هورامان هانه به  رچه م
پەلەوەرەکێ ئاسمانوو وەڵاتی داخیێ نەبیەیتانە چەمەری گێڵنا:کاکەئۆمید حه‌بیبی                                               
مشۆم چن دلێ وەشەویسی وەڵاتیەنە گڕت کەوتەبۆ ونە و تاویابیەوە،تا بتاوی وەرەڕوو زەرۮی قرچەقرچوو ئایێروو قەرەچۆڵ بڕیای، سەوز پێسە سوورەچنارە سەرکەشەکا وێت قیت کەریەوە، نەبەزانە،سەربەرزانە،چەم نەتەرسانە،چەم نەترووکنی و تا بینۆ گیانیت ئەۮالە گەورێ پارێزنی و پارێزەروو بنجە هێقمەکاش بی،تا وا حەننا لیویۆت پەی بلی گژێ گرۮوو ئا نەۮامەتیاوە گەرەکشانا بەرەکۆ نیشتگای،ژیوەنی وەر نەۮا و یاوگەشا بەرپڕنای و قات وقڕیا.
مشۆم چن خەموو گیانوو گیاندارە بەسەزوانەکا زێڵیش ئارۮەبیەوە ئێش پێسە ژەنیاریوی چنەئامای تەموورەو وەشەسیایی بژەنی پا شەرتە ونی نەی بەژن وباڵاو نیشتمانیەرە،حازر بی سەرپەنجێت وناڵینێ با و جەمخانەو سەر ئەسپارایەنە عەینوو پیریوی ڕابڕ و ڕا ئەرەنیەری،فێرگاو زاناییتەنە یارەکات فێروو چنە ویەرۮەی کەری.
مشۆم چن بێ پانجەقولێ گێرتەی ئا کەسا کە هەرمانەشا فوونە کەرۮەیا!!،تا بەرزایی حەوت ئاسمانەو خواڵەی ڕات پیمای بۆ تا هاموەڵاتیەکات بیاونیەنە نسکەنسکوو پەلەوەرە پەک کەوتەکا مشۆم چن قڕووزەو تووتە کۆڵێوی خەمش وسە بۆ سەروو شانات،مەریوان تا سەلاست دابۆ پای، تۆشەبەرێوە پەڕ جە هاڵیت بینەیبۆ کۆڵێتەرە،وشکە ڕاوێوە لیکموو زانیاریت بنە دابۆرە تا بە زوانیوی تێژ چڕی هەڵای هەنێ ئا ویژدانە زیتەڵێ کە چی سەرەوەختوو ئاسنی و نەمەنای هەستی بەرزی ئینسانیەنە هاواروو زەرێڵی ژیوگای بە گۆشوو دڵی مژنەوا و کرژوکۆڵ ملا پێوایشەوە تا هەر هیچ نەبۆ شۆڵەو چۆڵەچراڤۆ ئینسانیەتیشا دایمە پیویۆ و ئەوەکۆشیایش پەی نیا!!.
مشۆم چن دڵت پێسە گەورەیی،پۆختەیی و ڕۆشنی زرێبارێ گەورە بۆ،ورکەش بژنەوی و داڵغە و دڵەچرکەت ئانە بۆ نازی ناحەزێ بیاوا ئاواتیشا و هەروەرەنە بە فێڵێ کەراش بە زەل و بە پیس کەرۮەیش ژیوگای وێڕسیش فەوتنا.بە واتەی،نویستەی و قسە کەرۮەی،خەڵكەکەیت بیاونیەنە ئا گێچەڵە یانە وێرانکەرا.
مشۆم چن دڵت پەی یوەس پەی یوەسوو خاكەکەیت دۆ ونە کە شۆنۆ بوومەلەرزە وێرانکەرەکەو سەرپێڵیەرە ماوات بازی جیا، دیسان پاو دەسباری هۆرگیری و پووزەوانێ خیرەتی پتەو بینی،چنی ئا داماگە پەک کەوتا هۆرزەوئەرەنیشت کەری و سوور بزانی زام تا خاس سارێش نەبۆ هەر زاما و مەبۆ بێ خەم چوارمێکەش پەی کێشی.
حەشاش چنە مەکریۆ دایمە زینۮێ کاکە شەریف باجۆر و کاکە ئۆمید کۆنەپۆشی پێسە ئا بە نامێ ڕۆشنویرە قاقەزینا نەبێ سەروو ئیسراحەتی تەنیا قسێشا چنە بەیا و پەی گرۮوو گێچەڵە کۆمەڵایەتیەکا قسێشا نەبۆ پەی کەرۮەی،کەکێوە نەگەزۆشا و وەختوو هەرمانێ وێشا پەشتۆ تەیمانۆ دوێ وتارە پڕوپووچانە شاراوە بەڵكووم ئازایانە بێ ئانەیە لا بازارە پەی تاریف دای ئێۮی و ئەوی و تەمەۮاروو پنەزانای فڵانە یاگێ یامکەتی فڵانەکەسی با تەنیا و تەنیا پەی ترۆق و گەشەو وەڵاتیشا دەساندەسەکا بڕێنێ و هاواروو ئینسانیەتی چفنێنێ گۆشێ نیشتمانوو ئاهوورا مەزدایەرە بێ هیچ شكێوە چننێ ساڵێ مشۆم ویەرا تا وەڵات ڕۆڵانیوی ئازا و ئەنەیاوا پێسە کاک شەریف باجۆر و کاک ئۆمید کۆنەپۆشی پەروەرنۆ و یامکەتی گاهەز هەرگیزاوهەرگیز ئا پەرۮۆچە ئاڵتوونیەیە بە چەم نەوینۆ.بە پاو ئی قسێ متاڤوو واچوو دیسانەوە وەڵات گەورە کۆسش کەوتەوە و ئێشەو تارە لا پەلەوەرەکاو نیشینگەو خەما پەی داخۆ نەبیەیشا چەمەری گێڵنا

ئۆمید حەبیبی،نۆدشە




طبقه بندی: فرهنگی و هنری، اجتماعی، ادبیات/شعر، زوانی هه‌ورامی، تسلیت ها، ئۆمید حه‌بیبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،پەلەوەرەکێ ئاسمانوو وەڵاتی داخیێ نەبیەیتانە چەمەری گێڵنا:کاکەئۆمید حه‌بیبی،
نوشته شده در تاریخ یکشنبه 4 شهریور 1397 توسط همایون محمدنژاد
.: Weblog Themes By Abdollah Habibi :.