کەلەبەروو شێعرا(۳۹)‍ 

شەوە ئاماوە من مات و بێ دەنگ
ڕۆیچم سیاو بی ڕۆخسارم بێ ڕەنگ
هەسێڵەوخەمام یەکسەر واردٚش پەنگ
بەختەو بەدٚبەختیم کەرشا پێوە جەنگ
خەموو دڵوو من جە تۆ نادیارا
ئەر تۆ لامەو بی خەم تازیە بارا
ـــــــــــــــــــــــــــــــــــ
شەوق جە یانەی دڵ نەمەن بارش کەردٚ
وەشی و دڵوەشی جە یانەکەم  مەردٚ
خەموو خەموەرا من بە میراس بەردٚ
نامەردٚی دنیە، خەمی بە من کەردٚ
هەسارەو سوەیلی جە ئاسمان دیارا
ئەر تۆ لامەو  بی  خەم  تازیە بارا
ـــــــــــــــــــــــــــــــــــ
ڕۆیچ تا وێرەگا دڵ  ئازگارا
چەمەڕا تۆن و چارش  ناچارا
چەمێچم مدٚیا  دیارت  نادیارا
هەرکەس خەمبار بۆ پنەش ویارا
جە داخەو داخا داخم کەوت سارا
ئەر تۆ لامەو بێ خەم تازیە بارا
ــــــــــــــــــــــــــــــــــــ
فەڵەک جە داخەت داخم کۆلیاوە
داخەو چن ساڵام دیسان سۆڵیاوە
دڵ ئاوات وازا یارێ بەیاوە
کەراش ئاوەدٚان یانەی وڕیاوە
فەڵەک شەرتە بۆ بی پەننەو شارا
ئەر تۆ لامەو بی خەم تازیە بارا
ــــــــــــــــــــــــــــــــــ
شەرتە بۆ ئەی خەم ،خەمبارت کەروو
وەشیت پەی نازوو  ، بیمارت کەروو
 حەز و ئاواتت  جە  دڵ  لا بەروو
 فاتێحەو نەبیەیت، من بە دڵ وەنوو
گوڵوو ئاواتیم جە دوورەو  دیارا
ئەر تۆ لامەو بی خەم تازیە بارا
ـــــــــــــــــــــــــــــــــ
 #فەرید زاوەری 

وەشەویسەکێم      ڕۆشنایی     چەمان

ڕوح  و  دڵ و گیان  ئەسەت  چەنەمان

ئازیز! عەشقوو   تۆ نه  دڵ  جا  گێرتەن

عەقڵ و فام وهۆش نه دەسم سەندەن

ئایێروو  عەشقیت  گڕ  دان  جەسەمان

کەردەن به قەقنەس ڕەگ و  ڕێشەمان

مەجنوون ئاسایی  وێڵ  و  سەرگەردان

زامدار و خەمبار  ، مات    و   پەرێشان

هووناوان نه چەم مەیان چوون  واران

ئاه  و   ناڵەمەن   چوون   شەوبێد٘اران

رای نەجات  بەندەن  ئازیزەکەم گیان

ها وەختا  بڕیۆ   نەفەس   جه لامان

قیبلەم  با  وەس بۆ  جەور  و  جەفاتان

بەزەئیت  بەیۆ   به  دڵەی   بەسەزوان

زانی چێشت کەرد شای شێوه وەشان

پێکانیت  به  تیر  پا    چەمه مەسان

کەرەم کەر  وەفات پەی شێفای زامان

سۆ دان وه جەرگم   نیەنشا   دەرمان

وەرنه  به گیانت عەزیزتەر   جه  گیان

"ناسر" فاتێحەو  مەنەو وێش   وانان

#ناسر ئەخدەر

‍ وەهار

چەم وخەم ڕەشتەن گرد دەشت و کۆسار
وادەی نەورۆزەن ئامای نەو وەهار

سپاو گوراڵا   بە   هەزار  هەزار
وێشا نیشان دان بە ئامای وەهار

جە پای سەربەرزان گوڵ سۆسەن قەتار
بەستەن   تا  کەرۆ   خێرئامای   وەهار

وەنەوشە جە باخ نە تۆی زەل و خار
ئامان وە پێشۆاز سەر قافڵەی وەهار

بۆژانە و چنوور شەوبۆی سەرکۆسار
گردیشا    چەنی   بەقی     لا نسار

ڕازناشاوە     سەیرانگا  و   کۆسار
تا بد٘ا موژدەی فەسڵی نەو وەهار

قەڵەم قاسێرەن پەی وەسفی وەهار
ماشەڵڵا قودرەت    زانای   کردێگار

رەنگ و بۆی وەهار نەوسوەیل ڕەشتەن
کەش و  کۆ  و کۆسار ماچی بەهشتەن

سارا و دەر و دەشت وێشا ڕازنان
زماوەنشانەن   وەهارشا    ئامان

"سەیوان" یانەی دڵ ئارامگای خەمان
بە تۆ چێش ماچا نەو وەهار   ئامان؟

#سەیوان ئێبراهیمی

بەیدێ بەیدێ  وەهارەن
وەرزی گوڵ و گوڵزارەن

فەسڵی وەشوو وەهاری
وەختوو شکۆفەو داری

وەختوو شاد٘ین و وەشی
بلمێ سەیران پەی کەشی

هەواش پاک و بێ گەردەن
دەرمان و  دەوای  دەردەن

بوڵبوڵ بە دەنگی وەشش
سیما و ڕۆخساری گەشش

موانۆ کەرۆ چڵاوچڵ
ڕەفێقاش چڕۆ بە دڵ

ئینە گرد جە وەهارەن
وەرزی دڵ و  دڵدارەن

بە ڕاس  ئەجۆ   بەهەشتەن
وەختی سەیران و گەشتەن

#شاهۆ مەعازی

یانە سەردەن..

وەهار! 
وەرزیە وێنە ئاسا نە ڕوی پەردەن..
تاسەو هەناسەو خەیاڵی،
  ساڵ و مانگەن ڕەنگش زەردەن..
ژیوای_ ژەمەنش ویەردەن!

لادەر پەردە..
 سەرەی سڕ و دڵی مەردە؟!
چەمەڕایی و ئینتێزاری،
شەوگارانوو هەسارەکاو ئاسماننوو بێ‌قەراری، 
شێعرەو تۆ بێ!
          جن جن کریا..
وەشەویسیت!
مووسیقا بێ،
   تۆمار کریا و
      وڵاتوو مەرگینە ژەنیا...

لادەر پەردە..
  یانە سەردەن،
دەک بێ خەوەر! 
مەرگیچ_ ژەمەنش ویەردەن..

#فەرشید مورادی

خاکووعارفا

هەورامانەکەم باخوو سەمەری
خاکوو عارفاو زاناو سەروەری

مەکتەبوو عیلم و دینوو تەعلیمی
یانەو  حورمەتوو   دڵی   سەلیمی

چلەخانەکەی    نەوەدٚ   و    نۆپیر
مڵکوو ئۆستاداو بەرزی ڕۆشن ویر

حوجرەکەو عێلموو بەحروو دانشی
دڵگیرەن   سەفاش   پەی   ئارامشی

باخ و  گوڵزاروو  بەرزوو  دیاری
مایەو شانازی  پەی  کوردەواری

هەورامان گەشەن دڵ بە گوڵزارات
بە  ڕۆشن ویرا  و  گردوو   نازارات

#عوسمان ڕەحیمی هەجیجی




طبقه بندی: فرهنگی و هنری، اجتماعی، ادبیات/شعر، زوانی هه‌ورامی، سەیوان ئێبراهیمی(گوازی)، ناسر ئەخدەر، فەرید زاوەری، شاهۆ مەعازی، فەرشید مورادی، عوسمان ڕەحیمی(مورید)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۳۹)،
نوشته شده در تاریخ پنجشنبه 27 اردیبهشت 1397 توسط همایون محمدنژاد
.: Weblog Themes By Abdollah Habibi :.