کەلەبەروو شێعرا(۳۰)شێعرێ زاڕۆڵانێ


‍ جووجەڵەکێم 
جووجەڵەکێم زەردەنە
زەریفە و بێ گەردەنە

وەشڵانێ و وەش ڕەنگەنە
گورج و گۆڵەو شەنگەنە

خنەخن ملۆ ڕارە
مڕەمۆ شۆنەو کەرگارە

ئاوراش بۆ دانە موەرۆ
سێرە بۆ چینە کەرۆ

هەر وەختێو ئاوی وەرۆ
شوکروو خوۮاڵەی کەرۆ

یا خود٘ا جووجەڵە زەردە
هەرگیز  نەگێرۆ  دەردە

‍   #فەتحوڵڵا ڕەزایی    

‍ ‍ ئەۮالێ
دەسم گێرۆ ئەۮالێ
بەرۆم  ڕانە پاپالێ

لایە لایەم پەی کەرۆ
دەرد و بەڵام لابەرۆ

تا من پەروەردە کەرۆ
ساتێو دڵش مەسرەوۆ

ئەگەر بە دەسوو وێش بۆ
نمازۆ ناخوونم ڕێش بۆ

شەو و ڕۆ نازم کێشۆ
یا خوا هیچش نەیێشۆ
#فەتحوڵڵا ڕەزایی    

وەهار
نەورۆز گوڵ ماچۆ: یارا
زمسان لوان وەهارا

دنیا گوڵ و گوڵزارا
سەوز بیەن گەڵاو دارا

پەپوولێ کەوتێ سارا
چین چین وێشا ونارا

گوڵێ دەوروو هەوارا
ڕنگ و بۆشا هەزارا

باڵای بەرزوو چنارا
جە باخانە دیارا

مەل و مۆر دەس بە کارا
هەنگێ ئاوارە مارا

زارۆڵێ دەگا و شارا
وەشیەکاشا مژمارا

ئای چن وەشا نازارا
زمسان لوان وەهارا

‍   #فەتحوڵڵا ڕەزایی    

‍ تاتە
تاتە گیان یا خود٘ا وەش بی
پێسەو وەهاری گەش بی

ئاوات و تاسەم تۆنی
هێز و هەناسەم تۆنی

بینایی چەمام تۆنی
خەم وەروو خەمام تۆنی

گیانم، باوانم تۆنی
ڕۆح و ڕەوانم تۆنی

مامۆسا و میرم تۆنی
خەیاڵ و ویرم تۆنی

تان و پۆ دڵیم تۆنی
عەتر و بۆ گوڵیم تۆنی

ڕاز و نیازم تۆنی
ئاهەنگ و سازم تۆنی

بێ تۆ کز و کاسەنا
ڕەنگ زەرد و کەساسەنا

چنی تۆ بوو شاۮەنا
بێ باک و ئازاۮەنا

تاتە ئەڵڵا یارت بۆ
دایم ئاگاۮارت بۆ

#فەتحوڵڵا ڕەزایی 

 تاتە
تاتەم گجیم پەی سانۆ
یا خود٘ا هەر پەی من مانۆ

ملمێ پەی دلێ شاری
گێڵمێ سەر تارە واری

دڵم  شی گجیە  چەرمەی
ڕێکوو لاشەو من بەرمەی

تاتەم ماچۆ پەیت سانوو
منیچ واتم دەرس وانوو

تا  ڕۆیە  بوو  مامۆسا
یا موهەندێس و ئوسا

با تۆ وەشحاڵ بی تاتەم
نمازوونە  گێرۆت  ماتەم
#مەهوەش دروستکار

 جوجەڵەکێم زەریفێ
یۆ یۆ ڕەدیف ڕەدیفێ

ملا پەی ئەولاو یانەی
نزیکێ با بە هانەی

مەسێ سەوزە و گیواوی
جار جارێ موەرا ئاوی

وەشڵانێ جیک جیک کەرا
دەرد و خەمی لابەرا

زەردێ و زەریفێ و کرژێ
 جارجارێو هار و درژێ

ئەڐا کەرگێ چڕۆشا
ئارۆ بیەن بە ڕۆشا

بووەردێ ئاو و دانە
ئینە بەشەو وێمانە

نەک سەوای نەیمێوە باخ
کولینە بەشمانە و زاخ!!!

ئۆخەیچ ئیسە چن وەشا
هاوار جە کتە ڕەشا

جە شەڕوو کتە شێتا
هاگاتا بۆ جە وێتا

تەرسدێ جە ڕواسێ پیرێ
پڕ فێڵەنە و تەکبیرێ

گۆڵتا نەد٘ۆ ڕۆڵەکام
ڕۆڵە نەرموو نۆڵە کام

ڕۆڵە ئازادی وەشا
مەردەن ئانە بێ بەشا
#ماریا عەزیزی "هانە"

‍ شەمامێ خاڵێش هەنێ
دوێ دانێ باڵێش هەنێ

وەشڵانێنە و گولانێ
زەریفە و خنجیلانێ

پڕۆ بە باڵێ سوورێ
ملۆ پەی یاگێ دوورێ

رەفێقەو سەوزە و گوڵی
دۆسە چەنی بوڵبوڵی

ملۆ سەروو سەوزایی
پڕۆ نزم و بەرزایی  

سەر مدٚۆ ئەو هەراڵا
کەرۆ سەیروو گۆراڵا

ماواش باخەن و بۆیسان
 جارجاریچ ملۆ کویسان

شەمامە خرتە خاڵێ
هەم دیسان گێرۆ باڵێ

ملۆ پەی یاگێ دوورێ
پڕۆ بە باڵێ سوورێ

#ماریا عەزیزی "هانە"

جووجەڵێ
جووجەڵەکێم گردەنە
خەپ و خڕ و وردەنە

واردەیش گیواو و دانەن
کولانەکەش گولانەن

چەنی ئەدایش گێڵانە
جە حەوشە و جە کۆڵانە

دان و ئاوش وەرۆنە
جیک جیکم پەی کەرۆنە

ماچۆ یانەت ئاوا بۆ
عەمرت دوورە بەڵا بۆ
#ب.م (شارۆ)


          جووجەڵێ

جووج جووج جووجەڵێ
                      جووجەڵه پا پیسەڵێ

چینەت کەردەن پیسەنی
                   یا پەی چێشی پێسەنی

  هیچو وێچت ناستەنت
                 پیست کەردەن دامەنت

هۆرزۆ گورج و گۆڵه به
                  ئازا و فرز و فۆڵه به

پاک و پۆختە ژووژەڵێ
                 زەریفە چەم خرتەڵێ
                 
وەشەم مسیەی عـالەنی
                چەم خرتەنی و کاڵەنی

بەش گەورێ بی جووجـەڵێ
                جارجار پەیم کەری هێڵێ
             
              #داود غەفاری (ئارۆ)

من زاڕۆی هەورامینا
با خەڵک بیا من وینا

دەس و پەنجەم هونەرەن
ژیوایم چەنی کەمەرەن

دوورەنا من جە لووسی
جە حەز و دزی و پیسی

بەسیان بیبنم موحکەم
مەحاڵەن باروو من کەم

وێم مەوزوو چیروو تانەی
پەی وەشحاڵی بێگانەی

بە دەسام کەنوو زەمین
با ئەد٘ام نەبۆ خەمین

تاتەم کەرۆ‌ شانازی
جە کەردەوەیم بۆ ڕازی
#شاهۆ مەعازی
1397/1/27:5:35



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، فه‌تحوڵڵا ڕه‌زایی، مەهوەش درۆستکار، بێهرووز محەمەدپوور(شارۆ)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۳۰)شێعرێ زاڕۆڵانێ،
نوشته شده در تاریخ یکشنبه 26 فروردین 1397 توسط همایون محمدنژاد
.: Weblog Themes By Abdollah Habibi :.