کناچڵێ خەیاڵی :خاتوو زارا مورادی

گەرماو هامنێ پیایی مەسۆچنۆ،
شەرا دانشەرە،گەڵاو حیچ داریە نمەلەریۆوە،
شیڕشیڕەکەرە گژوو دارە تفەکاوە دەنگوو سەڵاتیشا بەرزەن.
مەش و میشوولە سەروو هەسارەکێوە دەنگوو سڕنا و دەهۆڵیشا مەی و بەزموو زەماوەنێشا گەرمەن،
کناچڵێ خەیاڵوو ئێمەیچ لچوو هەسارەکێنە نیشتێنەرە وچەمش وستەن پەی قورواقەکاو لێ ئاوەو هەسارەکێ کە مەش و میشوولەکەی مەکەرا قوروانی لەمێشا.
شنە وایە ئاوەو هەسارەکێش لەرناوەو وێش یاونا بە گەڵا شێڵانەکەو سەروو هەسارێ،
کناچڵێ واتش"خۆزگا منیچ قورواقی بیایانا"

دیا پی لاو پەولاو وێشەرە و ڕووسەریەکەش لاوەرد،زوڵفێش پێسەو سیاو ماری سەروو شانەیشەرە خزایرە واری و تای تایچشا کەوتێ دەوروو ملیش،
ڕووسەریەکەش دلێ پەنجۆڵاشەنە پروونێ و لێ وتوو ویرەنە بێ کە چرپەو پایا ئامە،
دیاوە پەی چرپەکەی ویناش دوێ پیای پاسوە میا،
گورج ڕووسەریەکەش داوە سەرەشەرە.

زەردە خۆیە لچوو پیایەکاش ختلێ دا، ویەردێ.

یۆشا چفناش پەویوەو واتش "ڕووسەری نەوێ سەرەشوە".

کناچڵێ یاگێو وێشەنە جووڵەش نەکەرد،

دەسش وست لێ ئاوەکێ،دیسان وردوو ئی لاو ئەولایشوە بیە، پاڵایەکاش کەنێ و پایێش وستێ لێ ئاوەکێ،پێسەو ئاوی تکنی دەموو مەردەی،فێنکشوە بی.

هەناسیەش هۆرکێشا،دیسان چرپەو پایا دڵش تەکنارە،ویەردێ،واتشا"وێش فێنکوە مەکەرۆ"

هەردی وارینەنە دوێ کوڕێ لێ هەسارێنە لەمێ کەرێنێ،

کناچڵێ خەیاڵی ورەش ئامە،پسە بزانوو واتش"خۆزگا کوڕ بیایانا".کتووپڕ هۆرستەوە خاس سەرەنجوو ئی لاو ئەولاو وێش دا،کەس نەوێ،

پەپوو وانێ،جلەکاش کەنێو ڕووتەوە بیە و وێش فڕدا پەی باوەشەو ئاوەکێ،ئاوەو هەسارەکێ گێرتەشوە و باوەشیش پۆرە کەردە.

پەڕ بەدڵ گەمەشا کەرد وخوای،

چی ئەسنانە خوەکا فرەتەرێ بیێ،چەمێش کەردێوە چە دوە کوڕەکە هەنێ سەروو سەرەیشوە و مەخواش پەنە،

وێش وست لێ قووڵی دڵوو هەسارەکێ و چاگە مەنەوە،

ڕوەش نەوێ بەی بەروە،

چکیە ویەرد،یەک ڕا کوڕەکا بەرێ شیێ،سەرەش سڕ مەنە،داخۆم ڕاویاریە تەر بۆ?!

ئامە بەروە،کەسش نەوینا،پەلەپەل جلەکاش کەردێ وەرش،واتش"ئۆخەی لاشەم سۆک بی،چی ویرەورەنە بێ،دیاوە پەی لێ هەسارەکێ،ئانە یام ویناش بڕواش پەنە نەوێ،لاشەی ڕووتش کەوتەبێ سەروو ئاوێ،

داخی داخانم،کناچڵێ خەیاڵی ئنە لێ ئاوەکێنە مەنێبێوە تا هەناسەو ژیوایش تەمامیا بێ،

کوڕەکا پا بۆنەوە بەرێ شیێ بێنێ.

پەیچێ غەیرەزوم ئانەیە بێ کە تەمەش کەردێ بێ وێش فێنکوە کەرۆ؟


"پەیچێ غەیرەزوم ئانەیە بێ کە تەمەش کەردێ بێ وێش فێنکوە کەرۆ؟




طبقه بندی: فرهنگی و هنری، اجتماعی، ادبیات/شعر، زوانی هه‌ورامی، مەجەلەو"بەیان"ی ـمەهاباد، ئێران مورادی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کناچڵێ خەیاڵی :خاتوو زارا مورادی،
نوشته شده در تاریخ یکشنبه 24 آذر 1398 توسط همایون محمدنژاد
.: Weblog Themes By Abdollah Habibi :.