هه‌ورامان هانه‌به‌رچه‌م

قەڵخانی: کاکه مه‌هدی ئه‌بری(هه‌ورام)


قەڵخانی


پەنج شەمە
چننە ڕۆیە جە بوومەلەرزەکەی ویەردەن ،تاقمەو وێبەخشە مەدەنیەکا کەلوپەلشا یاونان بە خەڵکوو سەلاسی و کەمپەکەشا واڕەنوە پەی ئەزگەلەی .یاواینێ پادیشایچەرە .
فرە دڵوەشکەر بێ ،بەڵام وەویریە دڵمەنە بێ ،داخۆم وەزعەو یارسانەکا چەنیە بۆ؟
نەکەوتێبا پەشتەو گۆشی. چەولاوە شێعەکا و چیلاوە سنیەکێ ...نمەزانوو .. فکر نەکەروو.
لوانی نزیکوو یۆوە جە هەرمانبەرەکا و پەرسام چەنەش ،ئەرێ وەزعەو یاریەکا؟
دەسش کەرد دلێ کاغەزەکاشەرە و واتش هەشت دەگایشا هەنێ تا ئارۆ کەس نەلوان ڕاشا دوورەنە و سەخڵەت،تەنیا مەگەر بە پانکی، دووێ دەگایچشا قەسی نیم ساعەتێ مەر پیادە . ئێمەیچ پانکیما نیەن .دلێ کەمپەکەینە دیار بێ ورکەو ئادیشایچ ئا چننە دەگانە.
دەمەو وێرەگا هەواڵیە وەش یاوا دەسما .کاروانیە پانکیێ هەنێ ڕاوە.گردیما دڵوەشێ بیەیمێ .
جمعە
ساعەت دوانزە کاروانوو پانکیەکا یاوا وەروە ،گردی لوایمێ پێشواز ،وەختاریە زانام هەورامیێنێ فرەتەر دڵوەش بیانی ،بڕیەشا شناسێنا جە وزع وەشەکا و دەوڵەمەندەکا و پیا ماقوڵەکاو مەریوانی بێنێ . ناستشا قسێ کەروو ،حاجی... واتش ؛کاکە ئێمە بە دڵ و دایە ئی کەڵووپەلمانە ئەسەن و گەرکمانە بە دەسی وێما بیاونمێش دەسوو ئا کەسانە کە بە ڕاسی مۆحتاجێنێ .
واتم ئێمەیچ ئانەمانە گەرەکەن ،کەمیە ئیسراحەت کەردێ با مانیایتا بەربشۆ ڕاکێش کەمیە دوورەنە. یۆوەشا واتش کاکە خۆدای کەردە دووێ ڕوێ ڕا بۆ ئێمە پەی ئانەیە ئامێنمێ .
چننە نەفەریە جە ئێمەیچ وێما ئامادە کەرد بلمێ چەنیشا و یۆوە جە کوڕەکا نەخشەو ڕاکێش دا پەنەشا و واتش ئینە نەخشەو دەگایەکاو یارسانین با پەنەتا بۆ .
بۆڵەبۆڵیە کەوت دلێشا .یۆوەشا واتش پەی قەڵخانیاش بەرمێ ؟
واتما ئەرێ .
دلێچەمایەشا ترشنا و ماچا ؛نمەلمێ .
هەرچیە تکاما کەردە بێ سود بێ .
من پەی پینە کەردەی و ئانە کە فرەتەر تەرێقوە نەبوو، واتم کاکە هەقشانە ڕایە فرێشا بڕیەنە  و هێلاک و نابەڵەدێنێ ،با بارەکەیشا گێرمێرە ، تازە واچمێ چێش دمایی فکریەش پەی مەکەرمێ .بەڵام پاسە دیار بێ لاو ئادیشاوە ،هەر ئانە کە ئێمە ویروو یارسانیەکانە بیەنمێ کفریە گەورە بیەن . واتشا وەڵا ئێمە بارەکەیما نمەوزمێ هۆماروو شمە ،مەبەرمێشوە مەدەیمێش مزگی جوانڕوی یا سنۆقوو سەلاحەدینی .سواروو پانکیەکاشا بیێ و گێڵایوە .
بوومەلەرزیە پیس بێ ،وشکش کەردیمێ .یۆوە جە کوڕەکا تەموەش دا دیواریە وڕایوە و تێر گرەوا .یۆوەتەرشا بڕیە دژمانێش دای و پیادە کەوت ڕا و قێڕنێ شەرتەبۆ هەر ئارۆ بە کۆڵێ وێم چێوشا پەنە بیاونوو .وەڵێما گێرت و دڵوەشیما داوە ،دڵوەشی وێما داوە .
کێ ماچۆ کەسانیەتەر نەلوایبا خۆ تەنیا ئێمە نیەنمێ ،دەوڵەت حەتم یاوان فریاشاوە ......
ساعەت پەنجو وێرەگای هەواڵشا دا یارستانیەکا وێشا کەمپیەشا نیانەرە و فریاشا کەوتێنێ .

شەمە

ساعەت دووێ نیمەشەوێن.
دمالەرزەو کەردەوەو هام زوانە وەشەویسەکام مەژگش شڵەقناینا ،نمەزانوو ئینەیە چکۆگەو تاریفوو ئینسانیەتینە ڕا کەرووە !؟.

#مه‌هدی ئه‌بری(هه‌ورام)




طبقه بندی: فرهنگی و هنری، اجتماعی، ادبیات/شعر، تاریخ، زوانی هه‌ورامی، شهرها و روستاهای هورامان، دینی ومذهبی، مه‌هدی ئه‌بری(هه‌ورام)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه(نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد) هورامی های شمال ایران) عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،قەڵخانی: کاکه مه‌هدی ئه‌بری(هه‌ورام)،
نوشته شده در تاریخ پنجشنبه 30 آذر 1396 توسط همایون محمدنژاد
.: Weblog Themes By Abdollah Habibi :.