسووت ئەگەر بانێ
تەبابەت هەر جە تۆ خێزۆ شەمامەو لاو شەمی بارە

پەرێشانی گەرەکتا ئەر بە یەکجاری جە بن باری؟
بە وەسڵت پەی پەرێشانا دەواو خاتر جەمی بارە

جە دیوانم بە هیجرانت ئومێۮ و دڵوەشی مەرۮێ
خەرامان بۆ بە لەنجە و لار مەسیحاو مەریەمی بارە

سەراپا بەیتەکێم بێ تۆ زوخاوا نوقمێ کەرۮێنێ
بە غەمزە و نازەکەو ئەوسای ئەساسەو مەڵهەمی بارە

مراۮوو من جە تەوفوو ئی دەوار و سەر هەواریتا
شەرابوو وەسڵەتین سا بۆ نموونێو زەمزەمی بارە

حەیاتم ئاخرش ئامان نەتەرسی قڕ گنۆ هانەت
نەسیبم یەک ژەمەن باقین کەفافوو یەک ژەمی بارە

هەتا یاوۆ شەرابوو جەننەتی "سەعدی" چە وەردوورا!
غەزەڵ ئارۆ حەرارەتشا شەرابێ چا دەمی بارە

#سەعدی_غەریبی

په‌ی زه‌ریفی چه‌مه‌کاو تۆ هه‌رچی من واچوو هه‌ر که‌ما
گردوو  وه‌شی   دنیاو ژیوای  دلێ چه‌ماو تۆنه‌  جه‌ما

حه‌قم ده‌ په‌نه‌  هێجرانت ئه‌یر  وزۆ  یانه‌و دڵوه‌شیم
ساتێو چه‌مێ تۆ نه‌وینوو بیه‌ و نه‌بیه‌یم گردش خه‌ما

سه‌ختا په‌ی دڵیم به‌رئامای هه‌ناسه‌و ژیوای بێ تۆ بۆ
بۆ  وینه‌  وارانوو  چه‌مام  مه‌مدرۆ ، بێ تۆ نه‌م نه‌ما

کاروانوو وه‌شیم بارش که‌رد، لوا و دڵم ته‌نیا مه‌نه‌ن
گردوو ئاواتاێ ئاماو تۆ دوورێ بیێنێ و چه‌نه‌م ڕه‌ما

ئێننه‌ دڵ ناڵا په‌ی دووری، ئومێذێو نه‌بی و سه‌بووری
ده‌نگوو ناڵه‌ی زه‌مینش گێرت حه‌تا یاوا به‌رزی سه‌ما

دلێ قاڵوو دنیایه‌نه‌ دڵ کزش که‌رذه‌ن مه‌لوولا
عومرێوا ده‌نگت په‌ی دڵی وه‌شیا و تاقانه‌ هامده‌ما

داخۆم نه‌په‌رسی جه‌ دڵیت، جه‌ هێجرانوو دوور مه‌نزڵیت؟
تاکه‌ی زه‌جروو من به‌ تاوه‌؟بیه‌یت هانێوا، زه‌مزه‌ما

ئێننه‌ وارانوو هه‌ڵسه‌کام واران سه‌روو دیذه‌و جه‌سه‌یم
یانه‌و خه‌می خاس ته‌ڕ بیه‌ن، سه‌ر تا پا گرد شه‌م و نه‌ما

خه‌میار هاوارش هۆرسه‌نه‌و، نه‌ پاو لوایش هه‌ن نه‌ ئامای
گردوو ئاواتوو دڵه‌که‌یم حه‌ر تۆنی گلێنه‌و چه‌ما!

#
حێکمه‌ت محه‌مه‌دی(خه‌میار_هه‌ورامی)،

وارانێ مه‌بۆ بانێ هه‌تا هانێ وه‌رێ با
وارانێ نه‌وا هه‌رچی  گۆڵێنێ په‌که‌رێ با

مه‌ر کریۆ که وارانێ نه‌وانێۆ  گۆڵێ بانێ !؟
مه‌ر کریۆ گۆڵێ  هه‌ر به قسێ روتێ هه‌رێ با !؟

ته‌نیا نه به واران که  هۆمیدێوه مه‌بۆ  بۆ
هۆمیدێ مه‌بۆ  بانێ ئه‌گه‌ر سه‌د  ته‌وه‌رێ با

ئا دارێ ته‌مایارو  دلێۆ  سۆبه‌یه‌نێ که‌ی ؟
تا وانێ  گه‌ڵای سه‌وزێ  که‌راو  پڕسه مه‌رێ با

که‌ی چاره‌ره‌شی بۆ به دوچارو ژه‌ره‌ژا ئه‌ر
وه‌ختێوه  گه‌ره‌کشا بۆ کۆشاشا خه‌وه‌رێ با

چا  ڕۆیه مه‌بۆ ته‌رسۆ خۆدا ،ئاخ و هه‌ژاران
پێسه و  گره‌وه‌و  زاڕۆڵه مه‌ردێوه  وه‌رێ با

ئی یانه مه‌که‌ردێشۆ نه یانه‌ن، قه‌فه‌سێوه‌ن
ئاخۆ قه‌فه‌سێ  کریۆ  جه  ئازادی په‌رێ با !؟

پی  وشکۆ بیه‌و باخ و که‌ش و ناق و من و تۆ
ئه‌ر شێعرێ  مه‌یا په‌ی من و تۆ ،بێ نه‌زه‌رێ با



#په‌رویز_بابائی


تۆ نەواچی من جه تۆ ئێحساسوو بێزاری کەروو
تاقەتم  تاقا    فڵانی   په‌وچی  دڵداری  کەروو

زەردەنا حەر پێسه به‌رگێ کەوتەبۆ گۆشەو دەرەی
ئێنده  ئازیەت  بارەنا  ئانا  به  دڵ  زاری کەروو

من  ولی  بێنێ خەزانوو  بێ کەسی دانێ  وەنە
تا قیامەت حەر گەلایەو تیجوو ڕۆجیاری کەروو

بانەکەت  بەرزا  مەیاوۆ  یا  که  دیوارت نیان

ئای که چنده حەز جه خاکوو بانوو پاساری کەروو

کۆڵەکێوەت  وسته بەینو تاقه تیموو  ویرەکام
شێتوو دیداریتەنا من حەز به دیداری کەروو

سەر گوڵوو عومروو منش به‌رد واگژەو دووری چەمات
ئیسه من پەی چی ئیتر ئاموشه و ئی شاری کەروو
ڕۆحوو  من  تۆنی نەواچی  مەیلوو  دیداریم  نیا
با ئیتر وەس مەنع و لۆمەو شێعره و خەمیاری که‌روو

#فه‌رید_ عه‌باسی
کۆڵەکه برقێوەنا، چۆکڵەینە، چوو کانەو دەگێ
زوو کەرێنێ ڕۆشن ئا دەور و بەروو یانەو دەگێ

پەوچی ئامانێ کەروو ڕۆشن بناروو هانەکەی
پەوچی ئامانێ نەبۆ کاولتەر ئی هانەو دەگێ

هێزی گوڵپوو من تەوەنوارانوو زاڕۆڵا جەنا
ئیسه جن پێکۆت ئەگەر ڕا بوزی کۆڵانەو دەگێ

ئینە حەفتێوەن کە چۆڵا یانەکەو پاڵیم، منیچ
چێگە چەقیێیناره ئەرنا بێنێ وەیلانەو دەگێ

وێم ژنیم واتشا قەرانێوەیچ نمەیژوو، وەشتەرا
زوو بلوو هاڵی کەروو باروو سەروو شانەو دەگێ

حەتمەنا ڕێخەم دلێو باخێنە هیشتای هەر مەنەن
حەتمەنا مزنۆوە شاتێ وەختوو جەژنانەو دەگێ

من دەس و پام ئەر نیا تۆ چی کەری لۆمەم فەقیر
چوونکە نەججارێوە پیری بەرد به بێعانەو دەگێ

حەز کەرێنێ کۆڵەکێ نەبیەینێ، کریێ مەیت بوو
بێ خەفەت کەوتەینێ بووموو مەرد٘ەشۆرخانەو دەگێ

قەحتە هێزم کەرد٘ەنش کارێوه خەڵکیچ گول بیەن
گول دیێم پەی ئارۆ ساحیبوو کەبابخانەو دەگێ

من کە حەر سۆچوو بەڵام تۆ واچە ئاخر قێخود٘ا
کۆڵەکێ سیمانیه کەی بۆ به گۆچانەو دەگێ

#
حافێز ئه‌حمه‌دی(سەروەش)

ڕۆ به ڕۆ ڕۆ ڕۆ کەروو پەی بەختی بێ بەخت و سیام
کۆ بە کۆ کۆ کۆ بیەن جەم حەسرەت و ئاهی چیام

ڕوو بە یانە و بێ وەفایا دەس بە زەنگۆڵ و مەلوول
چن فەقیر و کز دیام و هەر دیام و هەر دیام

بێ سەر و بێ شۆن جە خۆفوو ئی جیاییما ڕەموو
هەر مەیاوو تۆ جیام و هەر جیام و هەر جیام

من نەماموو باخوو عەشقیم ئارد نیام باخوو دڵی
بێ دەماخ و وشک نیام و هەر نیام و هەر نیام

هەر بە زۆر و تایبەتی دەمما نیا داموو دەمیت
دەم نەبی پۆ هەر ڕیام و هەر ڕیام و هەر ڕیام

ئەی جوانی تۆ بە ڕەحمەت مەرحەبا پیری جە تۆ
تازە من کەل هۆرزیام و هۆرزیام و هۆرزیام

پابڕوو یانەو وەشینا و تاقە دۆسوو ناوەشی
"نادیار"م سەرشیام و سەرشیام و سەرشیام

#عەباس_غەریبی

غه‌زه‌ڵێوه‌ بێ نوقتێ

دام دلێ ئاو هەواکەو سەر کۆساروو ئی گەما
ڕام لواوە ڕاڵە سورێ سەر هەواروو ئا دەما

وارۆ ئاوۆ هەرسەکام و سوور کەرۆ کۆڵم و دەمم
لاسۆمە و ئەحواڵ و حاڵام ئاهی دڵ دا هۆر سەما

هەورەسەی سەرساموو عۆمرم ها لوا هۆر سەرکەلا
دەس ئەگەر دا دۆڕڕ و گەوهەر لا مەلولا وەرهەما

ڕۆحەکەم کۆساروو دەردا و هەرڐی دڵ کاول کەرۆ
وەرمەکەم ئەڕواحوو مەرڐا و هەوڵ و کەڵ ئاسا ڕەما

سەی وەروو ئا لارە کاوا دڵ مدۆ داموو گوڵی
کۆ لوا گوڵ؟سەر وە گڵکۆم گڵ وە سەردا هەر کەما

ئەی هەراڵەو ئی وەهاری، ئەی سەراوی دۆڵی دەم
ئا هەراڵە و ئی سەراوە دەسسەڕ و هەم مەڵهەما

داڵی سەرکاو دا دلێ ماڵوو دەواری "نادیار"
هەر کەموو کەسری کەساما داڵ کەس و هەم مەحرەما

#عەباس_غەریبی

جیاییما سەروو ڕایتەو مجۆم نەم نەم بە گیانوو تۆ
نەبی لامەو چەنەم هەرسیچ کەرانێ ڕەم بە گیانوو تۆ

هەناسێم ڤایە سەردێنێ بیەن بۆران بەر و بوومم
شۆنەو باڵایت، نە یاگێ پایت، مەوینۆش چەم بە گیانوو تۆ

جە عەسرانەی دەسم وەربی دەسوو تۆوە و نەگێڵایوە
جەما جەمشا زۆخاوێ و دڵ، سوینیت کەم بە گیانوو تۆ

لوابینی شەراب باری، نەلی یاگەی مسڵمان بی
کە هەر چی ئاشقانێنێ کەرا وەرهەم بە گیانوو تۆ

ژەنوو ساز و ڕەژوو دیدە و سەراپا بوو غەزەڵ واچە
گەڵا رێزان نەواش چنیۆ و بەرۆ سۆجدەم بە گیانوو تۆ

سەروو خاکیم مێخەک مزیۆ و ڤلەی سوورە و گوڵێ کاڵێ
ڕوەی ئامای کەریشا بۆ، خەیاڵت جەم بە گیانوو تۆ


#
ئامینه ڕه‌حیمی(ژوان)




طبقه بندی: ادبیات/شعر، زوانی هه‌ورامی، فه‌رید عه‌باسی، حافێز ئه‌حمه‌دی(سەروەش)، حێکمه‌ت محه‌مه‌دی(خه‌میار)، ئامینه ڕه‌حیمی(ژوان)، په‌رویز بابایی، سه‌عدی غەریبی،
برچسب ها:هورامان هه‌ورامان‌هانه‌به‌رچه‌م-کتابخانه‌ هورامان؛یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-هورامان تخت ژاورود-پاوه-نودشه(نۆتشه)زرده-پریان-رێژاو(ریجاب)-کندوله-ته‌وێڵه(طویله)-بیاره-ساور-نودیجه-حلبچه(هه‌له‌بجه)-خۆرماڵ مریوان-سروآباد-کرمانشاه-کردستان-دالانی-ایلام-کامیاران-روانسر-جوانرود-چهارقلعه‌عبدالملکی(زاغمرز-زینوند-حسین‌آباد-امیرآباد هورامی های شمال ایران)-عکس-شبک(شه‌به‌ک)-سنجار- کاکه‌یی-یارسان-ساور-نودیجه-زازا-زازاکی)-قلعه قروه-چورژی-هانه‌به‌رچه‌م-هۆمایون محه‌مه‌دنژاد،وه‌سیه‌ت په‌ی مه‌زهه‌ری،سه‌فه‌ره‌کێ گالیوێری،گلێرگاو غه‌زه‌ڵوو ئارۆ هه‌ورامانی،
نوشته شده در تاریخ سه شنبه 18 آبان 1395 توسط همایون محمدنژاد
.: Weblog Themes By Abdollah Habibi :.