کەلەبەروو شێعرا(۱٤۷)

حەشا دیدٚار

ئەسیر و باڵ بەسەی ژینم،جە گیان بێزار تەوەسیانا
تەقان تای تاقەت و سەبرم، جە ئێنتێزار تەوەسیانا

ئەچی دنیا جگەم دادٚی،نەدٚیم جارێو وەشی و شادٚی
خەما پۆس و جل و بەرگم،جە رۆزگار تەوەسیانا

ژەن و ئەولاد برا و واڵە کەس و کارم بە یاگێ وێش
جە ئەغیار و بەر و هامسا و دۆس و دڵدار تەوەسیانا

چمان خولخولە خولیەوە ڕوێ سەدٚ جار بە دەوروو وێم
گەمەی ژین و ژیانوو من بیەن تێکرار تەوەسیانا

گەمەی قومار چەنی ژینی ئێتر پەی من نیاش مانا
لوان عەمرم مەتاوونە کەروو قومار تەوەسیانا

زەلیل و زامزەدە و زارم زەمینگیر و گرفتارم
ئەجەڵ بۆرێ گەرەکما وێم بکێشۆ دار تەوەسیانا

عەزابی ڕۆح مدٚۆ بوغزم کە وەی تەور زێندەگیم باختەن
خەتاباری و نەزانکاریم کەروو ئێقرار تەوەسیانا

وەلێ ئەر سەدٚ گوناهم بۆ بزاندێ سادٚەگیم نەویەن
جە من ئێسرار جە دڵ ئێنکار خودٚا هاوار تەوەسیانا

ڕەفێقان یاوەران یاران درۆن عەهد و وەفا و پەیمان
جە دەس یاری خەلافکار و خیانەتکار تەوەسیانا

هەتا هیزی بە گیان و دڵ جە عەشق و عاشقی واچێ
بە زاهێر بێ وەشەسیاییش، حەشا دیدٚار تەوەسیانا

چکۆن شاعێر بە سوزی دڵ ڕەدیف و قافیە تاشۆ؟
جە شێعر و غەزەڵ و ئەشعار ، نەبۆ شوعار تەوەسیانا

#موحەممەد خدری (ئەدیب)

وەشەسیایش دڵنە 

          پەنگش واردەنۆ     

لەفزم ترەکۆ

        عاشق کەرۆ شارێوە

# شارۆ
۹۸/۱۰/۲۲


بڵێسەی ئایێر

ئاوەردەن پەی من موسحەفی پڕ نوور
دەردە دارەی بێ  وە  دەورانەی  دوور

وە جەمع زوڵمەت مەردمش گیرەن
هەر ناڵەی  وە  دڵ بەند  زەنجیرەن

تا جە وەخت وێش تەبەر وە بوتخان
 یاگە وە زەربەی خەلیلوڵڵای  دان

عاقیبەت فتوای کوشتار ئەو بۆ
ئایێر بەو سزای ویەردەی شەو بۆ

سەراپای جەستەش وە ئایێر تلیۆ
وە  فەرمان حەق  گوڵستان  کریۆ

نامێش بەو وەفا وە ئەعلا بەردەن
ئەجرە بەو فەرمان ئێتاعەت کەردەن

بەڵام سەد زەمان،سەد کەس شی وە دەس
ئایێر گوڵستان نەوی پەی گرد کەس

عەجەب وە خاسان مەردەی وە هەر تەور
سەد عەجەب ناپاک مەنەن وە هەر دەور!

ئاخ کە بڵێسەی ئێرەکەی هێجران
هەر سات وە تەورە جەسەم وە گڕ دان

هەوای سەرد و سڕ ،خەزانێ نامەرد
بۆی سفتەی ئازیز ,بەردوو لواو شەرد

فەڵەک  چ  وادەی  ئەلوەدای  یار بێ
یا ڕەب چ حاجەت ، یانێ چ کار بێ؟

کام فام وە تەسلیم بەو حزوور دڵ
ڕازیەن وە گڕ ،گوڵ وە جەمع گوڵ؟

کام بەزم شادی ئامێتەی خەم بی
چوون دەنگ بەراوەرد تێکەڵ وە تەم بی؟

کام ڕای زەبوونی،کام ڕای وە خەیرەن
چی سزای خاسی سۆتای وە ئەیرەن؟

وە ناوەخت تەسلیم حوکم یەزدان بی
وە یاگە ئاسەی جەمع یاران بی

تەقدیر بەدٚشۆم ، نەکەردەی حەیات
خەجڵەت بار وێش گەردوون بەدٚزات

 "لهۆنی" ئێشەو تۆش وە یادٚ ئامەن
  یادت تا وە حەشر  زەنجیر  پامەن

#هووتەن زوورئەسنا-لهۆنی




طبقه بندی: فرهنگی و هنری، ادبیات/شعر، زوانی هه‌ورامی، شهرها و روستاهای هورامان، بێهرووز موحەممەدپوور(شارۆ)، موحەممەد خدری(ئەدیب)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٤۷)،
نوشته شده در تاریخ یکشنبه 22 دی 1398 توسط همایون محمدنژاد
.: Weblog Themes By Abdollah Habibi :.