دیاری (جەژنۊ ھەناری )ئاکۊ_مارانی

به پاو کیاناو وتارێو جە کاکەئاکۆ مارانی پە ی  "#'هه‌ورامان هانه‌به‌رچه‌م'' دیاری (جەژنۊ ھەناری)
#ئاکۊ_مارانی
٢٥و نۆڤەمبەرو ٢٠١٨

ڕەنگا پەی ئی سەردەمەیە (جەژنۊ ھەناری) جەژنېۋە تازۍ بۊ، بەڵام ئەر سەرنجو کولتوورو ناوچەو ھۆرامانی بڎەیمۍ، گلېرۆکەرڎەی بەرو ھەر درەختېۋی پەی وېش جەژنېۋە بیېنە، چونکە جارا گرڎ ھەرمانېۋە و گلېرۆکەرڎەی بەرو درەختا و باخەکا بە ھەرەوەزیی بېیەن و ھەرەوەزیچ پەی وېش جەژنەنە، چونکە خەڵکی وەشی و ناوەشی وېش چنی ھامسای و ھامدەگایی و ھەم-جۊرەکا وېش بە ھەرەوەزیی بەشکەرڎەن و دلۍ ئاڎیچییەنە، ئەر بەرھەم فرە بېیەبۊ، چە بەرھەمەکەی بەشۊ خەڵکی دریان و ئەر کەسېۋ بەرھەمش کەم بېیەبۊ یان دەرامەتش نەبېیەبۊ، کەسا تەری بەشدان و ھەرگیز خەڵکو دەگێ ناستەن، کە کەسېۋ ئاورا و بېبەش بېیەبۊ.

ئانە کە چېگەنە و ئی ڕۊ و پەی ئی ساڵی گەرەکما پېسەو دیاریېۋی بە شمەی ئازیزش پېشکەشکەروو، نە ھەناریەنۍ و نە ڕۊگنار، نە گەرەکما چە بارەو (جەژنۊ ھەناری) بنۋیسوو، بەڵکو چېگەنە گەرەکما چە بارەو چنی درۊسکەرڎەی ڕۊگناری ۋیرلېۋە بە شمەی ئازیزی پېشکەشکەروو.

چە باری ئاساییەنە، ڕۆگنارکەرڎەی یان درۊسکەرڎەی ڕۊگناری بە گرینای ئاۋۊ ھەناری و پەنەوازیی ئێریېۋی فرەی و کاتېۋی فرەی پەی گرینای ڕۆگنارەکەی ھەن.

ھەرچنە ئامانج چە گرینای و فرە گرینای ڕۊگناری بېجگە چە ھەسۆکەرڎەی ڕۊگنارەکەی، ئامانج ھۊرگېرتەی بېیەن، کە ئۆسا پېسەو ئیسەی یەخچاڵی ئەلەکتریکی نەبېیەن و ناتاۋیان چېۋەکۍ پەی کاتېۋی فرەی ھۆڕگیریا و نەخرابیا. بەڵام چە ئیسەنە گرڎ کەس یەخچاڵی ئەلەکتریکیش ھەن و ئا گرفتە نەمەنەن، بە پېچەۋانۊ ئیسە گرفتو سۊتەمەنی ھەن.

یۊ چە ئا ڕا تازا کە پەی ڕۆگنارگېرتەی یان درۊسکەرڎەی کریۊ بەکاربریۊ، ھەسۆکەرڎەی ئاۋۊ ھەنارانە ۋەرو دەمو پانکەینە (ئامرازو فینککەرڎەی یانەی)، کە ھەم ڕۊگنارەکە نمەسۊچۊ و ھەم ھەرمانېۋە فرېش گەرەکە نېیەنە، تاکو کەسېۋ یان چن کەسېۋ بەردەۋام قازانۊ ڕۆگنارەکەی تېکەدا و نازا بنەگېرۊ.

دماو ئەۋەشتەی ھەنارەکا و تەکنای دڼگەکاشا و شېڵای دڼە ھەنارەکا و گېرتەی ئاۋۊ دڼەکا، ئاۋۊ ھەنارەکا کەرمېنە سینی و سینییەکا ۋەرو دەمو پانکەینە (یان چېرو سپلیتییەنە) منیەیمېرە، تاکو وردە وردە ڕۊگنارەکە ھەسبۊۋە و بۊ بە ئا ڕۊگنارە کە وېما گەرەکمانە و بە دڵمانە.

چېۋېۋ کە مشیۊ ئېمە ۋەرو چەماش گېرمۍ، ئانەن، کە ھەرگیز ڕۊگنار دلۍ سینی فافۊنی یان نایلۆنی و پلاستېکییەنە ھەسنەکەرمېۋە و ھۊرنەگېرمۍ، چونکە تشیی ئاۋۊ ھەنارەکەی چنی ئا مادا تیکەڵیی کیمیایی درۊسکەرۊ و پەی تەندرۊسی زیانبەخشا. 

ۋەرو ئانەی خاستەرا کە دلۍ سینی شیشەینی یان سینی ستیل'یەنە ئاۋۊ ھەنارەکەی ھەسەکەرمېۋە و ھەر پاسەیچ پەی ھۊرگیرتەی و بەخشای و ۋرەتەیچ، ھەر مشیۊ دلۍ بتڵی شیشەینی کریۊ، تاکو ھیچ زیانېۋ بە تەندرۊسی وېما و کەسانېۋی کە چە ئېمەش مسانا، نەیاۋۊ.

سەرنج : یۊ چە تایبەتمەڼییەکا ئاۋۊ ھەناری یان رۊگناری ئانەن، کە ۋەرو تشیش نمەخرابیۊ و وېش چە وېش پارېزگاریکەرۊ. بەڵام بە مەرجېۋ کە تاکو ڕادەو تەمام ھەسۆبېیەی، ئاۋەکېشکەمشکەردەبۊ.

ئومېڎوازەنا دیارییەکەو من بە باخەۋانەکا ھۆرامانی کۊمەککەرۊ و ھەر پاسە تاۋابۊم دیاریېۋی پاییزانە بە بە گرڎ کەسېۋی کە حەزش چە ڕۊگناری و چاشتی و سالاتو ڕۆگناری ھەن، پېشکەشکەروو. دیاری شوانەی شنگیەنە یان ھاڵەکۊکی



طبقه بندی: فرهنگی و هنری، ادبیات/شعر، زوانی هه‌ورامی، ئاکۊ مارانی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،
نوشته شده در تاریخ دوشنبه 7 آبان 1397 توسط همایون محمدنژاد
.: Weblog Themes By Abdollah Habibi :.