که‌له‌به‌روو شێعرا(4)
تا جەفات مگنۆ خیاڵم  هەس بە دڵگیری کەروو
دڵ نمازۆ ئەر نە من هەر مامەڵەو ژیری کەروو

بێ تۆ
جەگرد چێوێ مشوو
وێم نەبۆ
بێ من
هیچی مەشی
وێت نەبۆ .

بڕێ فکرم
ئینا لاتۆ
گەر هەرمانەت نیەنەپەنەش
پەیم کیانۆ .

دڵم دلێ سینەیمەنە
دەفێنە دەسو دەروێشێوە
حاڵ گێرتەیۆ 
دوم تەک تەک دوم تەک.

تاڵێ زوڵف نا
پەلکێت کیانە
ڕۆحم تکە کەرۆ.

پرتەوچەمام چەنی
لەنجەو گۆشەوارەکات و
ترپەودڵیم چەنی لەرەو پاوانەکەیت
مێقات کەروو.

دەم کەریوە هانێ تەقا
دەم وزیرە
هەنگەجاڵێ وشکوبرنگێ.

سەرەت وەنە و فەسڵە داماگەکا تێک دان
گرەوی هامن مێ
مەی وەهارمێ
نمەی زمساناو سەردما
وەختێ مێشێ زەردیچ کەری
پایزڵەی قوت قوت کەریوە.

مەخووە
ئا هەنارە دەمترەکا تەرێق مەکەرۆ
ئیمانت بۆ.

ـــــــــــــــــــــــــــــــــــ
#سوهەیب فاروق

منێ دێقکەردەو
تۆیێ ناما
بەینو خەتموو ئی گرد دێڕانە
پەشتەو کەلو ئی گرد کەلیماوە
چەمەڕوانیم چەمێش دڕیێرە و
تەنییاییم ئاما لارە و
هەناسەووەشبەختیم  بالۆرێ پەی نووزەی بەرنامایش ماچۆ
تۆ چکۆنی؟
دلێ بەڵەکۆنو کام ئاپارتمانوهۆمێڐینە
قلیانوقلیایۆت مڐەی هەوارە ؟
سینەی ڕەقەڵەو کامە کیبۆردینە
شۆنەو سۆراخو نازارەکاتنە وێڵنی؟
شار دووکەڵاوی و
شار قرخن و
شار سێخن و خڕەخڕە و وڕەوڕو .....
دەگایچ هەرگیز پی زووانە مەپێویۆ
ئەڐایچ هەرگیز پی زووانە
نمەوینیۆ
پی دەمودەسە مانگە مەزیۆ/ کەژێچ هەرگیز
تۆ چکۆنی ؟
دلێ کۆڵیتەو کامە ئاسانسۆرییەنە
کارەبات چەنە مدرێنە و
نمەزانی پەنجێ " g " رە بنیەی یان ژمارە  " 4 " .
دلێ قەبرسانو کامە مەراقیتنە مدرانی و
ژمارەوقەبرورکەنیت گوم کەردەن و
تەماڐارنی کۆرپەی مەردەوئاواتەکات بنیەی قەبرێ و
دەست مەگنۆ،
تەماڐارو کامە یاری بەوەفایتنی و
تۆ زەنگ مڐەی و
 هەر ئی ئاوازی مژنەوی : " تووووووت تووووووت تووت"
چێرو وارانو کامە سەقفو چەمەڕوانیۆ
دڵۆپی شانەیت تەڕ کەرا و تۆیچ هەر من مەوێزییۆ
من شۆنەمایم سیاوەنە؛
یان تۆ مەیلت کۆنە کەردەن؟
من پەشتیم چەنە ورکەردی؛
یان تۆ شووت کەردەن مۆدێرنەی؟
ئیسە دلێ هەوارو کام تۆڕێنە شنەوگۆڕاڵات منویسیوە
"Facebook´
Telegram
´Yotube?"
ئا جادە کە ئامایولوایش چۆوە کەری کامەن؟
ئا گوزەرگا کە " M M  " ش چەنە کێشی گنۆ کۆوە؟
ئا مەوقیفە پاسەکەوتۆش چۆوە گنۆ ڕا گنۆ کامە وێرانەوە؟
تا من ئننە مدرو دیارتۆ
تا ئەوسەرو وەشبەختی
تا ئەوسەرو وێبییەی / ئەوسەر ئەوسەرو ئەوسەروگردچێوی
تۆ چکۆنی ئەی " وێم "
 ئەی وێمی گومبییە وێمی وەشەویس.

#سوهەیب فاروق

کرکیە گەڵوەشەنە گیرش کەردە بێ 

دلێ هیچ بەزمیەنه ڕاش نەبێوە

سەرتەروە

لێڵ

لافاویەنە قۆمناش

#مه‌هدی ئه‌بری(هه‌ورام)

قیبلەم شیرینەن

قیبلـەم شیــرینـەن،قیبلـەم شیــرینـەن
ماشەڵڵا قیبلـەم ،بــێ حــەد شیــرینـەن

شیرین به وێنــەی شانی هـەنگـــوینەن
شــۆخــەن نـازارەن،مـەکیـن مـــەتینەن

شــای زەریفــــانـــەن، تاقـەن جەمینەن
حۆری و پەریـسای ڕووی سـەرزەمینەن

باڵاش مـــەواچـــی ســەروی بــاخانەن
زوڵفــانش وەشبـۆ، شـەوبـۆی شاخانەن

سەفحـەی جـــەمینش مـــاهـی تابانەن
ســـــەرگــــۆنای ئاڵش شەمی شاهانەن

دەم چمان خونچەی تازەی نەو ڕەسەن
مل بەرز  مــەواچی کەڵی سـەرمەسەن

دوو برۆش پەیوەس چەمانش مەسەن
نیم نیگـــای نازش ڕیشـەی دڵ گەسەن

"ناسر" جه دامش چوون دیل ئەسیرەن
فێدای شێـــوەش  بام  یەکجار  زویرەن

#ناسر ئەخدەر


پەپوولە، باڵێ فڕنێ

چنگووپەلەوەری

لت لت کەرێ، پەل و باڵش

واشە، چەمێ زیتێوە

 پاڵوو لەقەوشکەوباخی

چەمەڕاو ویەروو

 پەلەوەری بێ

ویەروو ژیواو و لەم وەی کەرد٘ەو

 گیاندارەکا ، چینەی زیاد٘تەر نمەترازیۆ،

تاقمێو جە خەڵکوو ئێمەیچ ئاوەو

 ئاوەزیشا چنی تیکەو بێ خیاڵی

 هۆرلووشته‌ن.

ئاخ... وەشڵەی.... هەتا کەی پێسە بۆ؟!!!

#هومایون موحەممەدنژاد

نازەنین بۆرێوە دێرا یانە ماتا تۆ نەبی
یانە پەی چێشی کە ئی گرد ڕەنجە پاتا تۆ نەبی
بێوەفا مەیلت نەۮایا خاس بێ نەک دەی بەریش
بۮیە ژیوای ئەر مەنەن نامێش مەماتا تۆ نەبی

#جەماڵ قادرپوور
ئەر دەسوو خەڵکیوە زەڕ بەردەی وەشا
یا دەموو شێرینە جەم کەردەی وەشا
یا هەتیم و لاتەکا ڕووتێ کەری
سا تەڵاقم کەوتەبۆ مەردەی وەشا

#جەماڵ قادرپوور




طبقه بندی: فرهنگی و هنری، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، شهرها و روستاهای هورامان، نوشتارهای همایون محمدنژاد، هومایون موحەممەدنژاد، مه‌هدی ئه‌بری(هه‌ورام)، جەماڵ قادرپوور، سوهەیب فاروق(خورماڵی)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه(نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد) هورامی های شمال ایران) عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،که‌له‌به‌روو شێعرا(4)،
نوشته شده در تاریخ شنبه 11 شهریور 1396 توسط همایون محمدنژاد
.: Weblog Themes By Abdollah Habibi :.