مەریوان و هەورامان


خەیاڵ وێنەی مەل هەر نە  پەروازەن
هەمڕای ئەو خەیاڵ،سەوت و ئاوازەن

خــــونچەی دڵ لانەی خەیاڵانی خاو
مەیان مەویەران  وێنەی  جۆگەی ئاو

دەروون وێنەی دەشت نەحیەی مەریوان
دڵ قەڵای ئەسڵی قــــوللـەی  ئیمامان

جە سەر قــــــەڵاوە خاس تەماشاکە
وەشی جەو وەشتەر،سەد ٘جار حاشاکە

گۆمی زرێبار مەوج  مەد٘ۆ وە هـــەم
وێنەی چەمەی چەم  بێ زیاد٘ و کەم

قاز و مراوی ، لەق لەق  و  ســــۆنە
بەت و ماسا و چین  مەگێڵاش  پۆنە

ئەر پەی تەماشای  ساتێــو  بنیشی
جە سەر تەپەی قەبر وینا دەروێشی

دەشتی مەریوان  چوون  لالەزارەن
لای جـووجەسازی  و کانی  دینارەن

هــــــەردوونژماری ، لاو دەرزیانی
بالک و مـــــــڕگ ، هەتا  شارانی

ناحیــەی جنووب  باوەری  نەزەر
کۆساڵان چەنی  بووک و کاڵیسەر

ڕشتەکۆی بۆڵەند جە دوور دیارەن
کەلی عاشقان، یا مێـــــرگەوارەن

واوەی دەور و بەر قەڵاو وەر قەڵا
قـــەبرووئیمامی داربەلوو و گەڵا

ڕێخـەڵان، چەنی هەر دوێ  کاڵێ
وەیسە و سیاناو چەودیموو  یاڵێ

ولــــــەژێر نزیک بە کەڵکەجانی
نێێ و دۆڵاش،چەنی کانی سانانی

دەرەتفێ وسەردۆش میراجی بەرزەن
بەناوکـــەماولۆ،گــوڵ هــەزارتەرزەن

ئێبراهیم یانێ کابل مەشهوورەن
پیرسەفانزیک،ئـەند٘ەکێو دوورەن

کانی سپی هەتا دەگاوئینگیجەی
تابەردەڕەشە،مەزرەعەو وێنجەی

جە کانی میران  هەتا سەد٘ائاوا
باشماخ، بایـــەوە، نەبیەنۆ  ئاوا

ساوجێ وکیکن و خاو و میرائاوا
تاحەفتـەوانەی لای  جەژنی ئاوا

قــــەڵای قەد٘یمی میرزا میران شا
فەرمان ڕەوای دەور، ساحێب بارەگا

ملەی کۆترکۆژ،بەرزی قـــووچ سوڵتان
سوورێن ڕووبەڕووی ئەسکۆڵ وپیران

کەماجەڕ چەنی مەهدی و عەود٘اڵان
قولەی پیر ڕۆسەم، گۆزەرگای ساڵان

گـــــۆزەڵی و بەد٘هۆ تا قەڵاخانی
جە کەلووتەتەی  تا  تەختووسانی

کەلووگــــــۆڵیجێ،گوڵەچنووری
تەماشاودەشتی پەی شارەزووری

خۆڕخۆڕە و هەیات لای سەڵوەکاوەن
داڵانی وەشتەر، هـــەوارگە و  ئاوەن

لاکــــــەرەلاو وە ڕووی کۆساڵان
ڕووبەڕووی بەند٘ۆڵ،دەربەن دواڵان

ئێــرتێفاعاتی  کوڕی  میانە
بەرزی  هەجمنە، پیازەن ئانە

یاقـــەلەبەردەن هەر جە دوورەوە
وەسڵەن بە  مەرتەع  بلچەسوورەوە

یاحـەسەن بەسەر، یا چلەخانە
مەرتەعی ئەسڵی  چۆڕ و ئاڵمانە

ناحیەی نشکاش، دەری وبلچەسوور
ناوتاقی گـــاڕان دیارەن جە  دوور

مەحاڵی سەرشیو ، هاڵەکـۆکانەن
یا بەردەڕەشە یا  تووەسوورانەن

ئینە من واتم  گرد کۆسارێنێ
جە سەرقــەڵاوە گرد دیارێنێ

مەریوان وەشەن هەر بەو بۆنەوە
بە هـــــەورامان و بە لهـــۆنەوە

گرد برای دینی شان بە شانەوە
ناوچــەی ژاوەرۆ، بە شامیانەوە

خود٘ا نەشێونۆ  ڕۆزگارێ  خاسا
ئیسە وڵاتما بێ دەنگ و باسا

"سەعد"پیرەمەرد، وامەند٘ەی دەوران
بەزوان هەورامی،شاعێری گــــۆران

یاسای قەد٘یمی نەشیەن جە یاد٘م
لیباسی ڕەسەن ئابا و ئەجـــداد٘م

خۆد٘ابۆحافێزکـــــــــۆتایی کەلام
سەڵوات بە ڕەسوول(عەلەیهی سەلام)

#میرزاسەعدوڵڵا  خەدیری



طبقه بندی: فرهنگی و هنری، اجتماعی، ادبیات/شعر، تاریخ، جفرافیا، زوانی هه‌ورامی، شهرها و روستاهای هورامان، تصاویرومناظرطبیعی وتاریخی، میرزاسه‌عدوڵڵا خه‌دیری،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،مەریوان و هەورامان:شێعرێوە جە مەرحووم میرزاسەعدوڵڵای خەدیری،
نوشته شده در تاریخ شنبه 23 دی 1396 توسط همایون محمدنژاد
.: Weblog Themes By Abdollah Habibi :.