کەلەبەروو شێعرا(٤۲)

‍ ‍ هەورامیەنان
هەورامیەنان   زوانم   هەورامەن
بە زوانوو ئەد٘ایم هەر یاخود٘امەن

کوردەناو خاکوو هەورامانیم هەن
مڵکوو  عارفا  و  شاعێرانیم  هەن

قەڵەم  بنویسە  بە   هەورامیانە
یاد٘ کەرە چەرخی قەدٚیم زەمانە

کەرەش بە تارێخ پەی نەسڵووجوانی
پایە     بەرزەنە        ئوساو     زوانی

سڵام   پەی ئەدٚای سڵام  مەکتەبیش
سڵام پەی زوان و دەرسوو ئەدەبیش
   
 هەورامان گردش  هەتا  ژاوەرۆ
شارەزوور  لهۆن تەختی باڵان بۆ

سڵام خاکەکەیش سڵام ڕۆڵەکاش
سڵام هەوارا  و  بەرزە  چۆڵەکاش

با قەڵەم  ڕەژۆ  باسی  هەورامان
با  یاوۆ پەی لاو ئوستادان نامان

 ئەر گەرەکتەن هەورام بژناسی
بە    موتالێعە   و   خود٘اشناسی

ئەگەر   نویستەی    تارێخ   سەحێحەن
هەورام زەڕتەشتی وەڵ جە مەسێحەن

وێش   هاوارشەن   ئاوێستای   زەمان
من   کریام   خەڵات    هەورامی زوان

پندار  و کردار   گوفتاری   شیرین
ڕاو هەورامیا بێ  زەمانەی  دیرین

تا  زوان  گێڵۆ   چەمێ   مۮیانێ
تا هەناسە مەی و دەسێ شنیانێ

تا  عەقڵ و فکرم هەن سەروو وێوە
ئەد٘ا    منویسوو  هەورامی    شێوە

تا  زوان   گێڵۆ   هەناسە   کێشوو
بە  یاد٘ۆ  زوانوو  ئەد٘ایوە  نیشوو

تا زوان  گێڵۆ  یانی  های هەنا
منیچ  بەشداروو  ئی  دنیایەنا

مەجبووری نەبۆ وەی پام وەی پاڵام
زوانوو   غەیرەی    نەبڕیان     باڵام

#عوسمان ڕەحیمی هەجیجی


کە تۆ ئامای 

هەسارەکێ واقێ مەنێ و

 پوورەشا دای

عەجەو شەوقێت دەمنا دڵی

تا کەوتی پێچ

 خوە دەمتەو هەر تامش مت

ئیسە ئیتر چەم شەکەرشا و

دەمێوەن وەرم چەمنە دزیان

ئێشەو ڕەوتت چ وەش مجیا ڕیتموو  لەنجەی!

#ب.م (شارۆ)
97/3/7

تۆ زەریفتەرین ڕەنگوو گوڵینی
وەشەسیاتەرین کەسوو دڵینی

تاکە نوورەکەو سۆماو چەمانی
دەرمانوو دەردەو دنیاو خەمانی

بەزموو وەش کەردەی عەتروو عەتارا
جە بوەو مێخەکاو سینەو تۆ مارا

پەی حورمەتوو تۆ دنیا مل کەجەن
هاوار چا کەسیە چەنی تۆ لەجەن

جە تۆ خولقیا نەسڵوو بەشەری
یاگێ حورمەتوو خودٚا و پێغەمەری

ئه‌ر دوعاو خه‌یریت سه‌روو ئێمه‌ بۆ
په‌یما به‌هه‌شته‌ن چێروو پایاو تۆ

#شاهۆ_مه‌عازی

مەعشووقەی نەزان کیاستش پەیام
پەی  عاشقەکەی  دڵ خام  و  نەفام

دایێم جەنگشەن چەنیم ئەد٘او تۆ
هەرکۆگە وینۆم   ناوچاو   ترشنۆ

بە نێگای تووڕەو ئالوودە و پیرش
مشانۆ  وە  ڕۆی  دڵەو  من  تیرش

ئەد٘ای   سەنگدڵت  هەتا   زیند٘ێ   بۆ
شەکر چوون ژەحرەن پەرێ من و تۆ

نمەتاو  چەنی  تۆ   مانوو    یەکڕەنگ
تا بە ونەو ئەد٘ایت دەس نکەری ڕەنگ

ئەگەر گەرەکتەن بە  وەسڵم  یاوی
مشیۆم تۆ سینەو ئەد٘ایت بشکاوی

دڵش بەر باری تۆ جە سینە تەنگ
با جاموو دڵوو من نەگێرۆ  ژەنگ

گەرم و هەم ونین گەرەکمەن جە تۆ
هەتا وەسڵوو من   بە   نەسیبت  بۆ

ئاشقی نەفام   شێتی    بەدکردار
یا خاستەر واچوو فاسقی غەددار

حورمەتوو ئەد٘ایش کەردش فەرامۆش
دێوانەی  بەنگی  جە  بادە   بێ  هۆش

جەستەوئەد٘او وێش وست وە ڕۆی زەمین
سینەش شکاوا ، دڵ بەر ئارد بە قین

بە عەزمی ماوای مەعشوقەی دڵسەنگ
هۆرش گێرت دڵوو ئەد٘ای  بە  ونرەنگ

جە وەروو بەرەی بە  قەزای  تەقدیر
جوان هۆرداریاو زوو بی زەمین گیر

دڵ جە دەسشوە کەوتەرە زەمین
هێشتا  زیند٘ە بێ  ئەو دڵەی ونین

جوان هۆر ئێزا  ڕوو  بە  ماوای وێش
دیا چێش ئەو دڵ، دەنگێ مەیۆ لێش

واچێ ئاخ دەسوو کوڕەکەیم ئێشا
ئاخ پاو کوڕەکەیم  بە زەخم  ڕێشا

شێعرەو #ئیرەج میرزای
هۆرگیڵنایەو بە هەورامی
#سەیوان ئێبراهیمی

 با سککەی سیای نەحسی  بەدئەندێش

جە خەزانەی شاە ،ڕەونەق دۆ بە وێش

بازە هەیاهووی ،بازاری توجـــار

پەیکی مەی،نۆشۆ نە واد٘ەی ئێفتار

با فێراق فەرقش فەرەق بۆ جە خەم

ئێقباڵی چەفتی ،تۆ ئینا جە وەرم

#فێــراق

‍ ‍ دیمەنت ئەنـــوار بەدری دوو هەفتەن
نەسای زڵفێ کاڵ،وەش پەنەڪەوتەن

دوو دیدٚەی شاباز شەهلای شەڕئەنگێز
فــــریشتانی عەرش وەستەن پەراوێز

ئەبرۆان ڪەمان،موژان چوون پەیڪان
بەنیـــــــم نیگای ناز ڪەردات هەراسان

کوڵمت بەی ئاسا، دەدان مرواری
بینی قــەرینەی خامەی زەڕکاری

پەرێ سانێعت هـــــــــەزار ئافەرین
تەبارەڪەڵڵاهوو ئەحسەنەلخالقین

ڪەس چوون(سیاوکام)لێوەی تۆ نەبۆ
شـــــەیدٚای شوریدەی شێوەی تۆ نەبۆ
------------٭٭٭٭٭٭-------------
۱۳۹۷٫۳٫۸کۆچی ڕۆجیاری


#سوهراب مورادنیا(سیاوکام)



طبقه بندی: فرهنگی و هنری، ادبیات/شعر، زوانی هه‌ورامی، عوسمان ڕەحیمی(مورید)، جەواد حەمزه (فێراق)، شاهۆ مەعازی، بێهرووز محەمەدپوور(شارۆ)، سەیوان ئێبراهیمی(گوازی)، سوهراب مورادنیا(سیاوکام)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤۲)،
نوشته شده در تاریخ جمعه 4 خرداد 1397 توسط همایون محمدنژاد
.: Weblog Themes By Abdollah Habibi :.