جە نەبیەیت هەسارێ ، مەگەرەوانێ/ هومایون موحه‌ممه‌دنژاد

 هەتا دڵت ئاسمانی نەبۆ ،هەسارێ خاس نمەژناسی ،ئەر هەناسەت، وەشبۆ، نەبۆ ، وەهاری خاس نمەژناسی.

 هەوارەکاو شاهۆی،ویمیر،هەوڵی،که‌ریسان، ،هەڵای، هه‌رزه‌له‌شا نەپێتێنه و هامدەنگ چەنی هەناسەو مووسیقایی  جوانوو پاوەشاری"گوڵێوه‌م دا ده‌موو وایۆ" گڤەو واگژەو وەشەسیایی، چووپیەو تامەزرۆییش، کێشتێنە .

هه‌ناسه‌و ژیواو هەورامانی!

 ئاوەز و ژیرلەییت جە لاو مەکتەبوو مەولەوی و بێسارانی سەرچەمەش گێرتەن و ئاوه‌و حێکمه‌ت و زاناییت جە حەڵقەو دەرسوو میرزاو پاوەشاری،هۆر لیشتێنە.


ئەی سەرقافڵەو کارەوانوو فام و ژیری!

 ڕاو ژیری و زانایی نەک جە فێکر و ویرتەنە ،ڕێخەش بەستە بێ، بەڵکووم جە لێباس و سیپاڵەنە، دیاردەو فەرهەنگی هەورامیانە بیەن، کەوا پانتوڵ و چوخە ڕانەک، باڵاو مامۆسایەنە، هەورامیانەش، دیاری دێوە. 


مشیۆ سالێکوو دەریاو عێرفانی بی، هەتا بزانی مەلەوانوو بەحروو فامی، جە  شەپۆل و گێجاوەو نەفامی ،نمەتاوۆ وەرپەنگش بۆ. 


یۆسفوو هەورامانی! 


ڕێخەو گوراڵەکات هەتا قووڵایی مەژگ و ئاوەزیما بنجەش دەینەرە،ئانەی بزاندێ ئارگایێوە کە شمە و ئەنجومەنوو پاوەی پەی زوان و فەرهەنگوو پاوە و بە گردی پەی هەورامانی مەرزنابێرە،هەڵای ڕۆشن و وێپا مەنێنە و ئارۆ ، ئەشکۆفە و هه‌راڵه‌و وه‌هاروو فه‌رهه‌نگیما،ته‌نگیانه و ئاوه‌زوو زاڕۆڵه‌کاو هه‌ورامانی چووزه‌شا دان‌ به‌ر و فێرگاو ئەدەب ،زوان ، فەرهەنگ و کێ بیه‌یما مه‌رزیانه‌ره و کۆڵه‌کێو یانه‌یما جه دیمه‌که‌و خامەو نویسەرا و شاعێرەکاو دەهەو شەسی، پێسه‌و جه‌نابیت و مەرحووم کاکەغازی خەلیلی،کاکەحەمەرەشیدٚ ئەمینی، کاکەهادی سپەنجی، کاکەباقی شەفیعی، کاکەمۆمن یەزدانبەخش، کاکەفەریدوون بەهرامی،کاکەموعتەسەم شافێعی و...، هێقم و هێقم ته‌ر بیه‌ن.

ئێمه‌یچ به پاو ئانه‌یه‌ پێسه‌و مسیار و وەردەسوو ئادٚیشا ،مووچیاریەکاشا پێسەو گۆشەوارەی، ئاوێزەو گۆشوو دڵ و دەروونیما کەردەن.


ئی شێعرێ مامۆسا یۆسفی هیچ وەخت جە ویرمەنە ، فەرامۆش نمەکریۆ:


{شەوێ وەختێ هەسارێ مەگرەوانێ


بە لای لای دیدٚەکەو تۆ مەسرەوانێ



سەحەر گوراڵەکێ تەنگوو هەسارگای


بە پژمەو نوهەناسەیت  بەر  مەدٚانێ



وەرو مانگە، گموو ساراو نەزانی


مەگەر دانامە نامێت بەر کەرانێ



سەر و گیانم گمێ بان، با نەفامان


ئەگەر ئیمان بە ئەشقت ناوەرانێ



زەمین و ئاسمان تەنگەبەرێوەن


هەڵۆ زادٚێ، نە مردٚارێ وەرانێ



ڕژ و دڕک و ترامەن گەورە ژیوای


مەگەر"یۆسف" نیشانێ، بویەرانێ}



مامۆساکەم!

ئەرێ یاد٘ت نەکەروو

           چێشم دەسەڵاتەن!!!


***

پێشکەش بە ڕۆحوو مامۆسایم:


دەی بۆ کەسم واچوو پنەت


       باوڕت بۆ درۆ نیەنە!!


بۆنەو تۆوە دڵوەش بیەنا


    گیرەم باوشی،


       هەتا سەوای ،ورکەم نیا


سوورەچنار!،تۆ بی خود٘ا


ڕازەودڵیت ،واچە پنەم!!!


ئەشکووفەکەم 


  خۆ تەنگیاوە دلێ بەرەو 


چەماو  تۆنە


         قەڵەم سوور


 و 


        ڕەنگ تاونۆوە


 نامەکێ تۆ 

                       برقە دۆوە


ساڵەی تازە ، هۆرگیسیۆنە ،


                           جلێ سوورێ


کەروونە من 


 گڕی واتش هۆرزە بۆرێ


تێکەڵ کەرمێ 


             گجیێ  سوورێ


هەرچن 


   بیەن فڕەو جارا ،


 هامدەنگ چەنی خۆ هەسارا


         گوزەر کەرمێ ، پێسەو جارا  


ئەفسانەیچ بۆ  


 شاد٘ی وزمێ ئەو هەناری


هەوار بەسمێ کۆ و کۆساری


    واچوو پنەت باوڕت بۆ


       کەوا و پانتوڵ،


سوخەمە و پەسەک


 پەی ورموو شاعێروو پاری


              زاڕۆڵێ، وەش ویارێنێ


بۆرە بلمێ  هانەو لاری 


           هەرچن نەمەن وەشی پاری


     گێرەم باوشی ،هەراڵەڕەنگ


            سوورەساوێ ،مد٘ۆ سەمەر


       باوڕت بۆ هیشتا مەنەن 


                  قەوڵ و قەراروو جارانی


          ئەر باوڕت مەنەن پنەم!!!


              #هومایون موحەمەدنژاد


یادٚشا بە خێر بۆ

ئی وتارە جە پاوە پرێس"ەنە بە نامێ"جە نەبیەیت، هەسارێ مەگەرەوانێ / هومایون موحه‌ممه‌دنژاد وەڵاکریاوە.
--
یادداشت در لینک زیر

www.pavehpress.ir/?p=92391 
--





طبقه بندی: فرهنگی و هنری، اجتماعی، ادبیات/شعر، زوانی هه‌ورامی، شهرها و روستاهای هورامان، ده‌گاو زاوه‌ری/روستای دز‌آور، نوشتارهای همایون محمدنژاد، هومایون موحەممەدنژاد، موحەممەدره‌شید ئه‌مینی، موحەممەدمۆمن یه‌زدانبه‌خش، هادی سپه‌نجی(خاڵه‌)، باقی شه‌فێعی، یووسف ڕه‌سووڵ ئابادی(هاوار)، فه‌ریدوون به‌هرامی"شرام"،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،جە نەبیەیت هەسارێ،مەگەرەوانێ/ هومایون موحه‌ممه‌دنژاد،
دنبالک ها: جە نەبیەیت هەسارێ ، مەگەرەوانێ/ هومایون موحه‌ممه‌دنژاد،
نوشته شده در تاریخ یکشنبه 24 آذر 1398 توسط همایون محمدنژاد
.: Weblog Themes By Abdollah Habibi :.