هەناسێوە پەڕحەسرەتی شێعری جە مامۆساموستەفا عەباسی "کەیمنەیی":
 
 
"پێشکەش بە مێماناو چەمەو "
مێمان وەشەویس خودٚای بێ باکا
پاکی نیشانەی گەوهەری پاکا
چەمەو کەیمنەی هەزاران ساڵەن
ئاوش شەربەتی گوڵ و گوراڵەن
یۆشا کەوسەرا، ئەوشا زەمزەما
تێکەڵاو بیەن، جە هەر وێ چەما
پارێزنایش ئەرکا، پیسش نەکەرمێ
ئەر پاکە نەبۆ، مەتاومێ وەرمێ
موستەفا عەباسی
1393/2/20
‍ موعەللێمە دێرینەکەو کەیمنەی مامۆموستەفا عەباسی کە وەختوو وێش دڵسۆزانە زاڕۆڵەکا پەروەردە کەرێ تا گەنجوو دماڕۆی با، ئیسە جە دووری زێدی پیرۆزیەنە ویروو چریکەو سیاچەمانەی کەرۆ کە جە بەرزایی هەیات و نوەیجەڕیەو پێسە وەرزەوارانوو وەشەسیایی وارێ ملوو کەیمنەیرە. ئی ویروو کەردەیچە بە هونراوێوە تاسەمەندانێ وزۆ بەر و پێشکەشوو دەنگی داوودی (برایانی کەیمنەیی)ش کەرۆ.
"ج.ع"
٭٭
پێشکەش بە برایانی کەیمنەیی :
دەسەو گوراڵا کۆ بیەن سەرجەم
بەرشا ئاوردەن بنچینەکەی خەم
تاویان هەرەس ڕێزان نەڕێزان
شنگ و هاڵەکۆک نەڕێزان خێزان
شەماڵ سەروەشا چەنی گوراڵا
ئی شان و ئەو شان بەقەکێ ناڵا
ئارگای ڕەش پۆشەو کۆنە هەوارا
فرە دیا وە شۆن کۆچوو نازارا
شادیانەشانە جە کەلەو هەنگا
هەیاتی سەرین مات و بێ دەنگا
واچدێ بە چنووری وەزۆرە واری
سەرچۆپی کێشۆ گوڵاو وەهاری
ئاوارەش ئاردەن ڕۆحم جە هەیات
هاناو بە هاناو شەربەتی حەیات
مرواری پاکا چۆڕۆ جە هانە
یا تەوەرگەنە وارۆ بە دانە
مووسیقاو دەرەی وەشتەر جە جازا
هاژەو وەرواوێ ئاواتە وازا
وارانێ وەشتەن شۆرتەنش دیمەن
شەونم چوون ئەڵماس نیشتەن ڕووی چیمەن
ئازادی و شادی بەبە چند وەشا
بە زوانوو وێشا وانا چا کەشا
نەرمەدەنگێ مێ هەیاتی سەرین
تەختە بەندانا ویەردەی وەرین
ژڵێوە کەوتەن کەش و کۆ و کەمەر
خوڕخوڕە و هەیات هەتا ئاوێسەر
قیامەت خێزان جە هەزارانی
چەمەو وەزڵیێ هەتا گەچانی
چەم و دۆڵەکەش فیردۆسی نەعیم
جە ئەزەڵ سازان خەزانەی کەریم
سەر پەنجەت وەش بۆ ڕەنگ ڕەژی وەهار
هەر لا تەماشەش وەشتەرا گوڵزار
پێقەو نەچیری و پووشڵێ و تەمە
کەشەوان هەینا با کەرا گەمە
نیگارخانەی چین مەوینۆش جە خاو
خەیمەو گوراڵاو سەیرانگاو سەراو
وتەی نەنیشتەن لاو هاناواوە
برا کەیمنەیێ دەنگ مساناوە
وەهار ڕازیان بە دەنگی وەشتا
نشینگەو یاران بە سیمای گەشتا
هەر یاگێ شادین یا کە وەهارا 
دەنگ و دیمەنشا چاگە دیارا
وەش چۆپی کێشۆ ئا باڵا بەرزە
حمەحسین کەیمنەی گوڵی سەر تەرزە
سیاو چەمانەش ئاراموو دڵان
چەپڵە ڕێزانش نەغمەو بوڵبوڵان
کاکە عوسمانا سەرباشقەو گوڵان
دەنگ و ڕەویەکەش پەسەندوو دڵان
زوانی هەورامیش شیرینتەر کەردەن
هەوارگەو کویسان وەش نامێش بەردەن
دەس بنیەنە گۆش کەنعانی ڕەنگت
با بەیۆ نەغمەی داوودی دەنگت
پێسەو مەولانای ئارەزوومانە
دەنگوو عوسمانی سیاوچەمانە
دووربای ئاوازش ماچا کەم ڕەنگا
هەرگیز نمەمرۆ هەر چند بێ دەنگا
جەمیل و عوسمان، سیاوچەمانە
هەرگیز مەبیزیۆ چی هەورامانە
پێقەو سڕناکێ مامۆ ڕەحمانەی
ژڵێوەش وستەن ئەو سەروو هانەی
زەماونگاکەش ئاردەن نە لەرزە
پیر و جوانش کەردەن بە هەرزە
مامۆساشەفێع دانەو گەوهەرین
گەلاوێژەکەو سەماو هونەرین
کاکە سیروانا شەپۆل مەشانۆ
دیاری پەی یاران مرواری کیانۆ
داڵانی و هەیات تەخت و گاهۆڵە
سێملە و ویمیر، شاهۆ و پیازدۆڵە
وێنەشا نیا جە ڕووی سەرزەمین
ئاتەژگا و گەردە چەم و دۆڵ ڕەنگین
موستەفا عەباسی
1396/5/18





طبقه بندی: فرهنگی و هنری، اجتماعی، ادبیات/شعر، زوانی هه‌ورامی، شهرها و روستاهای هورامان، تصاویرومناظرطبیعی وتاریخی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،هەناسێوە پەڕحەسرەتی شێعری جە موعەللێمیوی مانیا،
نوشته شده در تاریخ چهارشنبه 23 مرداد 1398 توسط همایون محمدنژاد
.: Weblog Themes By Abdollah Habibi :.