کەلەبەروو شێعرا(٤۹)

چەنی کریۆ هۆشم پشی عەکست نەبۆ وەروو چەما
خۆ هێناسەم من تۆ نیەنا تازە تۆنی قیبلە نما 

بوەو وەشەو پوونەو هانەی یا ڕێحان و وەرکەمەری 
شەرمەساروو لارە ملێ تۆنی بوەو دەشت و دەری

چەنی کریۆ هۆشم نەبی مەگەر کریان بێ هێناسە
تۆ گیانوو وێت تۆ گیانوو من تەژنەو تۆما چەمە ڕاسە

بەڵام بەخۆا هیچت مەبۆ ئەگەر ڕوە کەری نەبیەی
شۆڵە وزی یانەی چۆڵم ڕۆجیار ئاسا چاگە بزیەی

هەرچی کەسم پێسە مەلی سوجدە بەروو پەی تۆ وەلی
ئەگەر ئامای حوجرەی چۆڵم لامۆ نیشی و  ئیتر نەلی

دا بەزەیت بێ"ئاڵۆز"یرە ڕەحمت  جمۆ تۆبی خۆدا 
سواڵ کەرنا سواڵە بۆ چن فەقیرناو چنە گەدا 

#
مامۆساسەیدجەلال ئەکبەری(ئاڵۆز)

Sayd jalal aloz:

ده‌گا
ڕەئوف. م

ناز مجۆره‌
به‌ ڕووبه‌ندوو وارانیه‌وه‌
                        ـ ده‌گا ـ
کاوه‌ترێچ
به‌ له‌نجه‌ی ته‌ڕ
مژێ خوونۆ
ئه‌ها چه‌ وه‌ش
ئوو په‌نجه‌ره‌
بیه‌ن وینگاو کناچێوه‌ که‌وه‌پۆشێ!
چکیۆره‌ چک
شه‌رم چنی زه‌رده‌خه‌نه‌ی
فڕده‌ چه‌تره‌ ئی  وارانه‌
وێتره‌ واچه‌ حاڵی به‌دحاڵ
ئی وێره‌گات چنی گره‌وا
                     ـ چه‌نی ؟! ـ
ده‌گا، سۆبه‌و کام دڵیه‌نه‌ وێره‌گاشا
کام هه‌رساوه‌
ناز مجیۆره‌ واران شێوه‌ش؟!
ئه‌ی که‌وه‌ته‌ر چا کناچڵێ
کام کاره‌وان ڕۆحی وزۆ ڕاگاو کۆچی
کام ته‌کانا گێرۆ خورپه‌؟!
ده‌گا
چه‌ ناز وارانیه‌وه‌ وێش لاونۆوه‌
مژه‌یچ ئاخۆ...؟!

#ڕەئوف مەحموودپوور

پاڵپشتوو  یانەوئاواتیم  تۆنی
دڵم هەن  لاو تۆ ئازیز چکۆنی؟
دایێم حەز کەروو تۆ من فرە دۆنی
تۆ جە لاو دڵوو منەو هەر یۆنی
ئاواتەو دڵیم  زوانی هەورامین
فێرت کەردانێ  ئەلف و با و سین

جار جارێو بدٚیە، لا کەرە  لاوە
بە گوڵ ڕازنانم ، ڕاکێت تا پاوە
چنوور بەرزەڵنگ، ئینا جە ڕاوە
تاقەت نەمەنەن، زوو کەرە یاوە
بە ڕەنج و زەحمەت، هارەقی جەبین
فێرت کەردانێ ، ئەلف و با و سین

شەوێ نیمەشەو، وەرموو وێت شێونات
وەشی و  ڕاحەتی، جە وێچت دێونات
قەڵەم و خامەت، پەی فێر بیەی جمنات
تەنافەو جەهلی، جە  ملیم  پڕچنات
ویەردەت باس کەردٚ، جە وێگە تا چین
فێرت کەردانێ، ئەلف و با و سین

زوانوو ئەدٚایی، تۆ فێرت کەردا
چنیش پارێزنوو،جە گردٚوو دەردا؟
لێڵاوی چەمام، چنە لا بەردا
ئاماوه گەرما، لاشی لام سەردا
دڵ پەڕ جە وەشی، هاڵی بی جە قین
فێرت کەردانێ، ئەلف و با و سین

دەی سا شەرتە بۆ مامۆسای ژیرم
هەتا من هەنا، نەشی جە  ویرم
بە تۆوە حەل بۆ،موشکڵ و گیرم
بێ تۆ کەساسا، بازار و لیرم
چن تۆ بوو وەشا،ناڵکمین و مالمین
فێرت کەردانێ،ئەلف و با وسین

#فەرید زاوەری
وەسـڵ

پەی وەسڵی ئەو یار،ئەو ئاهووی تەنناز
ئەو شیرازەی تەن ، ئەو  شەرابی  ڕۆح

بڕیان جە هێجران ، تاتای بەندی دڵ
پەوکەی دامانم،قوڵ مەد٘ەوجە زۆخ

چاکی دامانی شەیخانی شەمسی
گرێم دان  بە ئاخ  هەناسەی  کاڵم

سا بەڵکۆم وەی تەور،نیاز بۆ حاسڵ
بەڵ مەڕیۆ تاسەی  ، حاڵی  بەد٘حاڵم

پەی وەسڵت ئازیز، نەمامی عومرم
 ڕێزنان خەزان ،  نە سای   نەمامت

بێ عاری عۆرفم ،جە بێخ ئاوەردەن
فامم نەفامەن ،  نە حوجرەی فامت

#جەواد(فێـــراق)
     

برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤۹)،
نوشته شده در تاریخ سه شنبه 26 تیر 1397 توسط همایون محمدنژاد
.: Weblog Themes By Abdollah Habibi :.