کەلەبەروو شێعرا(۱٥٥)

‍ باڵاعەرعەرێ دید٘ە مــــەسێوه
ئەر هۆشەی هاڵێ گێرۆ دەسێوە

بە گفتی شیرین شەکەر ڕازەوە
خۆڵکت بکەرۆ بە ڕووی نازەوە

بنیەی دەم بۆڵێـــش به ئاواتەوە
لەرزی شەوق  مەگنۆ سەرتاپاتەوە

وەشتەرەن نەشئەش جە سەد٘ جامی مەی
 پاشەرتە کەر ســـــــــەیری باخووبەی

#هادی سپەنجی

منیچ زەمانێ جوانێ بێنێ
بە جوانی وێم خەیلێ نازێنێ

جە باخوو ژیوای نەمامێ بێنێ
بە وەشی و شادٚی پەی وێم ژیوێنێ

هەرچی وەرێنێ و هەرچی نۆشێنێ
گردٚ پەنەم گنێ، هەر چێ پۆشێنێ

سیاواو پیری ڪەوت ئەوگوڵزارم
کەردش سیاچۆ سیما و ڕوخسارم

سەرمایەو جوانیم جەردەی پیری بەرد
بازارم ڪەساس، سەهۆڵ ئاسا و سەرد

سیما و ڕوخسارم سەدٚ لۆچ ئاوردەن
قافڵەو جوانیم لوان کۆچ کەردەن

ئاڕەفتەن قامەت سنۆبەرئاسام
چەمیاو خەمینا، تەکیەگان عاسام

فرە نازێنێ بە جوانی وێم
ئێسە کزۆڵنا و پەژارەن خدٚێم

ئاخ وەشڵەی فەڵەك چەرخێش وەردایا
شەماڵوو جوانی پیریش بەردایا

کەوتایا خەیمە و هەوارگەو پیری
تێك دایا  قـەڵا و ماواو زویری

تار و مار بیێ  سپاو  پەژارەی
سوڵتانوو پیری دریێ قەنارەی

نیشتایاوە تەخت حاکموو جوانی
حوڪمش  ڪەردایا بـه شادمانی

دەورەو پــــەژارەی یاوایا ئاکام
ئاواتش بڕیێ واوەی "سیاوکام"

#سوهراب_مورادنیا(سیاوکام)

۹۸٫۱۱٫۱۹کۆچی ڕۆجیاری
دنیا چێش واچوو؟!

دنیا چێش واچوو جە دەسوو تۆوە
ڕۆ  بە ڕۆ  بەدٚتەر خەم  تازە بۆوە؟!

ئاخ دنیا سەردەن دڵ جە  بازاریت
جە چەرخی بێ شۆن پەڕ جە ئازاریت

هەزار ماجەراو زەمانەیت چەشتم
عەمر و جوانیم بە جەفات ڕەشتم

دڵ بی هەرەسگەی هێجرانانی تاڵ
وێران کەرد جەسەی پەڕ خەم و خەیاڵ

مانیای  چەرخی بە بێ تان و پۆت
پەی کێ وەفات بی تا پەی ئەمن بۆت؟!

سۆچنات ئاوات بە داخمای خەم
بار و مەینەتات جە لام نەبی کەم

هەر سات بێساتی گەردەلوولی تەم
سازابێش پەرێم ئەسرینانی چەم

عاسی جە ناڵەی دەروونی پەڕ ئێش
هەزار زام وەردەی جەسەی جەفاکێش

تیرو مەینەت و خەمات دان جەرگیم
جە  هاواری دەرد  ڕازیم بە مەرگیم

زۆخ و  زامانی پەترۆک نەبەستەم
دایێم هەر بە سۆن نە لاشەی خەستەم

تۆ هەر تاوت دا چەرخی لوول وەردەت
پەڕ جە مەهلەکەی جەفا سەرکەردەت

هەر گیسای چەرخت وەش ناما پێوایم
هەر مەینەتت شا نە باخوو ژیوایم

جە پەرێشانیم  ئەی هاوارمەن
فەریادٚ و ناڵەم  پەی دڵدارمەن

#عوسمان ڕەحیمی هەجیجی(مورید)

//////////////////////////////////////////


جه ئاوایی وەشەسیایی گومم کەردەن نێشانوو تۆ

خەموو دووریت قەرارش بەرد بیا وێڵوو ژوانوو  تۆ

که سوجدەم بەرد بە میحرابو برات،قیبلەم!بیا مۆمن

جه دین و مه زهه بی بڕیه و، گنو شۆنه و چه مانوو تۆ

وه سێن  پەڕچینو  هێجرانی چڕۆ نامێم، پێسه و جاران

به وارانوو وەفای زینه ن ،گوڵ و غونچه و ته ڵانوو تو

تەبیبوو  زامەکا  تۆ بی خەڵاتم با  هەزار ئێشێ

وەشا ئەر نەسرەوۆ ئێشش جه لام زەخمو کەمانوو تۆ

مەکێشوو دەس جه عەشقو تۆ هەتا  وەختێ ملوو گڵکۆ

گوزارت کەوت سەروو قەبرێم به رۆ تۆزەم  ئەمانوو تۆ

#ژوان
قەد٘یم دەر قەد٘یم،ئینەم ئەژنیەن
سڵاموو کوردی،بێ تەمەع نیەن

هەرچن کە سڵام،سڵامەتی مارۆ
 بەڵام سڵامش پەی ڕەئین  ئارۆ

دەگا بە دەگا ، کۆڵان و بازار
یانە بە یانە،ئەی شار پەی ئەو شار

هەواڵ پەرسایشا،نزیک هەتا دوور
نیم بە تەلەفوون،نیم مەلۆ حزوور

 ئێلتماس کەرۆ جە گەورە و وردی
بۆنەن بە قوروان سەدەقەو گردی

گنۆ تاریف دای جە قەوم و جە خێش
جە عێلم و عەمەڵ جە مەقامی وێش

وەختێو کێشابۆش ئەفیون و مەواد
وێش کەرۆ دوکتر ئاغەی بێ سەواد

بە گیانتا قەسەم شۆخی بەر دارەن!
ئەوەڵ جار زانام ، وەزیری کارەن!

بەحس و گوفت و گۆش ئێدامە دریا
ڕۆک واتم پەنە ، بێ شەرم و ڕیا

دەوران واڕیان،گرد کەسێو بێزار
کام نەمایەندە، بی خزمەتگوزار

ویرم نمەشۆ ویەرد٘ەی ساڵان
کاندیدای وەڵین،چە تۆمێش کاڵان؟

چێش کەردەن پەی خەڵک وێش و بەرنامەش
جە لای خاس و عام ـ سیان کارنامەش

ئینەم هەن دەلیل ،بڕ و بەهانە
وەسێن واز بارە،مەرد و مەردانە
 
#موحەمەد خدری داریان

قژووتاقەتیم 
هۆمەو سەبریش
شەققار کەردەنا
و
شەرابوو هێجرانی
تک تک
پیاڵەو بێمەیەلی مەپیمۆ


مەستیش بێ‌ئێفاقەن  
و
لەشی کەلەلام
پاتۆخش بندیوارەن و
ئەرواحم
حەیران، حەیران 
سوجدەو ئەو ویەردەی مەوەرۆ !!

جەواد ۱؍۱۲؍۹٨ 
فێــراق




طبقه بندی: فرهنگی و هنری، ادبیات/شعر، زوانی هه‌ورامی، سوهراب مورادنیا(سیاوکام)، عوسمان ڕەحیمی(مورید)، هادی سپه‌نجی(خاڵه‌)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٥٥)،
نوشته شده در تاریخ چهارشنبه 23 بهمن 1398 توسط همایون محمدنژاد
.: Weblog Themes By Abdollah Habibi :.