کەلەبەروو شێعرا(٦٦)


کەسێ موڵكوو دڵیش گێرتەن بە یەکجاری خرابنانش
دەسم کورتا خودٚا ڕەحمێ هەتا یاوۆ بە دامانش

گەدٚان و شا، هەتیم و ناز، فەقیر و زەڕ، چەنی یاوۆ؟
پەرێشان چوون منێ پەنجەش بە تای زوڵفی پەرێشانش

حەرامش بۆ وەشیم گردٚش بە تاڵانوو چەما بەردٚەن
حەراما وەرم و خۆراکم بە بێ لەنجەی خەرامانش

خیاڵم بێ کەماڵ و ماڵ و حاڵێوەم بۆ پەی ژیوای
خیاڵم تەفر و توونا بی بە خاڵ و باڵ و میزانش

خەبەر دەیدێ بە ئا بێ مروەتێ زانوو دڵی شێتم
بە چەکمەو ناز و غەمزەیشه‌و جە ئاسانەش ژلێقنانش

وەڵادیم بۆ ڕوێو قەزیەو وەشەسیایی یەقینم هەن
زڵێخا ناز کەرۆ و یۆسف خەریکا بەربشۆ گیانش

ئەگەر «سەعدی» مەنۆ ئا ڕۆ خێشابێ پەڕ كەرۆ ماچێ
قەساسوو ئا وەشی جەوریت بە نامەردٚی خنیکنانش

#سه‌عدی_غه‌ریبی

کاناڵەو شێعرێ هەورامیێ

********


 نەدارینە گۆچ کریەیبێ
 و
کاڵفامینە، گۆت بی حەزش

باڵاش ئەقڵیش بەرز ئەرمانێ
 و
 باوڕ، ژیوایش دیوار چنێ

تەقەو پایا کۆڵانەش چڵاکنارە و 
 زڕناش پەلتۆکێو
          سینەو بەرەی
یوە...
   دوێ...
      یەرێ و ...
   
نۆش پۆڕنابێ و 
     مارەییش هەلهەلە ئارێ...!

نۆقڵ و شیرینی تاڵ جمێنێ چەم
زاڕۆڵێ،
 وەستێرە کۆڵانە و
هەواو شادٚی
هەرزەکارێش بار دێ بەرزەبانا
چەمەقرتێ دەلاقەنە و
           تێک دای سەرپۆشا
دڵی وەزنێرە پەی دوە دەسماڵەی

شادٚی مەردٚرە و 
           ژیوای نەوژەن... 
ویر باڵەفڕبی
          باڵاو وەیوێنە 
عەمروو زەمای چەماشەنە پەلێش دێوە و
نێگاش سپارا وەشەسیایی
ئەشق
    ڕسواییش چەمنە ئەرمانا و
سەی تەڵاقی
       زەق بێ زاڵیش
یوە... 
    دوێ... 
         یەرێ و
            ئاننەتەر ساڵێ ...

شەرەف ماسا مەژگوو کاکەیش
     و 
عالتەرین تەکبیر پەلەش وست وەڵێ
پەپوولەکێش 
سەرمەسوو ژیوای
پیرەزەما 
یەرەتەڵاقەش مشتەنە وڵاونا و
کرچەو ماشەی شکە گێرێش

وەهار گیانش یاوا لووتە 
عەزم ئاخێزیا ڕاو گەلەبێرێ 
نەخشەو براڵا ئەقڵش وڕنا
جادٚە، 
مەرگش پەلکێش کەرد بەروو دەگای
ڕۆجیار تۆریا و
            قاڵاو داشەرە

چاڵێوە 
   مەرگێوە و 
          شەرەفێوە...!

ژیوایش پێچنا دووکەڵوو جگەرەیرە
 ڕەجم جما و
       باوشەو دەگاینە
          شەرەف پەڵەش دا...!

 ‍  ب.م (شارۆ) 




طبقه بندی: فرهنگی و هنری، ادبیات/شعر، زوانی هه‌ورامی، بێهرووز موحەممەدپوور(شارۆ)، سه‌عدی غەریبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٦٦)،
نوشته شده در تاریخ یکشنبه 16 دی 1397 توسط همایون محمدنژاد
.: Weblog Themes By Abdollah Habibi :.