کەلەبەروو شێعرا(٤٨)

شۆڵەو شەموو کەیفی کزا ، ماچا فەڵەک شادیٚ دزا
شۆکرانه بۆ ئەر بۆ قەزا ، ئێنسانەکێنێ دڵ گەزا

زەڕڕێو شەرف هەن نەم نەما ، بارێ فرێ یاوەر کەما
خاتر بیابانەو جەما ، ئێنسانەکێنێ دڵ گەزا

هەر ئاوەڕوون بۆ دەس به دەس ، ناکەس به زەڕ کریۆ به کەس
مارێ مەکەردێ ئەو قەفەس ، ئێنسانەکێنێ دڵ گەزا

شارێو شعوورش مەرده بۆ ، خەڵکش شەوانەی جەرده بۆ
ڕەنگەو ژەنێش ئەر زەرده بۆ ، ئێنسانەکێنێ دڵ گەزا

هەر چی دەم و دەی بێ وەنەت ، تا بەش گەزەن بڕیۆ چەنەت
با ئی هەقێ واچوو پەنەت ، ئێنسانەکێنێ دڵ گەزا

داخۆ ڕوێو بارا خەبەر ، داروو وەفای گێرتەن سەمەر
مدٚیۆ شەفا زامی خەتەر ئێنسانەکێنێ دڵ گەزا

#یاسر ڕەشیدی
 ‍   
Sayd jalal aloz:
زاڕۆڵە عالە گیانا 
شیرینە وەش زوانا 

گوڵە سووراو وەهاری
ئومێد٘او   کوردەواری 

بەیدێ دەس پەنە کەرمێ 
نامێ خود٘ا گیانی  بەرمێ 

ئیمانما هەن  بە  خود٘ای 
بە  دین و  رەسوولەڵڵای

موحەممەد    پێغەمبەرا 
سەردار و هەم سەروەرا

ئەد٘او تاتەش زانی کێنێ 
عەبدوڵڵا   و   ئامینێنێ ؟

مەککەنە    پێد٘ا    بیەن 
مەدینە فەوتش کەردەن

فەرماوۆ پێغەمبەر گیان 
رەسوولی   ئاخر  زەمان 

من هیچ وەخت تاتەم نەد٘یم 
بێ کەس کەوتانێ  و  هەتیم 

بیانێ بە شش ساڵێ 
بێ تاتەنە و بێ واڵێ 

ئەد٘ێچم  ئاسا  جیا 
هەقەتی هەتیم بیا 

مامۆیم چایلای بەردانی 
ئێتر ئاد٘ی وەی  کەردانی

وەختێ بیانێ چل ساڵێ 
جبریل ئاما     بە     باڵێ 

بە ئەمرەی خود٘ای ئەکبەر 
چایلای    بیا     پێغەمبەر

قۆرعان کریا خەڵاتم 
ڕۆشن  کریا   وەڵاتم 

دا دەی زاڕۆڵە خەپڵەکا 
شیرینە   فرە  وەشڵەکا 

هەر کەس حێفزێشا کەرۆ 
نوقڵێ و   شیرینی  وەرۆ 

#مامۆساسیدجەلال  ئەکبەری( ئاڵۆز)‍  
شێعرە یانی چێش وەسفوو تۆش کەروو
گردش خەیاڵەن   داو   لاو   کێ  بەروو؟

کەی  بە  ئەلف  و  لام    یاوان   بە   تاسە
دڵ دایێم   پەڕەن    ،   تەنگەن    هەناسە

 قافیە  و   ڕەدیف   گردش     ویانێن
یا   نەزم  و  نەسر  گردش  پێچوانێن
 
هیچ  کام   نمیاوا   بە   حەزوو  دڵی
تا چەم  نەوینۆت  هەر  پێسەو گوڵی

#عەتا عەلی پوور


کۆچی وەهار

وەهار کۆچش کەرد،وەهار کۆچش کەرد
 هامنی خۆ  بەرد ،وەهار  کۆچش  کرد؟!

وەهاری ئێساڵ، چی وەشیش نەوێ
ڕۆش سیاو بی هەر  پێسەو شەوێ؟!

داخۆ چی گەردوون، قەرارش شێویان
چی وەهار ئێساڵ به کۆچ خەم پیویان؟!

چی گوڵی وەهار، بێ ڕەنگەن ئامان
چی زامی دەروون، نیەنش دەرمان؟!

کەش وکۆ زەردەن،سیاو مەرمانۆ
نه بوڵبوڵ هەن و نه ژەرەژ موانۆ

ڕۆخساری گوڵان ، جه دەشتان  بڕیان
ئاسمان پەر جە خەم ، هەساران زڕیان

هانە و چەمەکێش ، ئاوش  لێڵ  کەردەن
ماچی    ڕۆڵەشا   به   جوانی    مەردەن

ئاوات و هیوا جە دڵان بڕیان
دوەدەسێ پێشکەش به خەمان کریان

یانەش وێران خەم ، دەردش بۆ کاری
دەروون پەڕ خەمەن،ژین ژەحرووماری

بەش نەبۆ هێچکەس،دەروونش پڕخەم
بەش چەم نەوینۆ  ئاه  و  ناڵه و  تەم

قادری موتڵەق،خود٘ای بێ هامتا
"شنه"هەر تۆش هەن،دەسش به دۆعا

دۆعای با بۆ ، بەینوو من و تۆ
دۆعای خێرم پەی،گردی گیرا بۆ

#شنه ی دڵ

عەشق

ئازیز، بە بێ تۆ ،سەبرم سەر شیەن
چەم جە چەمەڕات، چەم گلانشەن

ئینە کەی ڕەویەو ڕاهی  عاشقــان
تەن  پەی  وێساڵت ، وێ تلانشەن؟!

تۆ  بی تۆخود٘ای مووسا و مەسیحا
تۆ ئەو کەس عەشقش نویسیەن تاڵە

با کەم جە هێجران تل وەروون شەوان
زنگانیم    تاڵەن    ،    جە    ئاه  و  ناڵە

ئینە کەی دەرسی حوجرەی شیرینەن
ساتێ پەی  ساڵێ ،گوزەر  کەر جە لام؟!

من کە تەسلیمی ،سەرای عەشقی‌ تۆم
بە لوتفت ڕەحمێ ،   کەم   بد٘ەر سزام

هەناسەم بێ‌  تۆ ،  ستەم  مەخێزۆ
هاکا ژنەفتت  ،   کۆچ  و  سەفەرم 

یاچوون یاسین‌وان،یا تەڵقینم دەر
یا جلی سەفەر ، تۆ بکەرەم  وەرم

#جەواد(فێــــــراق)




طبقه بندی: مامۆساسیدجەلال ئەکبەری( ئاڵۆز)، فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، عەتا عەلی پوور، یاسر ڕەشیدی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤٨)،
نوشته شده در تاریخ دوشنبه 18 تیر 1397 توسط همایون محمدنژاد
.: Weblog Themes By Abdollah Habibi :.