که‌له‌به‌روو شێعرا(6)

خەزان  نیشت  باڵێ و هەوارێ چۆڵێ
بێ نازێ کەوتێ   ،   هاناوێ و دۆڵێ
هۆبێ  خەمینێ  و  کەپرێ  پەرێشان
تازیە  بارێنێ   ،  پەی کۆچوو یاران

#موحەممەد فه‌هیم

شەو بە ئاخەوە
سەربنیەو سەرین شەو  بە  ئاخەوە
شــەوگاربی تەمام دڵ  بە  داخەوە

سەد٘ای ڕەعـدئاسای ناڵەی  دەروونم
ئەسرین وێنەی سەیل بە چەخماخەوە

دید٘ەت چوون سۆسەن ڕەشتەی ئێلاهی
زوڵف دەســـــەی چنوور جە ئێڵاخەوە

بۆی عەتر  گۆنات  گوڵ   جە   ڪۆساران
سیاوڕێحانــــــەن بە    ڕووی  شاخەوە

شیرین    ئەرمەن   گوڵباخی    خۆسرەو
فـــەرهاد٘   شی وە   باد٘ هەر  بەداخەوە

ڪەس نەد٘یەن بەی تەور  شەمامەی کاڵت
یالیـــــــــمۆی زەردت جە هیچ باخەوە

شێخ   و   مۆرشید٘م   دڵوەشیم    تۆنی
پـــەنجەی   حەنائیت  وە   بەید٘اخەوە

چوون سیم خاردار  ڕای  ئامام   بەندەن
مــــــــ ـەگەربەفرسەت ڕای قاچاخەوە

فەڵەك چوون حەرەس هەر  پەی من ئازان
مـــەگێــــــــڵۆم بە شۆن بە چۆماخەوە

نیەن  هامفەردەت  بە  ناز   و  شەوڪەت
بە لارە و لەنجـــــــەو  بەی   دەماخەوە

وەلی   دێــــوانەم   وێڵم    جە  شاران
جە   سەقز و  بانە   و    جە   سابڵاخەوە

بۆی ڪەباب جەرگ سینەی سیای وێم
ڪـــزەی چزەی سێخ گۆشتی چاخەوە

هەرگیز جە ڕای تۆ من سەر  مەپێچوو
ئەرســــــــەرم بد٘ان  بە تۆخماخەوە

(سەعد)خۆ نەمەرد٘،پەی مەینەت مەندەن
 با هــەر بمانـــــۆ، هـــــەر بە ئاخەوە

#میرزاسەعدوڵڵا خەدیری

کە ماچۆ گیانم، ڕۆحم فیداش بۆ
وجوودم یەکجار شێتوو لچاش بۆ

دەمێوەن ئەشقش ناخمەنە نۆقما
خوا تا مەحشەر سۆزم وە پاش بۆ

کە ماچۆ کەسم، دنیا گرد کەسا
بەشکیم تا بمروو ویرم نە ساش بۆ

"شارۆ" کە دایم بە چەماش مەسا
کەی ئاوات وازۆ باخوو ڕەزاش بۆ؟

دڵەم ڕۆخسارش یەند گەزۆ پۆشا
 شیرینی دنیای گەردێو جەلاش بۆ

وەشڵەی بوو دارێو  جە حەوشەکێشا
هەمیشە و دایم چەمم چەماش بۆ

پەی وەختوو پیریش کریەونە عەسا
گجار گەردەنم نە تۆی دەساش بۆ

 کابەم یانەش بۆ وەسیەت کە مەردا
پەنج فەرزە نێگام ڕوو ئەو نماش بۆ

ئەر وەڵتەر جە من زمسانش پۆشا
یاگێو گڵکۆش بۆ کە دایم واش بۆ!

 بۆش بدۆ دەماخ بۆنە بە یاسا
ڕۆح چەنی ڕۆحی مەحشەر وە پاش بۆ

تاوانوو ئەشقیش گێروو وە باڵا
جەسە و ڕۆح نە جاش ئامادەی هاش بۆ

وە هەر مەکرێو بۆ بکیانووش ئەعلا
ژیوایش وێنەی ڕووش پەڕ تەجەللاش بۆ

من هەر بە خەیاڵ دڵ مدەو جەلا
 خەم گێروو گیانم ئادە سەماش بۆ

#ب.م (شارۆ)

سڵام هەورامان
 من بێدڵ جه گوڵدانوو شێعرەکامەنه چەپکیه شێعرێ ئاراستەو وانیارەکاتا کەروو.  

 قیبلەم خەیاڵت  قیبلەم  خەیاڵت

ئارۆ هەنگی دڵ کەوت نه خەیاڵت

باڵش هەوا دا به  شقی  جەماڵت

تا  کەروو دید٘ار  وەسفی  وێساڵت

بشنیوو جه شەوق دید٘ەی غەزاڵت

بنوشوو که  زۆی  شێوەی  کەژاڵت
 
سەیر کەرۆ باڵای عەرعەر  میساڵت

وێش کەرۆ ئاوێز  زوڵفی تاڵ  تاڵت
 
بارۆ     ئاوارەی    بەیانی    کاڵت
    
بنیشۆ نه سەر  هەوری  و حەگاڵت
 
باوەشین  کەرۆ  سیمای  پڕ  خاڵت
  
دەور وەرۆ نه دەور قەد٘ی شەمشاڵت
 
سەما کەرۆ چوون  بازنه و  خڕخاڵت

تیرەشان   بدۆ   نه  سای  هەرزاڵت
 
شیرین کەرۆ شان چوون لەبی لاڵت

سەرمەست بۆ جه عەشق دووگۆنای ئاڵت
 
ڕەنجناش  هەنگی  دڵ  تۆزی   شەماڵت

مەحرووم بی جه سەیر باخچەی  گوراڵت

"بێدڵ"    مەکەرۆ       دوعای    زەواڵت

 یاخود٘ا   هەر  بەرز  بۆ  بەرزی  ئێقباڵت

نەشێویۆ   شێوەی    شیرین     کەماڵت

#
هاشم موحەممەدی (بێدڵ)


چنیم نەرگسی مەس دڵ کەرد٘ش هەوەس
 کەوتا  یاد٘وو  تۆ   پەیم  پەڕ   نەبی  دەس

#حەسەن خەیات

من  و   پاییز   ئێشەو   دوێ  دڵدارێ   بێ قەرارێ
دوێ دڵێ بە خەم پیکیای دوێ لاشێ پەڕ جە ئازارێ

هەر   دوێما   چه‌مەڕا   و  بە  تەما،    تاسەو دیداری
ئاد٘ پەی شەوەو چلێ وێش و منیچ پەی دید٘اروو یاری

عەجەب جیایێ  سەختەن   بەینوو  شەو چلێ و پاییزی
سەخت تەر چانەی چەمەڕا بیەین پەرێ دید٘اروو ئازیزی

ئێشەو شەوەو چلێ ماچاش درێژتەرین شەوەو ساڵێ
من گرد شەویەم شەو چلێنێ رفێقێم   هەناسێ کاڵێ

#سەیوان_ئێبراهیمی


مەتــــــەڵ 
دەسماڵی ئەڵوەند  ،  حەریری کاشان
هەورێشمی‌چینی ،حەڵقەی زەڕنێشان

پاڵتاوی کشمیر، کڵاشی هەورامی
ڕانکی هەجیج ،  لیرەی عوسمانی

گەوهری شاران ، عەقێق جە یەمن
مێزەری حێجاز ، نە  تن  پوشیدەن

گرد٘ین وە ‌یەکجار،باوەرین وە هەم
کڵافی ئەند٘ام، چوون شەهنشای جەم

نە تن بێ‌ئاوەز ،بەد٘عەسڵی نەفام
پۆچ و بەد٘کەلام ، سەرسام سەرئەنجام؟

بێ‌هونەر ،لاواز ، بەرەڵاو ناحەز
بە‌ جل و تفاقی تن ، نمەبۆ بە کەس

جل و ‌تفاقی شڕ ،پینەی سەد٘ تیکە
 پەی عەسڵزاد٘ە ، مەبۆ ئەنتیکە

بەد٘عەسڵ بە جل ، نمەو عەسڵزاد٘ە
جل پەی نا نەجێب ، ڕەنجی بە باد٘ە

بێ‌جل وتفاق ڕوڵەی،عەسڵزاد٘ەی ژیر
جلێ پینە،بە فامم مەکەروون حەریر

دێگناڵ و حەریر ،نماوەرو مەردی
بە کێشانه نیەن ،مەردی و نامەردی

#جەواد ـــ فێـــراق پاێگــەلان

 ئاگــــوڵە چـنوورە تۆ کـــــــەرینەش بۆ
پەروەردەش   کەرد٘ەن    سەنگی    سیا کۆ

زوانش لاڵا حـــــــــــەنناش  عەتری  نۆ
خالقش  خود٘ان  حـــــەمدت  ویر   نەشۆ
   
      # یاوەر هەورامی



طبقه بندی: فرهنگی و هنری، اجتماعی، ادبیات/شعر، تاریخ، اخبار، جفرافیا، زوانی هه‌ورامی، شهرها و روستاهای هورامان، ده‌گاو زاوه‌ری/روستای دز‌آور، تصاویرومناظرطبیعی وتاریخی، دینی ومذهبی، موحەممەد فه‌هیم، بێهرووز محەمەدپوور(شارۆ)، یاوه‌ر هه‌ورامی، میرزاسه‌عدوڵڵا خه‌دیری،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،که‌له‌به‌روو شێعرا(6،
نوشته شده در تاریخ چهارشنبه 6 دی 1396 توسط همایون محمدنژاد
.: Weblog Themes By Abdollah Habibi :.