کەلەبەروو شێعرا(٤٦)
هەناسە ، پڕچیا

خەم ، بەرەڵا 

چەمەکەم! 

مەگەر

هەسارێ  ئاسمانی

ئاننە حیزوو چەمات بێنێ

ڕۆجیارشا پێت کۆڵێشارە!؟

#هومایون موحەممەدنژاد

من ڕۆچەوانوو دید٘اروو تۆنا
تۆ کە ڕۆچێ بی، هامیاروو تۆنا

من تەژنەی دیدٚار، هەر ماچی بیمار
ئەر واچی من مەو، تەژنایم بۆ تیمار

خەبەرشا ئاورد، چا سەر بەرزاوە
مانگەو شەوالی ،   دیسان زیاوە

هەوروو خەفەتام، پۆژناش مانگوو من
زەجروو خەفەتام، فاڕاش رەنگوو من

خەڵکی ماڕاشا، ڕۆچێ تەژنایی
من و ڕوچێ و خەم، چوارەم تەنیایی

ڕوچێ تەنیاییم، بە مانگە مەڕیۆ
پەردەو خەفەتام، بە مانگە دڕیۆ

تەژنایی و خەفەت، بیێ بە یارم
ئاسمان بێ مانگا  ، وەڵڵا بیمارم

بەش گنۆ سارا، مانگەو جەژنه‌و من
زەجروو خەفەتم، بەربارۆ جە بن

منیچ دڵوەش بوو واچوو جەژنەنە
تەژنایم بەش مڕیۆ ، هەر جە بنەنە

ئا عانە وەشا من  شادٚی کەروو
سەوقاتوو جەژنێ، پەی یارا بەروو

#فەرید زاوەری

پەرۆشەن حاڵم زەردەن جەماڵم
تازە لێویان عەقڵ و  کەماڵم
بۆ یاوە  پەنە تەبیب ئاسایی
جەسەم بێ تینەن کەرەش دەوایی
پەرسابێت جە دوور حاڵ و ئەحواڵم
دەک ڕووسوورە بی کەردت خەیاڵم

شێت و دێوانە کەڕ و کاسەنا
تاوێ دڵ مەلوول تاوێ خاسەنا
دڵ بێ قەرارەن چەم ئێتیزارەن
خولماتەو چەمام هەر سەرەو وارەن
باڵا نەو نەمام وەش خەت و خاڵم
دەک ڕووسوورە بی کەردت خەیاڵم

زەڕەی جە مەیلت کەرەم کە باوان؟
مەر تاوی عەشقم وە لات نەیاوان؟
پەی دووری باڵات ئاخ سەری ئاخەن
کەلەم بە جۆشەن چوون کوورە داخەن
بە بێ تۆ نازار ژیوا بەتاڵم
دەک ڕووسوورە بی کەردت خەیاڵم

قەسەمت مد٘ەو بە هەرچی پیرەن
دەست بە دەسی هەر کەسێ گیرەن
فەرێحێ وزە لاشەی زەبوونم
بە تۆوە بەند٘ەن  بوون و نەبوونم
وەش بێ پەرسابێت حاڵ و ئەحواڵم
دەک ڕووسوورە بی کەردت خەیاڵم
#شاهۆ مەعازی

چا لاوە کە وەر
    وەربەرەکەو
      بەرزە چنارێوە گنۆ بەر..

پەی مانگەی و
   هەزارانێ پێسەو وێش
       ئاواتەنە ئامەیش... بەڵام حەیف

"تەژنەچەمەکا" وەرمەنە فیسیاینێ و تەڕێنێ!

#فەرشید_مورادی






طبقه بندی: فرهنگی و هنری، اجتماعی، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، نوشتارهای همایون محمدنژاد، هومایون موحەممەدنژاد، فەرید زاوەری، فەرشید مورادی، شاهۆ مەعازی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤٦)،
نوشته شده در تاریخ دوشنبه 28 خرداد 1397 توسط همایون محمدنژاد
.: Weblog Themes By Abdollah Habibi :.