کەلەبەروو شێعرا(٦۰)

واو خه‌زانی
سۆز  نۆ  پائیز  جه ‌کاوان   خێزا                
 به‌رگ  نه‌ما‌مان  جه ‌دامان  ڕێزا 
هه‌وای گریوه‌و سه‌رپاسار وه‌زان                 
خه‌زان هه‌رزان که‌رد جه‌دامنه‌ی ڕزان
هه‌یا هووی کۆچ هیجران ساڵه‌ن                
 لوره‌ی سه‌ردی سه‌ر کڵاوان  زاڵه‌ن
به‌وێنه‌ی یاران بێ وه‌فای دڵ سه‌رد               
گه‌رمای کۆره‌ی دڵ هه‌ردان ڕاماڵ که‌رد
(وه‌تای قه‌ڵماسک سه‌نگ سه‌ردی مه‌یل)         
  دا وه‌پای  وه‌فای  یاران  بێ ه‌ یل
تای تانه‌ی مه‌و به‌ت کۆره‌ی گه‌رمی دڵ           
هامن وار جه‌ ته‌ن  هۆرکه‌ندش مه‌نزڵ
ئه‌روا جه‌قاڵب  جه‌سته‌ی خه‌سته‌ی کۆ            
شیپۆڕانشه‌ن  جـه‌ده‌س هه‌وای نۆ
شێویا  تای  زوڵف  نـه‌مام   باخان                   
چه‌مه‌ری گیره‌ن زاخان جه‌زاخان
ماته‌می کاڵای بـه‌رگه‌ دڕانه‌ن                        
فه‌سڵ وه‌سڵ ده‌رد دڵ ئه‌وگارانه‌ن
سه‌فا وه‌مه‌جلیس  به‌زم  دارانه‌ن                     
جه‌فا وه ‌یانه‌ی که‌س نه‌ دٚارانه‌ن
های ساقی هانا دڵ سه‌ردی بێـزه‌ن                   
چه‌نی گه‌رمی مه‌یل  یاران ئا مێزه‌ن
ده‌سه‌و دامانم ها نه‌ی وه‌سڵ سه‌رد                
  پێم ده‌ر جه‌ ئه‌ومه‌ی ڕاماڵ که‌رۆ ده‌رد
به‌ڵکو وه‌گه‌رمای گه‌رمی نۆشای مه‌ی           
ساماڵ بۆ سه‌ردی نه‌و ڕه‌سیده‌ی ده‌ی
چوون دڵ وه‌هه‌وای گه‌رمی مه‌یل له‌یل          
وه‌تای به‌نده‌ن ها نه‌ی فه‌سڵ  وه‌ یل
چه‌م نیگاریشه‌ن  به‌یانی خێزۆ           
وه‌گه‌رمی سوبحش بیسه‌ی دڵ ڕێزۆ
هانه‌و ده‌م ساقی وه‌بێ  په‌یمانه‌          
په‌یا په‌ی پێم ده‌ر نـه‌بۆت به‌هانه‌
هه‌تا که‌ساتی ئه‌ی جه‌سته‌ی فه‌تار            
جه‌هیجران  غه‌م  بگێرۆ قه‌رار
بنیشۆ وه ‌شادٚ  جه‌وبه‌یان  نۆ            
چه‌نی وه‌هارێ  پائیزش نه‌بۆ
وه‌ر هه‌ستیم جه‌وده‌م بده‌ری وه‌باد            
وه‌شه‌ن تاوێ دیم ئازادی وه‌ شاد
                                                                         #موحه‌ممه‌دڕه‌شید ئه‌مینی
                                                          

بارە پەیم دا حبێە ماچێ، من سەرەم کاسەن کنا
چندە ساڵێ هەن دڵم، چی وزعێ هەر یاسەن کنا

وەزعە تا پێسینە مانۆ، زەردە خەندەم، کفرەنە
تا تۆ هەر پێسینە مانی،حال و من پاسەن کنا

تا چەمم مەگنۆ پەنەت، کۆل چیوێ ویرۆمۆ ملۆ
دا ئەرێ ئی دەسمە چەپ، یا ئینەشا ڕاسەن کنا

ئینە کەی تاوینە نامێش شێعرە بنیەی، بێ خەیاڵ
ئینە ناڵەو، ئینە ئەڵهایە پەڕ ئێحساسەن کنا

شێعرە مشیۆ، پەڕ بۆ ئێغراق و درۆی شیرینێ خۆ
ئینە من واچوونە پەی تۆ، یۆ بە یۆ ڕاسەن کنا

وەختێ شێعرێم مژنەوی پەرسی ئەری کێن شاعێرش؟؟؟
با ئەمن واچوونە کێن، شاعێریە نەژناسەن کنا

گرد کەسێ زانۆ تەماعێوەم جە دۆسانم نیەن
ئەر غەریوەیچم بزانی، پەی ئەمن خاسەن کنا

حەز کەروو نامێت گنۆ لێ شێعرەکانم پەریەکێم
دامەنت تەرسوونە تەڕ بۆ، ئینە وەسواسەن کنا

ئانە قاچێت چی سەروو شێعریم نمەنیەی لامەسەو
مەر دڕەیۆ بزمارەنە، یا پڕ جە قەلداسەن کنا

#پەرویز  بابایی

دڵ نەوینانش وەشی دایم بەشم وریا بە توون
کابە وەش بۆ سا گەدٚا کابارە ئەر بریا بە توون

ئاغە کەیفش کۆکەن و دایم سمێڵێ وا مدٚۆ
بێ‌دەس و لات و هەتیم کەیفش بە وا دریا بە توون

هامنێ ڕۆڵەو وەزیری ئەر کولێرش گازیەن
کارگەر چێروو وەری داخینە ئەر گریا بە توون

زەمهەریرەن پەی هەتیمی ، ئاغە گەرمەن یانەکەش
بێکەس و بێ‌دەس جە سەردایێ لچش زریا بە توون

ئێمە ژیوایما بە خەم بریا سەر و ناما وەشی
ئاغە کەیفی کوشتە بێ ئەر بێ کەفەن نریا بە توون

هەر کەسێ کەس بۆ مەحاڵەن حەق نەواچۆ و دەم بەسۆ
شاعێروو شێعرەو حەقی ئاوارە ئەر کریا بە توون

#جەماڵ قادرپوور

ئه نه زۆخێت هۆرگرت
تابیەی بە ئەفسانەو
خاتووزەمهەری،
ئەگەروێت نەواچی
ڵۆچ لۆچووچڕووچەمیت هاوارکەرۆ!

#سەباح شیانی

وێم کۆکم کەردەن ، سازوو تەنیایی
نیەن هامڕازێ ،  وەشتەرەن جیایی

چوون چی دەورانە کەس نیاش وەفا
تەنیایی وەشەن ، نەک جــەور و جەفا

#عه‌تا_عه‌لی پوور        
پاییز و دەگا

تەقەو شەنیەرا دەنگشا مەی دیسان
گەڵا زەرد بیەن و سەردیچ بی کویسان

دەگا شێویەنە هەر یۆ لێوەرە
واگژە و سەردٚا کەوتێ پێوەرە

شەنیەر دەس مەگنۆ عاڵەم پەشۆکیان
یۆ بێ شەنەن و یۆیچ دەسش گیریان

یۆ خەلەش بەردەن کەرۆنەش پەتڵە
یۆچ ڕەمای ڕەمۆ پەیش بەرۆ سەتڵە

کەس نیا پەرسۆ  خۆ جە ئازیزی
عاڵەمش دێونان فەسڵوو پاییزی

زاڕۆڵی مەدرەسەی کەوتێ ڕا پێوە
یۆچشا خەریک  بێ  مڵکەنە  ئێوە

دەسێچشا سەوزێ بە ڕەنگەو وەزا
یۆ گجیش سوورا، یۆچشا هەم سەوزا

یۆ حازر بیەن بلۆ پەی شارۆی
یۆچشا مژمارۆ  وەزەکاو ئارۆی

سەردۆڵە و دێکپا  ڕازیان کێڵەنە
یۆچ جلێ  شۆرۆ جە  هەسێڵەنە

بۆ وەشەو چاشتەو قابلەمە سیاوا
هەتا  ئاخروو  مڵکەکا  یاوا

 عەتر و بۆ چایێ کتریە سیاوێ
هەتا  لای سەری  جوەکێ یاوێ

ئەی خود٘ا چن وەشا فەسڵوو پاییزی
بەڵام دوور نەبی  تۆ جە ئازیزی!

#فەرید زاوەری

وەفـــــــا

سەد٘جارێ واتم مەلۆ،دڵ جە تاسەت کەیلی خەمەن

پەڵەو دەیموو بێ‌وەفاییت، تەم وهەورش هەناسەمەن

بۆرێ بلمێ شەرعەو دڵی، بزانمێ کامما دڵ هەنارەن

ئەگەر دڵم پاسە نەبی،  پەیت حەراڵەن چوون شکارەن

#جەواد ــ فێــــــــــــراق
 



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، فەرید زاوەری، جەواد حەمزه (فێراق)، جەماڵ قادرپوور، په‌رویز بابایی، سه‌باح حه‌سه‌نی شیانی، عەتا عەلی پوور، موحەممەدره‌شید ئه‌مینی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٦۰)،
نوشته شده در تاریخ دوشنبه 16 مهر 1397 توسط همایون محمدنژاد
.: Weblog Themes By Abdollah Habibi :.