هورامان هانه به  رچه م
قۆرسایی بێ دەنگی بیەن منەتۆ سەروو شانەیم/
وەشڵەی سووکی نەعرەتەی


چا بەرەگا لێڵەنە کە شەوەزەنگۆ وێ خڵافنای و کەڕوکاسی مشکی عازارێش کێشتەبێ سەروو بووموو ژیلارە و هەورامانش کەرۮەبێنە وەرمیوی قۆرس،بڕێو خەمەوەرێ کە گرۮ وێرەگانێو ورکەو فەوتیای زوان و فەرهەنگی بریقەداریشا کەرێنێ وشكەژاڤوو خوانەکێشا پەی چینەیە فرەتەر دلێنە نەشیای زوان و ئەدەبیاتوو نیشینگەو پیرا تەگبیرشا کەرۮ گۆش نەۮارانە تانەوتەشەروو ناحەزا و لاقرتیاشا،فیکەشا بەی پانەیە کە بە لادەر،نەزان و چڵكاو وەروو دەسوو ئیۮی و ئەوی بنیاشارە.پووزەوانێ هۆرکێشا و وەرڤۆ دەساندەسا بڕا و سەرکەلەکا بە لاقۆرە پتەوەکاشا وشکنا و تەیمانە هەڕۆڵەکۆ شۆنۆ مەرگوو قەڵاو ئەدەبیاتوو هەورامانی کەرا بە دیواریوی هێقم، هەسەم و گریگدار.ئانە بی کە یەکەم چۆڵەچراو هۆرگڕا و هەورامان چاوەختەوە وەروو وێشەرە ورەورێوش ئەی و واچی:
شنەی دەربەنان مەیۆ بە بۆوە            مەرۮەی سەۮ ساڵە زیننە کەرۆوە
 نویستە ئارۆیانەکێ بنەشا پنە دریارە و پەرگەماشا پتەوە بیەوە،هەرمانەکێ چیروو پەلاو هەرمانبەرە دڵسۆچنەکانە زەرێڵ زریکنێ.وتارێ بە نویستیوی وێمانە،پەتی و بێ پەناوپێچ سەرەشا زنیەوە،شونیەرە کتێبێ نویسیەی،جە ئەدەبیاتوو وەڵاتە وەڵكەوتەکانە چێوانێ مەکینێ هۆرگێڵەیوە سەروو زوانی هەورامی و شۆڕش پریزگێش وەتێوە ئەمان چ شۆڕش و ئەوەژڵێویایێو.هەر ئا زەمانەنە نویسەروو ئی دەقیە جە وتارێوەنە بە نامۆ؛"تا بانوو وێت مدران بانوو یۆتەری مەتلنە باسوو وەرپەنگێ وەرەڕاو ترۆقوو زوانەکەیش كەرۮێ و واتش ئەگەر بتاومێ جە هاڵیگای مەجازی بە ڕێكوپێکی کەڵك هۆرگێرمێ متاومێ گرۮوو تەلبەنە باوەکا قرتنمێ و فرەتەر گەشە دەیمێ بە فەرهەنگە هەناکەبڕ بیەکەیما کە بە وەشحاڵیەوە قسەکێ ئاما وەرەوە و هاڵیگای مەجازی بی بە یۆ جە کۆڵەکەکاو یانەو هەورامانی.
ئی ئاوە پاک وپۆختێ چا چەمە پۆختەنە هۆربینیا،باخە وێرانەکەو هەورامانی تەڕوبڕ کریا و ئاوی نریا ئاژین،تا چن ساڵێ شۆنیەرە ئا دڵسۆچنێ جۆ بەرێنێوە،جۆکڵەماڵ کەرێنێ،ماشوو دلی قەڵوەز و بەنگاکا وەر دێنێ تا باخەکە نیشتەنە سەمەر.وشکی باخەکەی کریا،ئەو حەر کووزڵێڤۆ باخەکەی دیێنی کەڵەکێ نریەیبێنێوە و بەر لەق وپۆ درەختەکاوە ئاڵۆچیابێرە.ئا تاقمە دڵسۆچنە بڕیارشا دا چیەولا ورینێوە دا فەوجێوەتەر نەمۆ لەنگەروو هەرمانەکێ کە بەڕاسی ئاۮێچێ فرە ژیرانە هاگاشا ئەوەنەکۆشیای گڕە سوورەکێ بیەن بەڵام بەداخەوە بڕێو شێونەرێ كە وێشا دانشا گێلیەرە و پاسە مۮا چەمەوە کە گرۮ شەوێوە جیای ماشقەکاشا دەس وزانە ملوو هەورامانی خەریکێنێ تووڵەڕاکێ ئەنقەسی وڵاڤنا تا پەی ئەو ڕاویارەکا دیارە نەبۆ.ئی کەسانێ وەروو وێشارە ئەجۆشا لیڤیۆ پەیشا ئی ئەوەژڵێڤیا فەرهەنگیا بەرا وەروو ڕایرە،وێشا بە ئاغەلەو هەورامانی مزانا،گەرەکشانا فرەو تەوەن بنەڕەتەکاو ئی شۆڕشە فەرهەنگیەو خەڵكوو هەورامانیە یاگێشانە ترازنا.فرەو نویستە و هەرمانەکاشانە ڕوو بە ئا یاوگەیشا لاقۆرە هۆرگێرا و هەتا ئا حەننا خەمەوەرێ وەڵاتیەنێ كە ئاواتوو تێكوپێك دریای گا بەی بەڵام با خاس بزانا و ئا کلکێ بەر بارا گۆششانە کە جوانوو ئارۆ هەورامانی جە گرۮ زەمانیوی کرژوکۆڵتەرا نەک حەر پێسە چیەو وەڵێ سڕوسۆڵ نیا بەڵكوو پێسە قلیچکە تیارەی مەیوە دەسێ،زیتەڵ مدرۆرە و مزانۆ دۆس و دژمەنش كێن! دەی با ئا بە نامێ ڕۆشنویرێ کە پەی خەڵەتنای خەڵكی جە وتاروو ئێۮی و ئەوی قرتنا و بە واتەو وێشا دەق وەش كەرا چڵەکیارە یام بەیانە دلێ كۆماڵۆ خەڵكی یامکەتی کۆنجێڵەو خەرەفیای وێشانە کزووڵە کەرا و مەنارە پەی دالێو ڕۆشنایی!!.
 ئۆمید حه‌بیبی



طبقه بندی: فرهنگی و هنری، اجتماعی، ادبیات/شعر، تاریخ، زوانی هه‌ورامی، ئۆمید حه‌بیبی،
برچسب ها:هورامان هه‌ورامان‌هانه‌به‌رچه‌م-کتابخانه‌ هورامان؛یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-هورامان تخت ژاورود-پاوه-نودشه(نۆتشه)زرده-پریان-رێژاو(ریجاب)-کندوله-ته‌وێڵه(طویله)-بیاره-ساور-نودیجه-حلبچه(هه‌له‌بجه)-خۆرماڵ مریوان-سروآباد-کرمانشاه-کردستان-دالانی-ایلام-کامیاران-روانسر-جوانرود-چهارقلعه‌عبدالملکی(زاغمرز-زینوند-حسین‌آباد-امیرآباد هورامی های شمال ایران)-عکس-شبک(شه‌به‌ک)-سنجار- کاکه‌یی-یارسان-ساور-نودیجه-زازا-زازاکی)-قلعه قروه-چورژی-هانه‌به‌رچه‌م-هۆمایون محه‌مه‌دنژاد،وه‌سیه‌ت په‌ی مه‌زهه‌ری،سه‌فه‌ره‌کێ گالیوێری،قۆرسایی بێ دەنگی بیەن منەتۆ سەروو شانەیم/ وەشڵەی سووکی نەعرەتەی:کاکه ئۆمید حه‌بیبی،
نوشته شده در تاریخ سه شنبه 7 دی 1395 توسط همایون محمدنژاد
.: Weblog Themes By Abdollah Habibi :.