ئێژانە و یاوگەو زوانی ئەدٚایی جە وینگاو گەورە پیایەکاو جەهانیوە: کاکەئێحسان کەرەمی
 هه‌ورامان هانه‌به‌رچه‌م


۱. بەڕاوەبەروو گردٚینوو سازمانوو یۆنسکۆی:
«زوانەکێ ڕۆحوو ئێنسانەکانێ، زوانەکێ میراسێ مەعنەویێو ئێنسانیەنێ، ڕوشد کەرا و بڕێو وەختێچ مەحکووم بە فەوتیای با. ئەگەر تەقالاو وێما پەی پارێزنایو زوانەکا دەس پەنە کەرمێ، بە قازانجوو وێمانە.
مشیۆ گردٚوو سەعیەو وێما پەی پارێزنایو زوانەکا بە کار بارمێ و ئینە جە سایەو سیستمێوی چننە زوانەی فێرکاریەنە ڕێک گنۆ».
ــــــــــــــــــــــــــــــــــــــــــــــــــــــــــــــــــــ
۲. هانس گێئۆرگ گادامێر:
«زوانیچ پێسەو ئی دونیای هەردوە وەڵێو ئێمەنە بیەیشا بیەن و ئێمە جە ئادٚیشا پێدٚای بیمێ و هیچکام تازێ نیەنێ».
ــــــــــــــــــــــــــــــــــــــــــــــــــــــــــــــــــــ
۳. نیلسۆن ماندێلا:
«ئەگەر چەنیو کەسێوی بە زوانێو کە فامۆش قسێ کەردێ، واتەکەتا میاوۆ بە مەژگیش؛ بەڵام ئەگەر چەنیو ئادٚی بە زوانی ئەدٚاییش قسێ کەردێ، واتەکەتا منیشوو سەروو دڵیش».
«وەختێو کە زوانی ئەدٚایی تەدریس نەکریۆ، جە زەمیری شاریاوەو ئێنسانیەنە هەستوو وردی بیەی ڕێخە چەقنۆرە».
ــــــــــــــــــــــــــــــــــــــــــــــــــــــــــــــــــــ
۴. سازمانوو یۆنسکۆی:
«کەسێو کە نەزانۆ بە زوانی ئەدٚاییو وێش بنویسۆ و بوانۆوە بە بێ سەوادٚ حەسێب کریۆ و بێ سەوادٚا».
ــــــــــــــــــــــــــــــــــــــــــــــــــــــــــــــــــــ

۵. پەیلواو کۆمەڵ‌شناسەکا:
«زوانی ئەدٚایی چەنیو شۆتوو ئەدٚای ملۆنە دلێو جەسە و ڕۆحوو ئێنسانی و چەنیو مەرگیچش جە بەدٚەنەنە مزیۆرە و سەپنایو زوانێوتەری بە زارۆڵێوی کە تازە دەسش کەردٚەن بە قسە کەردٚەی بە جەنایەت حەسێب کریۆ».
ــــــــــــــــــــــــــــــــــــــــــــــــــــــــــــــــــــ
۶. مارتین هایدێگێر:
«ئەگەر زوانوو مێللەتێوی جە بەین بلۆ، ئا مێللەتیچە جە سەحنەو هەستیەنە مزیۆرە».
ــــــــــــــــــــــــــــــــــــــــــــــــــــــــــــــــــــ
۷. میلان کووندرا:
«ئەوەڵین هەنگامە پەی جە بەین بەردەیو مێللەتێوی، پسەڕیەیوەو حافێزەو ئا مێللەتیەنە؛ مشیۆ کتێبەکاش، فەرهەنگەکەیش و زوانەکەیش جە بەین بەری؛ مشیۆ کەسێو بسپاریەرە کە کتێبێ تازێ بنویسۆ پەی ئا مێللەتیە، فەرهەنگێوی تازە بارۆنە و وەش کەرۆ. ویەرین و زوانێوی تازە بارۆنە. جە مۆڵەتێوی کوڵنە مێللەت ئانە کە هەن و بیەن جە ویرش بەرۆوە.
دونیاو دەور و بەری گردٚ چێوێوی بە کرژی جە ویر بەرۆ».
ــــــــــــــــــــــــــــــــــــــــــــــــــــــــــــــــــــ
٨. ماهاتما گاندی:
«کەسێو کە زوان و ئەدەبیاتوو وێش نەوەنابۆوە، ویەرینیش نمەزانۆ و ئا کەسە کە ویەرینوو وێش نەزانۆ دماڕۆیەش نیا».
ــــــــــــــــــــــــــــــــــــــــــــــــــــــــــــــــــــ
۹. دوکتر مەحموود حێسابی:
«نە سەوزنا و نە سوور، زوانی ئەدٚاییو وێم یادٚم گێرتەن، ئینە پەی من وەسێن».
ــــــــــــــــــــــــــــــــــــــــــــــــــــــــــــــــــــ
۱۰. مەسەلێوە فەرانسەییە:
«کەسێو کە زوانی ئەدٚاییش نەزانۆ و یادٚ نەگێرتەبۆ وەحشین».
ــــــــــــــــــــــــــــــــــــــــــــــــــــــــــــــــــــ
۱۱. لوودویگ ویتگێنشتاین:
«زوانوو من جەهانوو منەن و جەهانوو من زوانوو منەن».
ــــــــــــــــــــــــــــــــــــــــــــــــــــــــــــــــــــ
۱۲. جان ئوستوارت:
«ئەگەر چێرچنگاڵی گەرەکش بۆ کە مێللەتێو خرۆشنۆنەو وێش ئەوەڵین کەڕەت پەی لاو هۆڤییەتی و زوانوو ئا مێللەتیە ملۆ؛ ئەگەر مێللەتێو فەرهەنگ (زوان، نەسڵە و...) جە دەس بدٚۆ ئا مێللەتە فاڕیۆ».
ــــــــــــــــــــــــــــــــــــــــــــــــــــــــــــــــــــ
۱۳. لۆرد جۆرج براون:
«ئەگەر ئەدٚا و تاتەکا موعتەقێدێ با و بزانا زوانەکەشا موهێمما و ئێژانەش هەن، ئێحتێماڵوو ئینەیە کە بە زوانوو وێشا چەنیو زارۆڵەکاشا قسێ کەرا، فرەتەرەن».
ــــــــــــــــــــــــــــــــــــــــــــــــــــــــــــــــــــ
۱۴. پڕۆفوسۆر جینوو ئاڵفێرد:
«کەسێو کە زوانی ئەدٚایی فێروو زارۆڵەکاو وێش نەکەرۆ، نە تەنیا بە  تاتەکا و نەسڵە وەڵینەکا و زارۆڵەکاو وێش خیانەتش کەردٚەن؛ بەڵکوو بە گردٚوو بەشەریەتی خیانەتش کەردٚەن؛ چوون بیەن بە باعێسوو جە بەین لوایو دانێوە جە فەرهەنگەکاو بەشەری».
ــــــــــــــــــــــــــــــــــــــــــــــــــــــــــــــــــــ
هۆرگێڵنایوە و نویستەی بە زوانی هەورامی: ئێحسان کەرەمی.




طبقه بندی: فرهنگی و هنری، اجتماعی، ادبیات/شعر، زوانی هه‌ورامی، ئێحسان کەرەمی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،ئێژانە و یاوگەو زوانی ئەدٚایی جە وینگاو گەورە پیایەکاو جەهانیوە: کاکەئێحسان کەرەمی،
نوشته شده در تاریخ پنجشنبه 16 فروردین 1397 توسط همایون محمدنژاد
.: Weblog Themes By Abdollah Habibi :.