کەلەبەروو شێعرا(۱۹)
دڵه‌ ها یاران به‌رشین جه‌ زامن
گردٚ ته‌فره‌قه‌ بین چوون خه‌یاڵ من

گه‌ردٚ کۆچشان ئانا دیاره‌ن
ده‌ک لێڵاویت بۆ چوونت قه‌راره‌ن

سه‌نگی بار هۆش، پێش بار فامت
ده‌وار شادی، چێخ ئارامت

لوان چه‌نی کۆچ خاڵۆکه‌ی هام فه‌رد
ئیسه‌ بار وسته‌ن نه‌ هه‌وارگه‌ی هه‌رد

تۆ چێش مه‌که‌ری که‌م هۆش که‌م فام
په‌ی ڕووی ڕیایی نیشته‌نی جه‌ لام

سا چه‌نی ئه‌رواح یاوه‌ وه‌ یاران
با ته‌ن بۆ وه‌ سه‌نگ مه‌نده‌ی هه‌واران
#مه‌ولەوی تاوەگۆزی

‍    زوانی ئەد٘ایی
هیچ هونەر نیەن، بە زوانی قاڵ
گوفتار تووتی وار شەقە دەی وە باڵ

چوون تفڵی نەوپا زوان  لەنگ و ڵال
هەر کەس بە جۆرێ،پەرسینە ئەحواڵ

شەرت ئانەن تاوی، زاڕۆڵەی یەکساڵ
غەیر بە زوان حاڵ ، بارین گڕ و گاڵ

بێڕاهە  نەلی ، بگنینە  چاڵی
لای لای ئەد٘ایەن،زوانوو حاڵی

شێعر:موحەممەد خدری داریان

هیچ دەرد٘ێ دەوا مەکەرۆ

ئەگەر: هەزاران ڕۆجیاری
ئاسمانەنە درۆشیا و
بەڵام
دڵوو تۆنە فانۆسڵێ وە نەخۆوۆ
دەرد٘ە مەوەرۆ

ئەگەر خەزێنەو دنیای
دلێ کۆنجوو ڕۆحیتەنە بۆ

بەڵام تۆ نەتاوی

رۆحیت گێری دەسوو وێتەو

به چه درد٘ێ وەرۆ؟

هەزار شارێ گێڵی
 بەڵام 
ڕا ئێننەو دڵۆ وێت نەبەری

به چه درد٘ێوە وەرۆ؟
سەد٘ان هەزارێ یارێت بانێ
بەڵام
نەتاوی دڵیت کەری دۆسوو وێت
.
به چه درد٘ێ وەرۆ؟
ئەگەر
جە هەر چی مرواریەو بەحرەکا
ملەوانێوە 
وەشە کەری پەی کناچێ وێت
بەڵام 
نەتاوی
دڵیت پێشکەشش کەری

هیچ دەرد٘ە مەوەرۆ

#لەتیف هەڵمەت
#هۆرگێڵنایەو :
#سەیوان ئەمینی
ویراستار:
#هومایون موحەممەدنژاد

بۆی وەهار 

بۆی وەهار مەیۆ....بۆی وەهار مەیۆ
بۆی شنەی شەبۆی مێرگەوار  مەیۆ

یاران ئەر سەیرەن بەیدێ  مێرگەوار
ویندێش ڕەنگینەن جە سەرتا بە وار

گوراڵەسوورەی   بەرزی  مێرگەوار
 دیبای حەریرەن جە سەر تا بە وار

سوورەهەراڵەش شۆهرەتی خاکەن
گیواوش  دەرمان دڵەی  خەمناکەن

چنوور و شەوبۆش عەتری وەڵاتەن
پەی  دڵی   ئاشق   یاگەی   ئاواتەن

جە مێرگەوار و هەم جە شانشین
مەگەر  عەواڵان  پاسە بۆ ڕەنگین

جە فەسڵی وەهار بەرزی مێرگەوار
جە عەتری  چنوور مەبۆ  بە گوڵزار

ئاواتە وازەن   بوڵبوڵی    گوڵزار
پەی سەیرو وەشی بلۆ مێرگەوار

سەیوان کۆتا کەر جە وەسفی  وەهار
دڵوەش بی وەشەن سەیری مێرگەوار

نەک بە وێنەو تۆ وامەنەی خەجڵ
دایێم چەنی  خەم  کەری  درد٘ەدڵ

#سەیوان ئێبراهیمی(گواز)

وەشەسیا
وەشەسیا ئینای دڵمەنە،مەکریۆم پەی بەرت ڪەروو
مەنەناوە بەکام خامە تەعریف و تەوسیفت ڪەروو
بیەنی ئامیانوو خیاڵیم بەریم ئاسانەوئەشعاری
حەیرانەنا بەکام واچە نامـە شیرینەکەت بەروو
مەحبووسی یاسای فێــراقت،پابەندی دامی دوورینا
هــــــەر وێم زانوو چن بە سەخڵەت جە دووری تۆ بە سەر بەروو
مــــەیخانەو عەشقوو یاد٘وو تۆ بیەن پەناگای خیاڵم
سەرسامەنا ئەشۆم تاڪەی شەرابی فێراقت وەروو؟!
جە مــەکەتبوو وێساڵیتنە بێ شۆکەروو مەشقووئەشقی
عاشقتەرجە هـــــــــەرمسیارێو دەرسی عاشقیت بەر کەروو
کڵێڵوو بێ دەنگی دریان سەروو زوانوو دڵیمرە
وەقــــرەم بڕیان، وەرمیچمەنە مەیاروو نامێ تۆ بەروو
وەروو تانـــەو ناحەزاوە مەتاوۆ بەونەهەوارگەت
زەوارئاسا بە تاسەوە تەوافوو ئاسانەیت ڪەروو
------------٭٭٭٭٭٭-------------
۱۳۹٦٫۱۲٫٦کۆچی ڕۆجیاری(سیاوکام)
#سۆهراب مورادنیا

دووێ کوڵه‌شێعرێ قه‌دیمیێ
1
جه‌ لێژایی سینه‌یش  گێرته‌م
ته‌نیا جاریه‌
گواریه‌
چه‌کنام جه‌ پاییزو لچاش ونه‌ هه‌ناریه‌
ده‌ک له‌عنه‌ت
ئه‌چی قماریه‌ .
2
جه‌ هانه‌و لچاش ته‌ژناییم ماڕد
و
نیگام
شیرین گلێریا لێژایی سینه‌یشه‌ره‌
نشتێ پلووره‌
هه‌ر ده‌ هه‌ننوسێم
تاموو هه‌نگوێنی نمه‌دانه‌
ده‌سێم؟
#مه‌هدی ئه‌بری(هەورام)

وەهار
یاران   مزگانی   ئامای   وەهارەن 

ئامای وەرزەکەی گوڵ و گوڵزارەن

نه هەر جا مد٘یەی سەر سەوز دیارەن

نیشانەی   خێلقەت   پەروەردێگارەن

چیا و دەشت و دۆڵ  وێشان  وناران 

قەتاره     بەسا ن    سپاو    گوراڵان 

تەبێعەت کاڵای ڕەنگا وڕەنگ پۆشان 

باد٘ەش نه جامی نەو وەهار نۆشان

وەنەوشەی وەشبۆ جه سینەی باخان  

بۆژانه و  شەوبۆ  جه  پای  ئێڵاخان

چنوور شنەشەن جه  بەرزە  شاخان  

سوورەهەراڵه سوور کەرد٘ەن  زاخان  

نەرگێس وه مەس مەس چوون دید٘ە مەسان 

مڕفانۆ نه دەس ڕۆح و دڵ و گیان  

موبارەکتان بۆ نەو  وەهار  یاران  

خەم و پەژاره دوور  بۆ  چەنەتان  

بنیشدێ به شاد٘ نه  پای  کۆساران

به کەیف و ئاهەنگ به سەفاوسەیران  

وەهاری "ناسر" ئێشەن  و   هێجران  

ئەسیرەن به دەس دەرد٘ی بێ دەرمان  

#ناسر ئەخدەر
نیەری سەربەرز تاسەوئاواتی
بیەنی شانازی تۆ پەی وەڵاتی
بە بێ  ڕیایین پایە و مەقامت
شیرین هەنگوینا مێنبەری نامت
زانشتگای عێلم و پەروردەی لاوان
تەعریفت یەکسەر پەی وەڵات یاوان
دەنگت دان وە دەنگ هەزار دەنگەوە
بە سووری گوڵان ڕژیای هوونی  ڕەنگەوە
نامت مۆقددەس سۆجدەی ئاسانە
وێنەت بێ  وێنەن  چی  نیشتمانە
ئێفتخارەنی  پەی  قەوم و هۆزت
بە کووری چەماو دید٘ەی ناحەزەت
قەسەم بە نامێ دڵگیری خاکیت
بە هەستی بەرز و مەردمی پاکیت
بە سیمای پیر و ئاهی هەناسان
ئێتر نەوینووت  بی بە  هەراسان
حەقا بە سووجدە ڕوو بە ئاسانەیت
ماچ کەروو خاک و تەوەنوو  یانەیت
هەردی کەش وکۆت سیری سەربەرزان
یادگاریەکەی     ماواو    ئازیزان
ڕوو بە مێرگەوار قامەت خەم کەروو
پێسەو  نزرگای  سۆجدە پەیش  بەروو
بشانووش وە چەم خاکی پای یاران
کەش و کۆت کەمەر  چەنی  هەواران
زرێوار داستان تەعریف فەراوان
نێشتەی نازارا جای پەنای ماوان
باسوو بێ وێنەیش جە حەد٘ بەرشیەن
دایێم   مێزبانی   یارانش   بیەن
چەنی  گەورەجۆی  ئامۆشەو  یارا
هەتا  قیامەت حەر  یادگارا
کۆڕەمریەم خەیاڵ ویەرد٘ەی جارەن
پەرێ ئازیزان چن بێ قەرارەن
نیەر تۆ قێبلەی سوجدە پەیت فەرزا
یاگێ دڵێرا قەڵای سەربەرزا‍ ‍

#خەمبار  هەجیجی

زەریـــــف  و زەردرەنگ  تۆپە تۆپەڵە
سەرەش ئاورد بــەر، بە وەشت و پەڵە

گیانش  وستەنە وەشتــــوو  وەهاری
بیاوۆ دەسوو تــۆ، هــەر پێسەو پاری

#عەتا عەلی پوور



ئارۆ دیم وە چـــەم باڵا نەمامێ
گیســوو دامی دڵ شیرین خەرامێ
پەنجەی شمشاڵیش چوون تیری تەرکەش
ئەشکاوا جەرگم بێ باک و سەرکەش
سەر ناخوون وە هوون , دڵم ناوابێ
باڵاش ,  چـــوون خەڵفی تازە ساوابئ
باهووی بێ ئاهووش , وێنەی حەریر ساف
بۆی زوڵفش چوون ، بۆی میسکی نافەی ناف
.......نــــامێ , ناسک ئەندامێ
شیرین کەلامێ , ئەتوار عەلامێ
یاقووتی ڕەنگێ , داودی دەنگێ
شەنگێ بــاسەنگێ , شۆخ و قەشەنگێ
کافر بی دینێ هیچ حاڵ نەزانێ 
عاشقان کوژێ عەرزە نەوانێ
"هەر ئێشی جە ئێش تیری ئەوکەسەن
نەجای نەشئەی نۆش نەشئەتەین وەسەن"
   11/2/2018
#خەندە هەورامی



طبقه بندی: فرهنگی و هنری، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، نوشتارهای همایون محمدنژاد، هومایون موحەممەدنژاد، مه‌هدی ئه‌بری(هه‌ورام)، سەیوان ئێبراهیمی(گوازی)، حەمەسه‌لیم سەلیم پوور(خه‌مبارهەجیجی)، سوهراب مورادنیا(سیاوکام)، عەتا عەلی پوور، خەندە هەورامی، مه‌ڵڵاعه‌بدولوه‌هاب ئاریانی(مامۆسابه‌دبه‌خت)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۱۹)،
نوشته شده در تاریخ سه شنبه 15 اسفند 1396 توسط همایون محمدنژاد
.: Weblog Themes By Abdollah Habibi :.