کەلەبەروو شێعرا(۱٥٦) پەی ڕۆ ئەدٚایی ،ڕۆ ئەدٚای

ئـەدٚالێ  گیانێ  هێماو  زەحمەتی
هامڕازوو دەردو ڕەنج و مەینەتی

پژمەو هەناسەیت سەمفۆنیاو ژیواین
وەشتەرین  موژدەو هـەواڵوو هیواین

بێ یاگەدٚاروو سەنعوو بارینی
نمادوو  ڕەنج و بـوردە بارینی

زوان  پەی  وەسفت عاجــزەن ئەدٚا
خامە پەی مەدحت سەرکەزەن ئەدٚا

هەست و قەرێحەم بێ زەوقەن بێ تۆ
چراوو  شێعریم  بێ شــەوقەن  بێ تۆ

هەرساتێو بیەیت سایەوسەرێوەن
دنیاو بێ  بیـــەیت تەنگەبەرێوەن

ئەرسەدٚ کۆڵەکێت شاتەو نەرەینە
شکۆو غەیرەتیت تاجووسەرەینە

تـۆ جە   هــەورامان   یادگارینی
مایەو سەربەرزی ڪوردەوارینی

بەهەشت کە ماچا نێعمەتش بێ شۆن
تــــۆربەتوو  پاڪوو  پاڵا شڕەو تــۆن

نانە بەرماری بە ڕەنجوو شانەی
نەلاینی چێروو منەتوو بێگانەی

چەشکەت نەڪەردەن نانوو منەتی
ساچیاینی چەنی ڕەنج و زەحمەتی

ئەدٚا گیان ڕۆحم فیداو مانیاییت
مەکریۆ  بەحسوو وەشەسیاییت
----------٭٭٭٭٭----------

#سوهراب_مورادنیا (سیاوکام)

۹۸٫۱۱٫۲۰ڪۆچی ڕۆجیاری
(مسمەت)

 دڵداری دڵسۆز

شەمعی جەماڵت دڵ کەردپەروانە
یاوێنەی بوڵبوڵ گوم کەردەن لانە

دڵ بیەن بریان هەرنە گــــــریانە
دۆسی دڵســـــۆزم جە من بێگانە

شکاتم عەرزکەرد وەمەحـــرەمانە

                     ٭٭٭٭
خاوی شەوانم وەنەم حەرامەن
تاریکی مەینەت کۆشکوو مەرامەن

ئایامـــــــەزانی چێشم سەرئامە؟
شەوناڵی جەئێش ناسۆری زامەن

وات تەقسیرجەمن خۆنیەن ئانە
                    ٭٭٭٭
بد٘یە وە ڕۆخسار زەعفەرانی من
بەزەییت بەی وە حاڵ نیگەرانی من

بە مات وپەشێو پەرێشانی من
کەردەنت عاد٘ەت دڵ ئیشانی من

مەتەرسی جەچەرخ چەپی زەمانە؟
                    ٭٭٭٭
دڵداری دڵسۆز ، دڵ ئارامەکەم
ئینتیهای ئاوات سەرئەنجامەکەم

ڕمووزی ئەدیب شیرین خامەکەم
فەساحەت مەئاب وەش کەلامەکەم

نوکتەسەنجی دەو ر، عەسر و زەمانە
                   ٭٭٭٭ 
شەمعی نوورانی حەرەم سەرای دڵ
ئافەرین ئەو دڵ تۆڪەردەن مەنزڵ

خیاڵت نەسیم چوون ڕایەحەی گوڵ
ساتێۆ بە بێ تۆ دڵ نیەن  غافڵ

پەی تیرئەندازی کەمانی ئەبرۆت
(سەعد)سینەی وێش کەردەن نیشانە

#میرزاسەعدوڵڵا خەدیری

ئەدٚا! عەترێ ئەگەر بێنێ و ڕەئیسوو گردٚی شەوبۆ بۆ
نیا عەترێ کە وەشبۆتەر جە سمڵ و مێخەکوو تۆ بۆ

تەماموو سازەکا تەسلیم بە دەنگوو لایەلایەو تۆ
تەنانەت سەردەسێ سازا نەی و تار و پیانۆ بۆ

سەرەو مەغروروو پاشایا وەراوەرتەو بە تەعزیما
ئەگەر خەسرەو وە یا کوورش، فەرەیدوون یا دیاکۆ بۆ

جە بەرزیت بەرزە کۆسارێ خەجاڵەتبار و حەیرانێ
چە عەودٚاڵان، چە کۆساڵان وە یا خۆ تەخت و شاهۆ بۆ

وەشا واردٚەی وەراوەرتەو سەروو سفرەو هەواریوە
ئەگەر چی خەپلە وشکێوە، کەرێ یا خۆ پلێ دۆ بۆ

بە کۆچوو تۆ ئەدٚالێ گیان هەواروو ئی دڵی چۆڵا
حەقوو وێما هەتا مەردەن فەغانم ئەر شەو و ڕۆ بۆ

سەروو هانەی کە ئێنیوە کونەی نامەردٚ کەرێ کۆمەت
میسالوو کۆمیلەو تۆ مەر وەنەوشەی پاکی بنجۆ بۆ

ئەگەر گۆراڵێ گردٚ پەرسا کە تاوا با بە وێنەو تۆ
جوابوو ئا سوالاشا هەتا مەحشەر بە چۆ چۆ بۆ

ئەدٚا ئەر حەز کەری زانی کە بێ تۆ ڕەنگ و بۆم چەینا
پەنەت ماچوو نموونەو من جە هامن مەر چڵێ لۆ بۆ

نەچڕیەن دەنگەکەش زووەن کە هۆرزەو ڕۆڵەکەم دێرا
ئەجەل دەی کەی قەرارا بەی؟سەبا نا بەش هەر ئارۆ بۆ

#عەباس غەریبی

کیانەر،:مامۆساحامی غەریبی

بە هەورامی بەرا نامم بە شانازی و بە دڵ ماچوو
جە ژیوای شارەکا بێزار بە هەورامیگەری ساچوو

زوانی کامڵ و پاکم کە میراسوو ئەدٚالێما
بە گیان و دڵ هورش گێروو و جە بێگانا هورش پاچوو

#عەباس غەریبی

ڕۆ جەهانی زوانی ئەدٚایی مەبارەک بۆ

 ڕۆ زوانی ئەد٘ایی  مەبارەک 

وەسیەت بۆ ڕۆڵەی هەورامی،  زانە
دوێ   بنەڕەتێت    زوانا   و  ئەد٘انە

ئەگەر جە دەس دەی هەرکام چا دوەی
کتێت    کەرد٘ێنێ  ، بانکدارێ    دمەی

شەنگێچت  شانا   بە  وێت  نەزانی
بێ  ئەد٘ای  خاسا  ، جە  بێ   زوانی

#حامی-غەریبی
سڵام زاڕۆ وەشڵەکا
 خونچەکا گوراڵەکا

ئەی زاڕۆڵە نازەکا
تازە باڵە وازەکا

خودٚای گەورە جە قورئان
پەرێ ئێمەی موسڵمان

فەرماوانش پەنەما
گێرمێ ڕۆچێ و بوانمێ نما

قورئان وەنەی و هەم نما
 ڕانماینێ پەرێما

ئەسڵ و فەرعوو دینیما
چەنی گرد ئاینیما

پارێزنمێش بە جوانی
ئەچی دلێ دنیای فانی

کەرمێش چراوەو ڕایما
چی دنیای و چەو دنیایما

حەرتا کە خودٚای گەورەما
ڕازی بۆنە چەنەما

وەشەن سەڵوات و سەلام
کەرمێ خاتێمەی کەلام

جە سەر حەزرەت و یاران
بوارۆ پێسەو واران

#سەیوان ئێبراهیمی(گۆازی)




طبقه بندی: فرهنگی و هنری، ادبیات/شعر، زوانی هه‌ورامی، سوهراب مورادنیا(سیاوکام)، حامی غەریبی، عەباس غەریبی، میرزاسه‌عدوڵڵا خه‌دیری،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٥٦) پەی ڕۆ ئەدٚایی،ڕۆ ئەدٚای،
نوشته شده در تاریخ یکشنبه 27 بهمن 1398 توسط همایون محمدنژاد
.: Weblog Themes By Abdollah Habibi :.