کۆڵەکەم قورسا بەڵام ئی چەرخە لارا ئەر نەلوو
دەرد٘ەداری وەش نیا دڵ دەرد٘ەدارا ئەر نەلوو
ئەر دەسم بۆ تاقەتم هەن دەس بەروو نانم وەروو
دەس نەبۆ وەڵڵا دەروونم بێ‌قەرارا ئەر نەلوو
ئەر خەموونانی نەبۆ کێ حەز کەرۆ بارش بۮا
سفرە هاڵین و دڵم دەرد٘ش هەزارا ئەر نەلوو
بێخەمێ ماچا نەلی خاسا نەکوو کۆڵت بەرا
کەس نیا دەرد٘ەم وەرۆ ڕۆڵەم هەژارا ئەر نەلوو
من مزانوو سەۮ بەڵا حازر کەرا  تا من بلوو
مامەڵەو نانی ئەجۆ نەوت و دولارا ئەر نەلوو
تاتەڕۆکەرد٘ەی وەشا تا یانە هاڵی بۆ جە نان
تیکە نانوو یانەکەیما زەهرەمارا ئەر نەلوو
کۆڵبەری نانش حەراما مەر خوۮا ڕەحمێو کەرۆ
سا بە کێ واچوو خەزانم بێ وەهارا ئەر نەلوو!

#جەماڵ  قادرپوور

من پاییزم دان شانەرە
تاکوو هەردەم وەهارتا بۆ
کەواو حەزیم
شیتاڵ شیتاڵ
پاڵاو شاد٘ی پەی پایم تەنگا
هەرێز ڕیشەش کوان
ئێشێوە قووڵ
ئاوێزانوو بێخوو چەمان
وەشی تاسیان
تەنیا و تەنیا
ڕەنگی زەرد٘ا
زەماوند٘ەو عەمریمەنە کەرۆ سەما
داروو ژیوایم
ڕووتەڵە و وشک
وێشۆ نەد٘یش سەوزە گەڵا
من پاییزم دان شانەرە
.....
# ب.م (شارۆ)
چیگە هیچکەس یۆتەر نیەن
نە ئێد
نە ئاد
نە هەم تۆ
نە هەم من..
چیگە جە کەسی بەشوو کەسی نەدریان
نە من تۆنا نە تۆ من نە کەس کەس!
چیگە منەنا و خەمێ بارێ و وەشیێ بێ دەسەڵاتێ پەشتوو کەنووی
منەنا و تۆ نیەنی و کەسیچ داعش نیەن تا نەویەیت گێرۆ عۆهدە!
ئێد هەن و پاڵوو سۆمپاکێنە
قولێش کەردێنێ گەرمایرە و جارجار
"ئۆ توخودا"یەش مەچڵەکنۆمارە و مەکێشۆما پێ سەرنجەو هەواڵیە تاڵ و توونی؛
خودا بیەن تۆم ورەشوو زامداراو نانی!
خودا بیەن وانەروو شێعری و
دەردێ هان مدۆ تا شێعرە هەناسەش بوەو مەنەی بدۆ!
چیگە
خودا بیەن ئاشقوو ژەنیە کە لاشەش بوەو پیای مدۆ...
ماتیک
جلێ تەنگێ و قارت و قورتێ بەرە پڕێ
تەق تەقێ سوورێ و
بازاڕیە و
ئاخروو شەوێ؛
 وێش و خودا میاوە یانە بە دڵقیە پرتەقاڵە ونیێوە!
خودا مووسۆ
ئادە چەنی پرتەقاڵەکا
 باوشی گێراوە تا خەمێ نەچاقەنە باڵاو خودای
چەقانە وێش؛ سڵپۆت تەرە و پرتەقاڵەیچ ونینتەرە!
و باوێشکێ کتە زەردەو دیوارەکەیچ
درێژتەرە جە بێ خیاڵی!
خودا وت
زیندەگی ڕۆ بە ڕۆ فرەتەر هایشەن!
نمەدیۆ پەی سەعاتەکێچش
تا بزانۆ کێ وەختشەن بلۆ و کێ وەختش نیەن!
ژەنکڵەکێچ
یۆوە یۆوە توودڕکی تەنیایێش چنیێنێ
نانەشانەو یادەکاشەنە
کۆڵ بە کۆڵ
مەکێشۆشا ڕووەو خودای!
وەرگ و میشوو باوەڕینە
درۆ، نەمانش ئەو لووتەکێ پینۆکیۆی و ژێپێتۆی پیر
چۆ تاشۆ پەی تەپڵەو ڕیسوایی حەقێقەتی!
شەوە شانەش دان چیروو نەمیایی مانگەشەوێ
و مەخلۆق چیروو منەتاو
 وەرەتاوینە
سووچیەیمێ جە ڕۆ بە ڕۆ گەورەتەر بیەو ئۆزۆنوو نالایقیمانە!
خودا وەرمش قورسەن!
مەر کلکلەوایلێ
پارشێوی چڵەکنۆرە و ئاوی بدۆ لچاو تەژنەییرە.
بازدێ با بووسۆ خودای گەورەی دووجەهان؛
سەعید* نزیکەن و تا قوربان*
ئێسماعیل مەنەن!!!
(*جەژنەو سەعیدوو فتری و جەژنەو قوربانی)

#فه‌رخۆنده شه‌یخی(کاڵێ)

دلێ قسە نەژنەویاکانە
دیسانەوە دیەیموە!
تازە، تازەتەر جە زیندەگی
شنیایمەنە؛
پسەو وای دلێ (گەنمزارینە)..
ئێستیموە
چوون هەمیشەی دێشینە دەمارەکامەنە
بەرەکەتی حاسڵخیزم
مەرەزەو* سینەیمەنە بۆ بنیە شەتڵەو پەنجەکات؛
خێڵیە ئۆراو سەعادەتینێ!
وارەم ملەرە؛
پەڕەنا گەنمی و حەوا ساوی بە دەس
کیسەش دان وەروو هارەسەنگەکەیم!
پەڕەنا قسێ نەژنیێ و ئی شەوێ
 شەوەزەنگوو وەهاری بەوساڵین چەنەم!
واش مێ
جلەکاو وارانی تەنافەکێوە شەکیای شەکیاوە
تۆزە نیشتەنوە زەمین و بەرەکەتشەنە خورماوی مزیاوە
هەڕاوەیچ زینەتوو ڕۆتەبە خرتەکاو نەخڵستانەکەو بیەیمەن!
نە من، دنیایچ پنەوازوو ئامەیتەن
نەویەیت
تایلە ڕەقەکاو گوڕستانیچ پوونۆ
نەویەیت
ئیتر وامی نمارۆ پێم تا دەوش لاو ژەنا پەی دڵوەشی ساتیەشا!
ئیگە من هەنا
یانێ فاسڵە تا تۆ
ئیگە من هەنا
یانێ تۆ نیەنی و ئیگە من هەنا
ساڵانەو دڵبەردەی جە کۆڵەدار ئاردەیوەنە نیەن!
ئیگە من هەنا زوو نیەن
ئیسەنە
وە نەویەی دروێ مدا دڵەنە ڕێخەش نیەن؛
مەغزوو پێشەکانە چزێ شانۆ!
ئیگە من هەنا
پەڕەن جە قسێ نەژنەویەی و ئاگە تۆ هەنی
گۆشێنێ وتێ!

* جە زوانوو سۆرانینە بە ماناو "شالیزار"ین.
#فه‌رخۆنده شه‌یخی(کاڵێ)


طبقه بندی: فرهنگی و هنری، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، بێهرووز محەمەدپوور(شارۆ)، فه‌رخۆنده شه‌یخی(کاڵێ)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه(نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد) هورامی های شمال ایران) عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،که‌له‌به‌روو شێعرا(2)،
نوشته شده در تاریخ سه شنبه 6 تیر 1396 توسط همایون محمدنژاد
.: Weblog Themes By Abdollah Habibi :.