یادٚێو جە مەرحووم کاکەموحەممەدی موستەفازادە/سەعدوڵڵا خوونخام 


ئیمساڵیچ، ئه‌چی زمسانه‌ سه‌خڵه‌ته‌و ژیوایه‌نه‌، جەمێوه‌ ‌بیێنمێ هەتاکو شه‌رت و پەیمانێوە کە وه‌ر جه‌ کۆچیت چەنی هەنتری بەستمان، تازەش بکەرمێوە. ئێگە قەبرسانو دارسێرانو مەریوانین. دیسان جەمو ویریارانو ویرچەمەو هۆرامانی جەمەن.

پانه‌یچەوه‌ که‌ تۆ نیەنی دلێ جەمێمانە و هەفت ساڵین دووریت بیەن بە یاگه‌هاڵییانێوی گه‌وره‌، 26و ئارگاو گرد ساڵێوە ڕۆحت مێمانیمان مەکەرۆ و مەکێشۆمان سەرو گوڵکوی نازار‌ێت.
دمایین دیدارته‌نه و په‌ی دیارده‌و هامبه‌شیمان‌ فەرماوات; «یه‌ک‌ چێوه‌ن که‌ ئێمه‌ش جه‌موه‌ که‌رده‌ن و جەموە مەکەرۆ. وێ ئاگاهی و ئانه‌ که‌ هه‌نمێ.»

هەر چه‌ند تۆ نیەنی بەڵام دڵ وەشێنمێ بە تیژەو ڕۆجیاری که‌ سات به‌ سات هەورە سیاوەکان مەدۆ لاوە و وێش مەوزۆنەوە دیاری. ئەچێگەنە و ئەچی زه‌مانه‌نه‌ ویریاران حەماسەی بەرزشان گێرتەن دەسشانوە و باسو ده‌ریاو تاریخی مه‌که‌ران. په‌یامه‌که‌ت یاوان و فامیان. دەنگو ئاهوورایی وه‌ڵاتی مەرزەکانش ویاران و ته‌نانه‌ت موزەو لووریچه‌نە لاپەڕێ و نامێ مەیانوە جبەر و باسو تەلیلەو نیمەشەوانەو دڵدارانو هەزار و یەک شەوی و کەلیلە و دەمنەیمان جە ئەلئەزهەرو مێسرینە مارانوە وەرچەم.

ئەچێگە هیشتای فرێنێ جە وەرمو بێ وەرمینە نەچڵاکیانێرە و شەو ڕۆ داڵغەشان وێشان و نامێ وێشانەن و ئانه‌ که‌ چکۆنە نامێشان بریۆ و چکۆنە چەپڵێشان پەی کۆیا. بێ خه‌به‌ر ئەچانەی کە ئانه‌ ماریفه‌ت و باوەڕی پوڵایین و یەهەردارین که‌ ئنسانەکان گەورە مەکەرۆ.

ئه‌وه‌نه‌بریا پیسه‌و هه‌میشه‌ی، ئیسەیچ نامەکان ڕوانەو ڕۆحو پیران و گه‌ورامان مەکرمێ و قه‌ڵه‌م و ئاوه‌زو وێمان گرێ مه‌ده‌یمێ به کاروان و‌ وه‌رێسه‌و ماریفه‌تیشانوه‌: بابا یادگار، پیر بنیامین، پیرشاڵیار، مه‌ستووره‌ی ئه‌ردەڵانە، مەولاناو دڵان، باوا شێخو بێسارانی و خدری ڕواری... کە پەی ژه‌ماره‌یشان و وەسفیشان یەرێ دانێ نوقتێ مەنیەوره. یەرە نوقتێ کە هەمیشەی درێژتەرین قسێو عاڵەمی مەکەران....

ئیمساڵیچ ئامایمێ بواچمێ کە هیشتای سەرو ویر و باوەڕو وێمانوە مدراینمێ و سەوای ڕۆشنتەر جە ئاروی مەوینمێ. دەسمان دان دەسو هەنگەریوە و هەتاکو ئاسۆی بێ ئه‌وپه‌ڕین، پێسەو گرد ئنسانێو ئاوەزمەندی، سەربەرزانە و بێ باکانه‌ مەژیومێ و جە ڕا و مه‌رامی گەورەو وێمان لامان نه‌دان و نمەدەیمێ.

 « یادت بەرز و پیرۆزەن شاسوارو ویرچەمەو هۆرامانی»
#سەعدوڵڵا_خوونخام(شەهریار)





طبقه بندی: فرهنگی و هنری، اجتماعی، ادبیات/شعر، اخبار، تاریخ، موحەممەد موسته‌فازاده، سەعدوڵڵا خون خام(شەهریار)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،یادٚێو جە مەرحووم کاکەموحەممەدی موستەفازادە/سەعدوڵڵا خوونخام،
نوشته شده در تاریخ پنجشنبه 26 دی 1398 توسط همایون محمدنژاد
.: Weblog Themes By Abdollah Habibi :.