کەلەبەروو شێعرا(۱٨٤)


ئای چن غەریبا وێرەگاوشێعرێم
بەیدێ با بلمێ پەی دەگاو شێعرێم!

سیاو وا کەوتەن کەلوو خەمباریم
چی کەس مەکەرۆ مەرحەباو شێعرێم؟!

چنووروو تاسێم پڕان چا ڕۆوە
خەزانش کەردەن بارەگاو شێعرێم 

دڵ بیەن قەقنەس چەم بیەن لێڵاو
تازە وای بەردەن سەرپەناو شێعرێم

قەڵاو زەوقوو من مەگیریۆ بەجەنگ
مەگەر پەی کەسێ بەینە ڕاو شێعرێم

دوودەرەو ڕۆحیم کریانەو پەی تۆ
چی نمەی وینی سکاڵاو شێعرێم

تاڵێم جە نەرگس تاڵیم بۆژانە
وەهارەیم نەدٚی پەی باڵاو شێعرێم

دەسشا ئاستەنا خێڵوو پەپوولا
مەگەر قاڵاوێ بەیا لاو شێعرێم!

#فەرید_عەباسی

وەرگی لینی حەزیم
کەفتەن پەلەقاژێ هاری
هاکا واز بۆ

دیاو لارەملیەکا و
بۆپڕووزوو هەناسە خامەکا
دڐانێش 
چەخماخێ مەشانا

بێ‌قیمەتی هەناسەی و
کێشانەو شەرافەتی بە کێشەو حەزی !
گرتەو دەسوودیمی
بە هەرسی وەرپڕی و
بزەو خۆای
بە ئاویەو خەجاڵەتی
پەنجێ کێشۆ قەفەسەرە !

ڕەحم 
بە ئێرزا مواڕاوە
یاسا
پەڕەن پەڕانتێزێ و 
خەتێ سوورێ

منیچ
سەیاڐی بێڕۆزینا و
سماقەو بئ‌ئەندیشیم تەکیان
هەر ڕۆ ڕاوە مەکەروو
نەچیرم
حەوایرە بە تەیارە
جاڐەرە و مێڐانێرە
کرژوو تالیم دریاو مەحکەمەی
کیسەش
پەڕ جە فەننوو فێڵ

من
هەرەسگارە و لاپارە
توولەڕای کۆروە بیێرە
هەژار و پاتێ چەکێ

ڕاوەنە و ڕاوڕاوانی
چەمەڕا و چەمویار
شۆنپاشەرە
ئاڐ گرتەنش بێعانە
سێوەریچش نەێ قەرەوڵ
ئاورای بازۆم!

شانەم پەڕەن دەسنووسێ
شێخی و ساحێب ڕاوی (م)
ئیبنی حەجەر
کتێوی ڕمڵی و ڕۆچێ سەڐەقەی
بێ ئیفاقەن ڕاوەشەنە

جاروو بار مەێنە وەرمم
تا هارە ئاساوو دەمێ
چاگەیچ
مزە و بارمتەم چەنە وازۆ!
نمەگنۆ دامی
تازەم زانان
ئاڐەن ڕاوەو من کەرۆ 

ئاڐ
ڕۆەو بەحرارە بە بەلەم
وەڵات بەوەڵات گێڵۆ
من
تۆەنەڕەقاو تەتەیرە
بە سواری گۆچانەکێم
گاە
هەناسەم کەرا بڕ
قۆڵاخی هاڵیم گێڵۆوە
ڕاو ڕاوانی و
ڕاوەو نانی 
وەرگوو حەزیش هار کەردەنا !.!

#جەواد ــ حەمزە/ فێـــراق


دا بزیه‌ره‌ وه‌روو به‌ره‌ی من ئاره‌زوو چناریما 
ژه‌ره‌ژ ئاسا ڕه‌وتێ که‌ره‌، چن تاسه‌و له‌نجه‌ و لاریما

ئا به‌هه‌شتوو سه‌ر و سیمای، جار و بارێ مه‌شاره‌وه‌
ده‌ک چارشه‌وه‌کێت وا به‌رۆش هه‌وه‌سوو لاله‌زاریما

هانه‌چه‌مه‌و ئا چه‌ماته‌ که‌ چه‌م وینۆش چه‌مێش ملا
دا هه‌رسێچ تکنه‌ره‌ په‌ی من، ته‌ژنه‌و ئاوۆ هه‌واریما

وه‌روو سه‌ر‌داو مه‌یله‌که‌یتۆ په‌تاو ئاڵامه‌تیم گێرته‌ن
فڕ ده‌ ئا سوخمه‌ گوڵناره‌ی ئێحتیاجوو هه‌ناریما

ده‌سووپلی وناڵینت که‌ به‌ ونوو دڵیم سوورا
بۆ به‌ هه‌رسۆ چه‌مام شۆره‌ش لافاڤوو نه‌و وه‌هاریما

هه‌رچی مۮیه‌و په‌ی ئا زوڵفا پۆلشا وارۮه‌ن سه‌روو کوڵما
باخوو به‌یه‌کات به‌ دڵما، به‌ڵام حه‌ر خۆفوو ماریما

که‌م فه‌رماوه‌ زه‌رده‌ خڤه‌ به‌ حاڵه‌تی به‌ۮ حاڵوو من
په‌ی ئێعتێباروو ڕه‌قیبی و خڤه‌و تۆ شین و زاریما

ئێساڵ تا ساڵه‌ما دا سه‌ر، هه‌ر ناڵه‌ بێ و ئاخ و چه‌مه‌ر
په‌رسه‌خانه‌و خیاڵینه‌ هه‌ر ئاخ و دوو په‌ی پاریما

به‌ ئارۆ و سه‌به‌ی ناڕاستت، وه‌هاروو عه‌مریم کیاستت
ئیسه‌ قابێز چه‌نی پیری خه‌ریکوو کار و باریما

ئه‌ر چن نه‌فه‌سێم مه‌نه‌بۆ، یا نیمه‌گیانێم چه‌نه‌ بۆ
یا ئاواتێ دڵمه‌نه‌ بۆ، ته‌نیا تاسه‌و دیۮاریما

به‌ ساۮاری و کز و کۆری وشکاوۆ ته‌مه‌نیم ئاما 
چه‌نی جه‌فا و جه‌وروو زۆری هاواروو ئاخر جاریما

به‌ بێ ڕه‌حمی و بێ مروه‌تی، منی هه‌ژاری ده‌س په‌تی
کیانی په‌ی قیامه‌تی، خه‌موو "سه‌عدی" هه‌ژاریما

#سه‌عدی_غه‌ریبی




طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، فەرید عەباسی، سه‌عدی غەریبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨٤)،
نوشته شده در تاریخ شنبه 27 اردیبهشت 1399 توسط همایون محمدنژاد
.: Weblog Themes By Abdollah Habibi :.