‍ کەلەبەروو شێعرا(٤۳)

وەتەن   کۆسارت   بەرز   و  زەریفا

شنەی   شەماڵت   پەی   من  لەتیفا

ناحەزەکەو   تۆ   چن   من   حەریفا

زێکروو   ناموو   تۆ پەی من شەریفا

خاک و   تەوەنت   پاک    و   نەزیفا

تاقەت  و  سەبرم   بێ   تۆ   زەعیفا

ژیوایچم  بێ  تۆ  ، پیس و  کەسیفا

بەشەر  بێ  وەتەن  خار  و سەخیفا

ورد  و  گولالەت   پاک   و   عەفیفا

دوور بوو یام نزیک ،  لامەو  لەفیفا

خەڵکوو دیاریت ، مــــــۆمن حەنیفا

ئانە واتم   پەیت،  پەی  تۆ   ڕەدیفا

وەسفم  کەردەنی  ،   واتم   زەریفا

لەتیف و شەریف ،  عەفیف  نەزیفا

دوژمەنەکەو تۆ  ،  سەخیف زەعیفا

وەڵات   بێگانە  ،   لامەو    کەسیفا

وەتەن  زەریفا  ،    پەوچی  شەریفا

ئەجۆ  بەهەشتا  ،   خۆ  بێ حەریفا

#فەرید زاوەری

زوانی تازە گڕوگاڵم،غەیرهەورامی ،هیچ نمەزانۆ 

هەورامیانە واتم مەلۆ،جیام نمازە با حەسرەتت لام نەمانۆ

لاکەرە لاو تەنیائیموە،با هێجرانت چڵ نەشانۆ

دووریت مەرگم خەڵات کەرۆ،کێ مەزانۆ
ئارۆ سەوای کێ مەمانۆ!!!!

#فێراق

بێکەسی ئانەن کەست بۆ کەس نەبۆ
سفرە پەڕ کریۆ جە نان و دەس نەبۆ

وێرەگا بۆ و کەس نەبۆ خەم لابەرۆ
یاڕەبی دنیانە کەس بێ‌دەس نەبۆ

#جەماڵ قادرپوور

‍ ‍ دەسێ وارانیت شتێ
جە من
وەختێ پات نیا دلێم
تازەتەر جە دنیای
                          نیشتیەرە
ئێتر ئیسە
               
    تا ئاخر Replay
هەنگم کەرد 
 بە شیرینی دیایت
 وەروو دمام
 هەر تۆنی

#ئەحسەن  ڕەشیدی

‍ (خەیام)
ئەی موفتی من و باده جه تۆ پەڕکار تەرێنمی

جه عالەموو مەسینه جه تۆ هووشیار تەرێنمی

تۆ ونەو خەڵکی وەری ئێمه ونەو هەنگووری

ئێنسافت بۆ دا واچه کامما ونوەر تەرێنمی؟

هورگێڵنەر : ناسر  ئەخدەر


‍ ‍ دیمەنت ئەنـــوار بەدری دوو هەفتەن
نەسای زڵفێ کاڵ،وەش پەنەڪەوتەن

دوو دیدٚەی شاباز شەهلای شەڕئەنگێز
فــــریشتانی عەرش وەستەن پەراوێز

ئەبروان ڪەمان،موژان چوون پەیڪان
بەنیـــــــم نێگای ناز ڪەردات هەراسان

کوڵمت بەی ئاسا، دەدان مرواری
بینی قــەرینەی خامەی زەڕکاری

پەرێ سانێعت هـــــــــەزار ئافەرین
تەبارەڪەڵڵاهوو ئەحسەنەلخالقین

ڪەس چوون(سیاوکام)لێوەی تۆ نەبۆ
شـــــەیدای شوریدەی شێوەی تۆ نەبۆ
------------٭٭٭٭٭٭-------------
۱۳۹۷٫۳٫۸کۆچی ڕۆجیاری
#سوهراب مورادنیا(سیاوکام)

تاسەی دل

دید٘ەم گەر وینۆش،ڕۆشن بۆ چوون ڕۆ
نەخشوو جەمینوو   ، نیم    نێگاهی تۆ

گەر تاڵان کریۆ  ،  هێز و ڕۆح و گیان
جەستەم پێشکەش بۆ،چوون نەزری قۆربان
نەکەردێ مەنعی  ،  شنەی بێ ئەحواڵ
پەرێ وەسڵی حەی،سۆتەن چوون زۆغاڵ

خەمان گێرتەنا ، نە  یەک تا هەزار
نەمەندەن سەبر و تاقەت و قەرار

بەش خود٘ا کەرۆش ،مورادم حاسڵ
بە دیل ، باوەرۆن ،  ئاواتم  جە  دڵ

یاڕەب ،  بکەرەم  جارێو تەر   خەڵات
ئەو جاگە و مەقام ،دەهەندەی نەجات

یائەڵڵای ئەحەد، یائەڵڵای سەمەد
یاساحێب کەعبە  و حەجەرەلئەسوەد

بوینوون کەعبە ، تەنیا جارێوتەر
ئێحرام  بپۆشوو ،بە تەن و بە سەر

سڵامێ کەروو جە ئێخلاس  بەو یار
وێم کەروون فێداش،حەفت‌جار نە یەکجار

بنۆشوو زەمزەم ،بە زێکری ئەڵڵا
سەلام و سەڵوات ،پەی ڕەسوولەڵڵا

جا مەروەو سەفا ،تەی کەروون بە دڵ
ڕۆحم بە فێدای  ،  ئاو و خاک و  گڵ

یاحەی ،بە لوتفی  دڵەی بێ کینەت
شنەی دڵ ، گێڵۆ ،مەککەو  مەدینەت

#نەسرین ئەحمەدی
شـــــــــنەی  دڵ
  



طبقه بندی: فرهنگی و هنری، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، فەرید زاوەری، جەواد حەمزه (فێراق)، جەماڵ قادرپوور، ناسر ئەخدەر، سوهراب مورادنیا(سیاوکام)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤۳)،
نوشته شده در تاریخ شنبه 12 خرداد 1397 توسط همایون محمدنژاد
.: Weblog Themes By Abdollah Habibi :.