هه‌ورامان هانه‌به‌رچه‌م

که‌له‌به‌روو شێعرا(5)


یاران پایزەن خەزان ڕێزانا
نەمەنەن سەفای وەرنە وەزانا

خەزانم زەردا پێسەوشێڵانێ
ئاخ ئاخەمبارێ کۆگە گێڵانێ

هەرکەس گەرکشا سەیروخەزانی
بەی لاو عەدمی دەروو داریانی

کەروتەماشەی خەزانی وارام
هاوراش بڕیان دڵێ بێ ئارام

زەردبیەن ڕێزان گەڵاو پەڕو پۆم
شەوان نەهەردان هامڕزای پەپووم

خەزانوو منا نەک ئینوو دارا
بیا تەماشا دەسەو خەمبارا

بەتعجیل یاوا نۆ پایێزی زەرد
عمرێ بێ ئاما لوا گوزەرد کەرد

پاسەشا واتەن نازک خەیاڵان
خەزان سوچیای هەناسە کاڵان

  #مامۆسا عەدەمی


خەزان ومەیلی

چرۆی چووزەی چڵ نەووەهاردڵ
هەوای سەردی مەیل پایزکەردخجڵ

زەڕ گەرئاسادەورجەتوحفەی وێشان
داوەتاڵەی بەرگ مۆرزەڕنیشان

نەوبەرنەمامان پای سەهەند هەرد
چوون بێ بەینەتان چەشتن مەیل سەرد

بەرزە درەختان کاڵای زەڕنەدۆش
هامسایی ڕزان کەردن فەرامۆش

سۆزسەرهەردان جەپاش وناران
مەلەریان وێنەی سێوەڕۆداران

چریکەی مەلان سوبدەم چوون سەمتوور
مەژەندن دەم دەم وە ئاوازشوور

بیوەقەت و قڕجەسەرهەواران
سوورمەی خەم کێشا وەدیدەی یاران

کۆکۆنەکاوان تەم و هەم بی جەم
تاسینەی کەشان پێواربی نەچەم

هانا های ئازیز بنمانە مەیلێ
دڵ کەیل سەردین فەراوان خەیلێ

بیاوەم بەداد جەی وەرز خەزان
باخەزان مەیل نەبۆ لام هەرزان

وەرنە تۆف سەرد زمسان خەیاڵ
جە سەردیاران مەکەرۆم پاماڵ

  #موحەممەدره‌شید ئه‌مینی


ئانا خەزان کەوتەو سەما دڵ چن بە ئا هەوایش وەشەن
گێڵای دلێ دەشت و دەری گیانم بە تۆ سەفایش وەشەن

پەلکێش هەنار کەوتێ سەما پەشێو بی چوون زوڵفەکاو تۆ
وەیلانەن دڵ پەرێ ئامایت  چەنی تۆ وەس نەوایش وەشەن

بەینوو لەق و پۆ زوڵفەکات پێویۆ هەنارێو دەم ترەک
گێڵای دلێ مڵکانە خۆ بەخ بەخ کە چن خوونایش وەشەن

ئاواتەکێو شاروو دڵیم باڵاتەوە هۆروەستێنێ
شەنیەر چەمێم ماچا بە دڵ خەیلێ لەزەت تەکنایش وەشەن

من هەر مەلوو چی شارەنەو ڕۆحم بە تۆ بەندا کەسم
ئاوێز بە زوڵفاتا دڵم زیندانتەنەو پوویایش وەشەن

وەختەی کە مەی مجیەی جبەر پەی پەی هەنار هەرزان مەبۆ
بەخ چا تەڵانوو باخوو تۆ تەنیا هەنار لەرنایش وەشەن

پاییز بە تۆ خەیلێ وەشەن مارۆنە ویر جاڕەو قژات
ئاخر دڵم ڕەنگەو موات پەوکای پەرێم حەزنایش وەشەن

ئانا وەهار کز بی چەمش پاییزەکەو دووری تۆنە
زمسان دڵم گەورەی کەری خەیلێ پەرێم گەرمایش وەشەن

 باڵاو منەو بینان قەتار زەردی خەزان عومرێوەن خۆ
بۆرێوە تا وینی بە چەم ئاخ ئاخ کە چن ڕەمنایش وەشەن

# بێهرووز محەمەدپوور(شارۆ)


وەتەن  هــەرچن تـــۆ  گـــەردەن  بەرزەنی
موبــــــــــــــــارەکترین خـاک و عەرزەنی

جای شـــــــــــەوبۆ  چنوور لالەو  مەرزەنی
داخی گـــــــــــــــرانەم بێ دڵــــسۆزەنی !

# یاوەر هەورامی

"پەی داریانی"

تا  ڕۆجیار  بزیۆ  بەرزی ئاسێڵان
تا  شەماڵ   شنیۆ  تەڵانەو  تەڵان

هەتا قولەی نوور نوورش پەڕ نوور بۆ
سەوقاتوو  یاراش شەوبۆ و چنوور بۆ

شێعرێش پەی ماچوو بەنەزموو جاران
جە  دەرەی وارین  تا سەر  دیاران

پا شەرت وەرکەمەر گێرتەبۆش دانە
کەڵێ  چا   بەرزا   وەزارە    هانە

مەی و بەران هەر دوێ چا سەر کەلاوە
کەڵڕەم  کەرانێ و  بیا و  بلاوە

گێڵانێ  ئازاڐ   جە   پسێکە ڵاوە
سەیاڐ حەق جەرگت  دۆ بە بەڵاوە

با  وانۆ پەی وێش ژەرەژە خاڵێ
لیانی  بینو  بێخوو   گۆراڵێ

ژەرەژ   نەوانۆ  سەحەر  جە دامان
دەی وەشییش کاما بەرزی هەورامان

تا شاهۆ هانێش هانە بە هانە
مجیارە   واری   چا    کوێسانە

تا سپیاو  هاژەش  گنۆ  نە گۆشم
چوون مەی گۆساران جەهۆش بێ هۆشم

هەتا سەرچەمە سەرچەمەو دڵی
شەپۆلە   شانۆ   براکەو  بڵی

پای سوورە چنار سەر کەرۆ جە سەر
وەرەتاو، نسار هەردوی گێرۆ وەر

تا چەمەو ماڕۆی جوەش نەواڕۆ
جیای سەرناوی بەنگاکەیش واڕۆ

قەڵوەزە پێکۆ حەوزوو ماساوا
بەشش کەرانێ جیای ئاساوا

تا چەمەی سلۆر  پڕۆ بنوەزەن
هەتا  نازارێ   وەفاشا  مەنەن

با مێخێ بەلوەی باوە بە ڕاگا
ئازیزێ  بە یا    وەزارێ دەگا

تا وێشە  شنەش یاوۆ  هەسارگا
تا جوەو   هاڵی بیاوۆ    ڕەزگا

تا مزگی سەفەش پەڕ بۆ جوانێ
پەنج فەرزە کەیشا چاگە کەرانێ

حەقما ئەر واچوو ئەنتەهوور چێشا
گرڐ کەس بەهەشتش وەتەنوو وێشا

تا قەڵا  گەوران مدران بە پاوە
بڐیۆ   قەڵاشان  بە تەمەناوە

هەورامانەکەم زەیڐەکەم داریان
جە یاڐم مەشی دڵم نەواڕیان

ئەر ئاوی یاوۆ  پردەو  یاروەیسی
پێسەو  ژەرەژێ  گنی  قەفەسی

ناڵەو مەزڵوومیت نەیاوۆ کەسی
ڕات وەنە بڕا پێسەو بنبەسی

ئەر  وارانت  بۆ  بە ونی و هەڵسێ
سەرەت ناری وار پەی هیچ ناکەسێ

بزانە  هەنت  تۆ    فەریاڐ  ڕەسێ
حەر ئاکەسەنە کەسوو گرڐکەسێ

فەیسەڵ تا مەنەن کەسوو کەساو تۆن
جەخاکی چەنە حەر  نە پەناو   تۆن

سەرچەمەی پاکی ئەوینەم داریان
تەڵا، جەواهێر،    نگینم،   داریان

هیوای دڵەکەی خەمینم    داریان
بەهشتێ سارای  زەمینم   داریان

پاسەشاواتەن قەدٚیمی یاران
داریان بەعەتروو گوڵاو داریان

ئەر کەسێ  بەیۆ  بە سەر  مەزارم
گۆش دۆ بە ناڵە و  زکروو هاوارم

ماچوو زەیڐەکەم ئەی وەشەسیام
من خاکوو تۆنا کەی جە تۆ جیام

ئەر سارای مەحشەر سەر باروو نەبەر
بزانە  هەواو  تۆم  کەوتەن  نەسەر




#فەیسەڵ هێدایەتی

نەژناسیا!

        ئەژنەویت
               واران
        ئاسمانش تا لاو داروو کۆڵانەکێما کەرد دوێ هەنگامێ؟

گەڵا خاو بیوه سەر بە سوجده...

شێعره شنیا

    کێ ماچۆ
کناچێوه چن جارێ
                بەخێڵیش
                      بە ڕووتە
                            لەقیە نەبەردەن...


#مەهوەش درۆستکار

تۆ مەزانی پەی چەماو تۆ چننە پی بانەو مەنا
پێسه دەسماڵێ تەڕی چەم بەستە تەیمانەو مەنا

چن خەمێ ئامەی و لوەی دیوانوو شێعراوشاعێرا
ئننە من خەمبار و تەنیا شێعروو دیوانەو مەنا

تا دەسم یاوا فڕەم دا ئاهوو ناڵەو حەسرتم
حەر بە ئاه و ناڵە وە پا دارە بێ گیانەو مەنا

تازەبارم که‌ر
دٚە بێ پەی شاروو چینوو زڵفەکات
کێشیا دیواروو شەرمی و من بە تاوانەو مەنا

رۆجیارێ کەوتە بێ به‌ینوو من و مانگەو خۆوای
من بە هەرسی دڵ ونینێ هەر به عاسمانەو مەنا

داخۆم ئێ پایێزە مەیلوو تۆ پەڵەو عەشقی نەدۆ؟
سا بییۆ پەی گرد کەسی من حەر بە وارانەو مەنا

مەویەروو چا به‌ختە پیسێ کەوتە کۆساروودڵیم
تو وەهارت کەر
دٚەنە و  من پێسە زمسانەو مەنا


#فەرید عەباسی(فەراز)

تۆ ولێنی پەی وەهاروو دەشتەو بێ نازەو دڵیم
شەو چراوێنی کە دایم ڕۆشنە و پڕکارەنی

من خیابانێ وە تەنیا چۆڵەڕایێ مانیا
تۆ هه‌وارێ پڕ جە شادی و پەڕ گوڵ و گوڵزارەنی

ساعەتەو ژیو
ۆ ئەمن وەختێنە تۆ وینوو بەچەم
دەی مەزانوو تۆ چەنێ چی بەحسیە بێزارەنی؟

کافری ماچا، هەر ئینەن ، بەرکەری مێمانەکەیت
من کە ئامانێ ئەرجیام ئەننە مێمان دارەنی؟

مانگەنی یا ڕ
ۆجیارێ،  یا کە ساوێ باخەنە
کەس مەزانۆ بێژگە من تۆ چن گوڵێ نازارەنی

من قەرام هەن چەنی زۆڵفات ئه‌گەر بازۆ خەزان
ئاخرش کۆشیەو بە ئەشقیت ئننە تۆ دڵدارەنی

بێ کەس و تەنیا مەتاو
ۆ بەر بەرۆ چی شارەنە
لاچەمێ ب
دٚیه کناچێ ئننەچی وێ شارەنی



#فەرید عەباسی(فەراز)



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، موحەممەدره‌شید ئه‌مینی، فەرید عەباسی(فەراز)، بێهرووز محەمەدپوور(شارۆ)، مامۆسایاوه‌ر هه‌ورامی، مامۆسا عەدەمی(مه‌جیدبه‌گ هێدایه‌تی)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه(نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی (زاغمرز-زینوند-حسین‌آباد-امیرآباد) هورامی های شمال ایران) عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،که‌له‌به‌روو شێعرا(5)،
نوشته شده در تاریخ سه شنبه 16 آبان 1396 توسط همایون محمدنژاد
.: Weblog Themes By Abdollah Habibi :.