هورامان هانه به  رچه م

زەرۮەخوێوە پیایانێ و باقێوە حەز

(بۆنەو چاپوو کتێبوو ویەرۮەو ئەدەبیاتوو زاڕۆڵا نویستەو ئێبراهیم شەمس یەوە)

:کاکه ئۆمید حه‌بیبی


زەرۮەخوێوە پیایانێ و باقێوە حەز

(بۆنەو چاپوو کتێبوو ویەرۮەو ئەدەبیاتوو زاڕۆڵا نویستەو ئێبراهیم شەمس یەوە)

وەڵینە:

حەشاش چنە مەکریۆ هەر ئەوەژڵێویایێو ژڵێونەرێوش هەن و جمنەرێو بۆ نوونگەو جووڵەیش.ئەر پەلێ ویەرینی دەیمێوە و ورۮێ بیمێوە گنۆوە سارا پەیما کە پەی فاڕای،ترۆق و ئەرەجمای ڕەوتیوی تازەی کەس یام کەسانێو بیێنێ ئامیانوو گرسایش،فەرهەنگوو هەورامانیچ چی قسێ بەری نیا.ویرمەندێ و گەشاوەزێ فرێ بیێنێ وێشا پێتەنشارە تا لاسامێ و تەڤەرگە ژووڵێ هڕووموو ناحەزا و نەیارا وەرێژ نیاڤنۆ لاو ئەۮا گەورێشا کە وەڵاتشا بیەن و ناسەنشا خاکشا بە تۆرەکە بەرا ئێتر چ بیاڤۆ لاو فەرهەنگیشا.جە باڵوولی ماهی،بابا لۆڕەی لۆڕستانی،دایە تەورێزێ هەورامیە و بابا یادگاری هەورامی و قەڵاو ئەدەبیاتوو هەورامانی مامۆسا مەولەوی،مامۆساو خەزان و خەزان دۆسی بێسارانی و پیروو پێڕۆ ئەڤین و عەشقی مامۆسا سەیدی گێرە تا فرەزانێ سەرەوەختوو وێما کە ئەرکە قۆرسەشا بە شانازیەوە نیا سەروو شاناشا تا نەوێ دماڕۆ بەروبوومیما کێبیەی وێشا ویرشا نەشۆوە و جە ئاستیوی وەرهەڵاتەرەنە بەشێو جە میراتوو بەشەری پارێزیۆ.

یۆ چی وەشەویسا شەوەش نیەینە سەروو ڕۆی و خجڵیانەنە خزمەت بە ئەدەبیاتی هەورامی ئێبراهیم شەمس ا

دلێنە:

ئێبراهیم شەمس یۆ چا نویسەرانە کە چی دویەر ساڵەنە ئانە کریابۆش پنە جە ئەرەنیای و گێرتەی گلێرە و هەمامەکا بە تایبەت جە شاروو پاوەینە تا ئەرەمەرزنای هەنجۆمەنێو بە نامۆ نەسیموو فەرهەنگوو هەورامانی کەرۮەنش.کاکە ئێبراهیم کە وەڵتەر دوێ ڕازێ زاڕۆڵانێ دەمواچێ هەورامیێش کەرۮێبێنێ بە دوێ کتێبە داستانێ "تیتیل و بیبیل " و "مەتیلێ و کتەکێش".ئیجارەیچە با شارەزایی تەمامەوە زاناش کە بنەڕەتوو ئەوەمەنای زوانی، هەسەمیش و ڕێخێ بەرۮەیش دلێ کۆمەڵگایەنە فێر بیەی زاڕۆڵەکان و ئاشت بیەیشا چنی زوانوو ئەۮەیشا بەتایبەت چی زەمانەنە کە فەرهەنگێ زاڵێ پنەشا وەشا فەرهەنگێ بێ پەرۮۆچێ پێسە فەرهەنگوو هەورامی دلێ وێشانە تاڤناڤە.ئەدەبیاتوو زاڕۆڵا لاو ئەدەبیاتوو دەوروبەریماوە فرە کۆنە نیا و جە هەورامانیچەنە چاۮیشا فرە فرە تازەتەرا و ئێبراهیم شەمس یەکەم کەسا کە سەروو ویەرینوو ئەدەبوو زاڕۆڵاو هەورامانی منویسۆ.کتێبەکە 86لاپەلێن و نویسەری کەرۮەن بە دوێ بەشێ نەزم و نەسری.نەزم 9 بەشێن و نەسر 3بەشێن جە لاو وەڵاوگەو زایێڵە یوە چاپ کریان.نویسەر بە ژیری ئا شێعرێ،لالایێ،گەمە شێعرێ،داستانە شێعرێ،مەتەڵێ کە تا ئیسە جە ئەدەبیاتوو هەورامانیەنە چاپێ کریەینێ ئارۮێنێش و متاڤی واچی کتێبیوی هازدار و قوەتش پێشكەش بە کتێبیانەو هەورامانی کەرۮەن.


هه‌ورامان هانه‌به‌رچه‌م

ئەنجام:

بە باوەروو نویسەری ئی کتێبە متاڤۆ بۆ بە بنەڕەیوی هەسەم پەی دەسپنە کەرۮەی ڕەوتیوی جیاکار جە هەرمانێ ئەدەبیێ پەی زاڕۆڵە چەم نەخشینەکاو مەحاڵەکەیما چوونکەتی زوانیوی کەم هاز پێسە هەورامی یەکەم زاڕۆڵێ فێرێش با تا پەڕەدڵ پاریزیۆ.

ئۆمید حه‌بیبی – نودشه‌ 2-9-1396




طبقه بندی: فرهنگی و هنری، اجتماعی، ادبیات/شعر، زوانی هه‌ورامی، ئێبراهیم شه‌مس، ئۆمید حه‌بیبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه(نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی (زاغمرز-زینوند-حسین‌آباد-امیرآباد) هورامی های شمال ایران) عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،زەرۮەخوێوە پیایانێ و باقێوە حەز(بۆنەو چاپوو کتێبوو ویەرۮەو ئەدەبیاتوو زاڕۆڵا نویستەو ئێبراهیم شەمس یەوە):کاکه ئۆمید حه‌بیبی،
نوشته شده در تاریخ چهارشنبه 8 آذر 1396 توسط همایون محمدنژاد
.: Weblog Themes By Abdollah Habibi :.