کەلەبەروو شێعرا(٦٤)

چن بەرزەنی، چن ڕێکەنی، چن عالەنی، چن پاکەنی
هەر شاتە لەولاوێ مشی، ماچی ولێوە تاکەنی

ژیری کەری دێوانە تۆ، ڕاسی کەری ئەفسانە تۆ
خامی وزی خمخانە تۆ، ئای چننە تۆ بێ باکەنی

تا وێرەگا من وێڵەنا، ماچا پەنم دەرگێڵەنا
هەر پێسە ئاوێ لێڵەنا، تا تۆ نەوینوو دا کەنی

من بێ بەش و تۆ باخەنی، من سەردەنا تۆ داخەنی
من دەیرەنا تۆ کاخەنی، ئای چننە تۆ چالاکەنی

دەردەو تۆ کەوتێنە سەرەم، با بوو هەنارێ بۆ وەرەم
یا با بلوو یا بۆ بەرەم، من تار و تۆ ڕووناکەنی

هەی مانگە شۆخ و شەنگەکێ، هەی سازە پەڕ ئاهەنگەکێ
هەی دڵبەرە بێ دەنگەکێ، ئارامە ئەجیۆ خاکەنی

من داری وشک و بێ گەڵا، دەشتێوە هاڵی وەرهەڵا
نەی لاتەنە دەرد و بەڵا، دەشتەو دڵێم ئازا کەنی

هەر چننە تۆ بێ حاڵە بی، دوورم وزی ڕووتاڵە بی
مادام کە ساوێ کاڵە بی، پەی عەشقومن هیلاکەنی

#فه‌رید عه‌باسی

قەمچەقەمچوو لار و لەنجەیت

         لاچەمێ دزۆ
 
                   بێ ئەندازە.....

تۆشەبەرەو چەمەڕاییم

       هەرسی تکنۆ

                بێ ئەندازە.........

#هومایوون_موحه‌ممه‌دنژاد

‍     
شەوگار درێژەن خەم درێژتەرا
نەشتەروو خەما نووکش تێژتەرا

پەرێ ئەشکاوای جەرگوو خەمبارا 
جەرگ وڵوڵ بیەن دوور بۆ گوشدارا

#قەیۆم دانشوەر

کۆڵانەو وەشەویسیم 
فەرشوو جل و بەرگیمەنە .

ماتڵتەنا تەشریف باری .
ئازیزوو   من !

لەرزش کەردەن 

پاییزوو من .


#فێـــــــراق

تا واتەی زوان شی نەبۆ پەرێت
سەر حاڵی نەبۆ جە ئاوەزی وێت

هەرتا تەحقێقت نەبۆ بە حەقێق
ئەگەر مەجازەن؟ یا زاتی تەرێق

تا نەبی حاڵی جە نەفامحاڵان
فام نەدٚۆت ئازار، سەر نەدٚەی ناڵان

تا لەش سڕ نەبۆ جە نێشی یاران
سەرات نەسەڕی جە پای ئەغیاران

تاقێق نەزانی تەوانات چەندەن؟
زاتت مەرهەمەن، یا ژەهر و دەردەن

تا جاگەی نیشتەیت نیشان نەدٚان پێت
جای ئاوەزدارەن، یا نەفام و شێت

تا جە ئەلف و لام سەر بەر ناوەرین
نەچەشی مەزەی زوانی شیرین

هەرتا تەپڵی گۆش نەزڕیۆ جە نام
سیفەتی ئەو نام، فامەن یا نەفام

هەرعان جە حاڵی وێت بیەی حاڵی
سەرەت بەرد نە سای کەمەو کەماڵی

کامت بی کامڵ جە کانی کەماڵ
ڕاست پەرێ چەفت، بی زاڵ و زەواڵ

ئاوەخت فتوا دەر کامەن ناحاڵی
نەدٚیەی سەرپەتی و سەرەی دەسماڵی

وەرنە ئەژناسای پەی تۆ مەحاڵەن
مێحراو نشین هەن، سوجدەش بەتاڵەن

عیبادەت پەرێت نەبۆ بە مەحەک
فەرقی بی تاعەت، خەدەنگ دەی بەرەک

نەدٚیەی حەگاڵی سەرەی سەرداران
بێ حەگاڵ تۆحفەی یۆسف کرداران

سەر سەرای ساوەن، سەرای سڕ و سەم
زات بێ عەیانەن، تەن تاپۆن پەی چەم

فێراق با وەس بۆ فەرق مەکەر فەرەق
زات شناس نیەن، غەیر جە فەردی حەق

تەکەبور لابەر تەگبیری ویت کەر
زوانی شیرینت، مەکەر بە خەنجەر

#جه‌واد_حه‌مزه‌_فێراق

مەگەر مکریۆ تۆ مامۆستا و یۆی بی و جە یادت کەرۆ!!!!

هێشتا ژمارە مۆبایلەکەتم جە گۆشیمەنە پاک نەکەردەنۆ، جار جار باوەڕم نیەن کۆچت کەردەبۆ و جار جار دڵم نمەی
فرە بێ تاقەتتەنان
ڕۆحت شاد و ماوات بەهەشت بۆ 

تەژنەتەنان تەژنه به ئاوی قەسەم
ناوەشوو تۆنانێ به یاوی قەسەم

هێشته دلێ ویرو شەو و رۆیمەنه
رۆشنەنی ئەی بە چراوی قەسەم

بێ تۆ دڵم سەرد و سڕەن سەرد و سڕ
سەرد و سڕ و تۆن به شەتاوی قەسەم

ئی شەوه تارێمه سەرۆ لاوەره
توو قژه زەردێ و وەرەتاوی قەسەم

ویرو رەفێقان و کەری جارێ  پا
یاگە وەشێ ئیسه میاوی  قەسەم؟؟

 حەز مکەرو شیعرەنه بۆ تۆ کەرو
بۆ وەشەنی ئەی به گڵاوی قەسەم

شێعرەم ئەگەر قابل و تۆشان نەبۆ
ڕوو رەش و تۆنان به سیاوی قەسەم

پێشکەش به رۆحوو پاکووو کاک یوسفی رەسوڵ ئابادی

#پەرویزبابایی


برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٦٤)،
نوشته شده در تاریخ چهارشنبه 16 آبان 1397 توسط همایون محمدنژاد
.: Weblog Themes By Abdollah Habibi :.