کەلەبەروو شێعرا(۱٦۷)

سەماو وەهاری

جەژنە و هەلهەلەن سروشت لێویان
ڕۆح و دڵ چەنی هەرد و چەم دێویان

سپای زۆقم و تۆف کنیا بیساتش
دارسان وائاوس دەمیا حەیاتش

سیاوکام ناکام جە کامی کاڵش
نەسیم هەرد و چەم ماڕانە باڵش

ئیسە تاسی  دڵ ناخنە دوو شششا
کامی سیاوکام  تەنیا مەرگ بەششا

نە سەر تا وە چەم چەرمەپۆش بێنە
کەفەن پۆشا بێ دڵ بێ جۆش بێنە

هەوای چەم تارنا سپای زوقم و تۆف
کەفەن شیتاڵ کەرد نەمەن ئێش و ئۆف

سەماو نەسیمی لەنجەو شەتاوا
چەپڵێ وارانی هەی ماڵی ئاوا

سروشت شادیشا ئەگەر چەم داری
سەنتووری نەسیم سەماو چناری

خۆنچە بۆ وەیوە، نەسیم بۆ زەما
بە دوو دەسماڵە کەرانە سەما

کوڕ و کناچە  مەلا دەشت و دەر
بە سەما و ئاواز شادی کەرا وەر

ئاوازوو جوانا سەماو کناچا
مەیاوۆ ئافاق ئاهەنگێ ماچا

بە شادی و شەوقۆ مەلانە پای کۆ
سیا ماچانە ، چەمانە مەی گۆ

سروشت چەنی دڵ ئامێتە بیەن
ڕەشبەڵەک چینەی وەشتەر کێ دیەن؟

جە چوار و پەنجۆ هەتا هەشت و نۆ
وەنەوشە و نەرگس چنوور و شەوبۆ

 حەڵقە بینا پەی بەزموو هۆرپڕای
 گاڵتە بە چووپی سەردەموو خوای

کۆسار پۆشانش بەرگی چەرمەدوور
پێویۆ بیبینگاش گوڵێ زەرد و سوور

سارا سەراپا سەوزیۆ جە دوور
لامل زەرد و سوور ڕۆخسار پەڕ جە نوور

«نەرگس وە مەس مەس مەدیۆ کێن ئەو کەس
گۆشەی چاک دڵ وەر نەدۆ جە دەس؟»

وەنەوشەی وەش ڕەنگ نە پای هەرد و چەم
خاڵی هێندوو فام مابەین ئەبرۆی خەم

چەم مارۆ وە حاڵ تەژنایی ماڕۆ
هەوای چەم وە خاڵ هەر دوو چەم فاڕۆ

نەسیم قاقاش بەرز خۆنچە مەبۆ گوڵ
خەم سەرەیش منیۆ وە بانی زەنگۆڵ

پەنجەی گوڵ نە تۆی دەسانی نەسیم
یەک چرکەش مارۆ سەدان زەڕ و سیم

شادی چ ئاڵاش وەش شنیۆ بە تاک
خەم بە زەبوونی لووتە مەنیۆ خاک

دڵ ئایر گرتەن هوون ئامانۆ جۆش
دەنگوو هاواری پۆشانش خرۆش

پەنجە پێکانە کوڕ و کناچە
ئێد ماچۆ: نا تۆ، ئەوشا: تۆ واچە

«ئامانۆ وەهار وەهاری شادی
بۆی عەتری نەسیم خونچەی  ئازادی»*

#ب_م_شارۆ 

وەرمەد٘ەو دەس جەدامانت دەسیچم چێرپا ڪەری
سەردەروو گۆشە وچەماتا نەجم وچەرخی ئەنوەری


سەر سەراوار ڪێشیەو دار ماتڵیچ تا نەفخی سوور
مەڵهەموو گرد٘  زامەکاما شەوێ  لامەو سەر ڪەری

#حامی غەریبی


شاکە و خان مەنسوور
شاکە و خان مەنسوور، دوێ شاعێرێ هەست ناسکێ (بە قەولێ سەدەو دوانزەو کۆچی مانگی)، بە شێوەو دەمدووی شێعرێشا پەی یۆترینی واتێنێ. زوان و تایبەتمەندی شێعرەکاشا چا سەردەمنە وەرچەما. شێعرەکێشا ساڵەو ١٣٧٩ کۆچی ڕۆجیاری بە کۆششوو بەڕێز؛ محەمەدعەلی قاسمی و سەروو ئەرکوو ئێنتشاراتوو سەلاحەدین ئەیووبی ، جە قاڵبوو کتێبیەنە چاپێ بیێنێ. هەرچند ڕەنگە تا ئیسە ئانە کە لازم بۆ سەروو ئی دوە شاعێرا و بەرهەمەکاشا چاپ نەبیەبۆ.  
ئینەیچ بەشێو جە شێعرێوە کە خان مەنسوور یاونۆشا گۆشوو شاکەی:
شاکە نگا کە وە سەراوبازان
شاکە نگا کە وە تیرەنازان
شاکە نگا کە گوڵ نەخش ڕازان
بڕێ ماڵ خسیە وە سەراو بازان
گەل گەل نازاران شۆخ شکار چاو
وە پەنجەی شمشاڵ یەک میان قەشاو
لە سەر سیەقەڵا لە لاشە بە تەن
پەرێ خەم چەم کول کورپە وەتەن
نازک نەهاڵام هان لە خەم چەم
وەناز گوڵ مەخۆن وە پەردەی هەرەم
گاگا چوو سەرسەوز قووتە بوون لە ئاو
وە پەنجەی شمشاڵ یەک میان قەشاو
گاگا چوو گوڵان ڕوو ئاو پۆشانەن
وە وێنەی سەرسەوز ڕوو ئاو نیشانەن  
سەرچەمە:زایەڵە

دڵوەش کریا بێ زمسان تەماما
نەزانام  وەشی  پەیما حەراما

یانه نەمەنەن بیەن دیلخانە
وێشا شاراوه قەوم و بێگانه

کسمما ئیسە حەر دەس شتەیا
وتەی و خەمباری و یانە نیشتەیا

کورۆنا ئامان بێ دەوا و دەرمان
هەر کەس بێ عارەن نیاش پەی ئەمان

نەدٚار گیرودٚەو نەدٚاری وێشا
دارا چووزانۆ گیرودٚەی چێشا؟!

تۆ به تەماعه و کیسەی پەڕ و پان
مەبی به ئێنسان بێ عەقڵ و نەزان

بدٚیه دڵسۆزا و حاتەماو عەسری
بیێنێ قەرەبوو پەی کەم و کەسری

سا تۆیچ ئەی برام ، هاموەڵاتی من
بۆ  پێوه دەردا  بەربارمێ  جه  بن

بەش خودٚا ڕەحمش وەش کەرۆ کارا
دەرمان   برمانۆ  پەی  دەردەدارا

یا ڕەب بە خاتر حەزرەتی ڕەسووڵ
دوعاو مەخلوقیت کەرینە قەبووڵ

#فەرەیدوون ڕەشیدی  





طبقه بندی: فرهنگی و هنری، ادبیات/شعر، زوانی هه‌ورامی، حامی غەریبی، بێهرووز موحەممەدپوور(شارۆ)، انتشارات زایەڵە،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٦۷)،
نوشته شده در تاریخ چهارشنبه 28 اسفند 1398 توسط همایون محمدنژاد
.: Weblog Themes By Abdollah Habibi :.