تبلیغات
هه‌ورامان هانه‌به‌رچه‌م
که‌له‌به‌روو شێعرا(11)


پێشکەش بە برای کوچ کەردەی
         موستەفازادە


هارەیێ بێ سامان ،چەۆاشەی چەپگەرد
بازجە هەورامان شاناش مورەیێ نەرد

مورەیێ شیوەنو ماتەمو هاوار
وست نە هەورامان، بێ پەروای غەدار

خاکی هەورامان ، کەرد وە یانەی خەم
بڕیش وە باڵاش سەنتوری ماتەم

بێ ڕەحمیش یاونا ، دەرەجەی ئەعلا
خامەش جە پەنجەی ئاوەز کەر جیــا

زانای ئەلف ولام بەرد نە تویێ گۆڵکوو
شعوری نەسری ، هەورامانم  ڕوو

نوسەری ژێرو ، ئاوەزدارم  ڕوو
فەڵەک هارەکەت لەتار لەتار بوو

تانو پۆیێ شێعرو نەسری هەورامان
بەردش وە سەرایێ مەولەوی نامان

سەر بەرد وە سەرایێ شاری خاموشان
بی بە ساحێب خەم ، هەورامی زوان

ڕەحمەت وە ئەو جا، ئەو‌سەراو مەکان
بەهشت جاگەت بو ، ڕوڵەیێ هەورامان

جەواد  ــ فێراق پایگەلان
  

‍ ئینەنە   جەفاو     دنیاو   بێ   بەقای

سەیاد٘ێ    لوای   ،   کـــۆڵیتێ   وڕای!

نە ژەرەژ  مەندەن ،نەدامگە  و  کۆڵیت

داخی  داخانم   وەتەن  پەی  چۆڵیت!

#سۆهراب مورادنیا

لەرزاو دەسەکام مەجاڵشا نەد٘ا  

هۆرگیروو قەڵەم کەروو سکاڵا  

بنویسوو پەی چێش ئامام به دنیا  

دنیایه هیچه پەڕ  جەور و جەفا  

غەیر جه مووسیبەت نەد٘اش وەشیما 

نێشی ژاراویش گەستەن ئازاما  

مەینەتان کۆکۆ جەمەن جه لاما  

سۆچیان یەکسەر ڕەگ و ڕیشەما  

سەد٘وەشڵەیم بەوکەس کۆچش کەرد لوا

خەلاس بی جه دەس مەینەت و سزا  

" ناسر"بێزارەن وەی حاڵ و هەوا  

دەروونش کەیلەن چنی زوخاوا  

#ناسر ئەخدەر

هەر کەسێ  ژەنی به  کەم بزانۆ
هیچ و پووچارێ هیچیچ مەزانۆ
چن جارێ  واچیان  بابا با بانوو
کام ئەولیا پەرێش خەم نەکەرد٘ زانوو
مزگانین  پەی  تۆ  من  ئانەی زانوو
خاستەر  تۆ  چینەی زانی من وانوو

#حەسەن خەیات
قیمەتوو دنیێ من مەد٘ەوت ساقی
مەر  ئەولایچ  ئاننە بد٘امەو  باقی
کارم نیا  لەونێ  کەرامەو  تاقی
ئەر بڕات چەنەم پێسەن مەراقی

#حەسەن خەیات
نەققاشی وەرزان دانای کردگار
ساحێبی هامن ، پاییز و  وەهار

بەرگی کافووری کەش و کۆ پۆشان
بەرزی  ئێڵاخان جامی یەخ  نۆشان

شەختەو سیاوا جە سەر هەواران
ڕێزنا   گەڵا     و    کەپرەو نازاران

کرێڵەو یەخ و کەپرەو هەواری
مەژەنۆ  نەواو  دووری دڵداری

مسگەران ئاسا سەردی  زمسانان
سفیدش کەردەن باڵای کویسانان

قەڵەم قاسرەن پەی وەسفی زمسان
ماشەڵا جە سێڕ  کەسی بێ  کەسان

بە تایبەت ماوای هەورامان وەتەن
چ خاس دڵگیرەن  زمسانی  بەنەن

ئەر  کوردەواری بۆ  کلکەوانە
پێسەو نگینەن ئی هەورامانە

#سەیوان ئێبراهیمی


وەتەن
شەرتەم کەردێنه وەتەن چەنی تۆ
هەتاکوو  ڕۆی  سەرەم  زیند٘ه  بۆ
جەسته و تەن و گیان گر فێدات نەبۆ
زامش کاری بۆ دایێم کەرۆ  سۆ
هەتا چەمانم هەشت وینان به نۆ
ئەگەر نەکەران شیوەن و ڕۆ ڕۆ
مەحرووم بان جه عەین نەوینان تاپۆ
کۆر بان به جارێ  لێڵاویشان  بۆ
تا نووکی قەڵەم جەوهەر کەرۆ جۆ
پەرێ سەربەرزیت شەرتەن بنویسۆ
زوان تا ئەو ڕۆ کەرۆ گوفت و گۆ
ئەگەر پەی بەرزیت وه بەرزان نەچڕۆ
جەللاد ئەو زوان با جه بن بڕۆ
پای نەگێڵۆ چەنیت کۆ به کۆ
وشک بۆ زرانیش فەلەج بۆ  لەقۆ
گۆش پەی شانازیت ئەگەر گۆش نەد٘ۆ
بەسیۆ دەروازەش کەڕ بۆ نەژنەوۆ
ماخۆلیانش بۆ جه چڵ نەسرەوۆ
وەتەن هەر کەسێ بەد٘یت بواچۆ
دەک ئاواره بۆ   ناتەمام ساچۆ
وەتەن خاترت گەر جه یاد٘ بشۆ
چوون دەرد٘ەداران گرد ئازام بێشۆ
ئێزرائیڵ به جێد با گیانم کێشۆ
بێدڵ تا ئەو سات بەراش وه گڵکۆ
شەرتەن بێ مەیلی نەکەرۆ به خۆ

#بێدڵ  هەورامی‌‌(هاشم  موحەممەدی)



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، موحەممەد مسته‌فازاده، سەیوان ئێبراهیمی(گوازی)، جەواد حەمزه (فێراق)، سوهراب مورادنیا(سیاوکام)، هاشم موحەممەدی (بێدڵ)، حەسەن عەزیزی(خەیات)، ناسر ئەخدەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،که‌له‌به‌روو شێعرا(11)،
نوشته شده در تاریخ چهارشنبه 11 بهمن 1396 توسط همایون محمدنژاد
.: Weblog Themes By Abdollah Habibi :.