کەلەبەروو شێعرا(۱٨۰)


سەوزەکێم! تۆ به‌رزه‌ باڵات بەرزوو داڵانی مشۆ
یاگەسەیران و هەوارگاو کۆنە ساڵانی مشۆ

سەرقولەش بنجەو چنووروو زڵفەکات پۆشان تەمام
بێ خەبەر! دڵدارەكێ گردٚ ئارەزوو تۆشان تەمام

گجیەکەت سەوزارێ تەختش پەڕ گوراڵەی سوور و زەردٚ
ماچی لۆن جارێنە پۆشانش هەوار و شاخ و هەردٚ

جۆ به‌ جۆ وەرواوێ ئه‌جیۆ هەرسی مننێ سەر کەرا
چا هەراڵەبرمەکێو کوڵمات عەجەب مەحشەر کەرا

پیر و ئوفتاده‌ و ددٚانم کەل بیەن پەی گاز و گەز
هه‌لچه‌چه‌رمێت مه‌ر خوراکم با به‌ ئشتیها و به‌ حه‌ز

دەورەشا دێنی دڕەی گەونا بە گیانیت چڵ نەدٚا
پاسەوانێتنێ ڕەقیبێو من،بە بەرزیت دڵ نەدٚا

ساقی ده‌ورێ ته‌ر پیاڵەی پەڕ شەرابیت بارە زوون
من زووه‌ن په‌یکێ شه‌رابوو ئا دەموو تۆم ئارەزوون

تا کە هەورامان وەڵاتم بۆ و هەواروو ئی دڵا
من چەنیو "سەعدی" جە لاو تۆما هەوار و مەنزڵا

#سەعدی_غەریبی

ئای چن بێ دەنگیم مێشۆ وەختێ بێ تۆنا چێگە
وەهار ئامان و بێ تۆ من ڕەنجەڕۆنا چێگە

نەیاوای به تاقەتیم تەلوو سەبووریم بڕیا
هەناسەم کەوتەن لێژی چی چاڵە کۆنا چێگە

شەوێ بێ تۆ نەسرەوا سەر ئێشەوعومری تاڵیم
هەتا دیدٚەت نەوینوو دیدٚەم بێ شۆنا چێگە

مزگی لا یانەکەیتا دوعاما مەگێرۆ وێ 
پیسە بارەگاو  پیرا پەڕ جە پەڕۆنا چێگە

ئارۆ دەماخوو شادٚی هەر پیسە کاوێ بەرزا
ئیسەیچ نەزانام کەشێ  چی یۆی مەدۆنا چێگە

من و هاناوەی زەوقی ،کونجێ دنج و وێرەگا
سێتارەیوە بە گرەوای ماچۆ چکۆنا، چێگە؟

من چا ڕوەو گمم کەرد نیشانەو یانەکەیتا
گردوو جۆکا ئی دنیەی لچێم مەخۆنا چێگە

#فەرید_عەباسی

ڕوێ دە جارێ سیام و جەژنەن
چەم نەئیستێلال ئادید٘ە وبەژنەن

پارشەوو ئیفتار بەینش خاڵێوەن
وەربانگم دەم و لێوە ئاڵێوەن

#حامی-غەریبی


ئازیزەکەم

ئەندٚە چەمەڕاو تۆ بێنی

ئاڵف چیرەو پایام سەوز بی!

ماچوو تاموو وەشیت پوەن؟
کە شەوگاریش لاومن ڕوەن!


#سەباح شیانی سنە،

وێم
واروو وێمەو نیشتەنارە
و
هەناسا 
کەردەنا چێرپا

سەرەم
سێوەسوو سەرەیمەنە 
حاتەمی مەکەرۆ
و
چنگۆڵیم
لەشی شڕوو
ڕۆحی شپرزیم
تەقەڵە مەڐا .

خیاڵەن
حاتەمی کەرۆ
وەرنە من 
کیسە هاڵی بێ کیسەیینا !.!

جەواد ــ حەمزە
#فێـــــــراق



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، حامی غەریبی، جەواد حەمزه (فێراق)، فەرید عەباسی، سه‌عدی غەریبی، سه‌باح حه‌سه‌نی شیانی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨۰)،
نوشته شده در تاریخ پنجشنبه 11 اردیبهشت 1399 توسط همایون محمدنژاد
.: Weblog Themes By Abdollah Habibi :.