کەلەبەروو شێعرا(۱٨۹)

‍ ‍ تەزمینێو سەروو شێعرێوەو مامۆسا مەولەوی

ئازیز ئەر وینی وای هەناسەی سەرد
داخ دووری تۆ تا به ئەفلاک بەرد
به جام فەسڵت پەنەم وەردی دەرد
"گۆیا جە لای وێت ئینە خاست کەرد 
جیاییت چەنی من وە بەین ئاوەرد"

به مار هێجران کۆرپەی وەفات گەست
ئیسه چەنی کێ نەوپەیمانت بەست
بەش هەست شەوقت کەرۆ به ناهەست
"هەی پەی وێت نەبۆ شۆخ دید٘ە مەست 
یارێوتەر وێنەی من بگنۆت وە دەست"

کێ بۆ پێسه من نیشته بۆ پای تۆ
سەرمەست ئەحواڵ حاڵ و هەوای تۆ
به گەردەن گێرۆ وەی ناڕەوای تۆ
"بکێشۆ نە ڕای جەور و جەفای تۆ 
بزانۆ وە حاڵ غەمزەی ئیمای تۆ"

بەڵام تۆ به من یەند زۆخاو وەردی
ڕەنگم مەرده‌‌شێو نیشتەن وه زەردی
ئەغیاران ماچان یه چۆن نەمەردی
"سا چوونکە وەی تەور قیبلەم پێم کەردی 
وەفای عەهد و شەرت وە سەر نەبەردی"
 
یا چوونکە وەفام تەعبیر دای وە شێت
ئاخر ئەی بێ دڵ بسپارووت وە کێت؟
ڕەویەی بەد٘حاڵیم برمانۆ پەرێت
"مەسپارووت وە دەس بێ‌وەفایی وێت 
 تۆیچ سەرگەردانی من بەیۆ نە ڕێت"

      #یاسر_ڕەشیدی

چا ڕۆوە لەنجە و عێشوەت کەفت نە چەم
سینەم بی مەزرای کشت و کاڵی خەم

چەم ئاسا نە چەم سەرڕێزی سینەم
فێراق بی فەرهاد، تۆیچ بە شیرینەم

ئاڐ تاقوەسان کەرد بە نەقشی دڵبەر
سەنگ کەرد وە تەختی شازادەی خاوەر

ئارەق مت نە پای تاشیای قۆڵەنگ
ئێران و تووران دەنگش دا وە دەنگ

کەی حەننەر کەردەن فەرهاڐی چینی
سەنگ کەردەن مەنزڵ ئەشقوو شیرینی

تەوەن کەی بیەن وە ماوای دڵبەر؟
مەحاڵەن داری ئەشقش بەێ سەمەر

بەڵام ئازیزەم شۆخەی مەکینەم
من تاشام نەخشت، نە تەختی سینەم 

متم هوونی دڵ پای عەهدی وساڵ
ڕەشتم خاڵی زۆنج گۆشەی لچی کاڵ

تا هەر سات نەفەس باوەرۆت نەزەر
سینەم مڵکی تۆن شۆخی نازپەروەر

نە سەنگی خارای بێستوونی سارد؟
نەخشی شیرینش ئەو جا بەرد فەرهاد

جەواد ـ حەمزە
فێــــراق  ۹؍٤؍۹۷

‍ ‍ ‍ باباشێخ ئامان،باباشێخ ئامان
بیمارێ ئامان،پـــۆژیای زامان

ئامان به جەسەی سۆتەوە پیرم 
بە زامی عەشقی گوڵێ ئەسیرم 

دا گۆشه چەمێ بێساران ماوا 
دەوا پەی دەرڐەو دیڐە سیاوا 

ئاخ پـەی شەفایێ هۆ بابا شێخم 
بۆ وەش هەوایێ  هۆ بابا شێخم
 
ها نەفەس بــــڕیان یا پیرم ڕەحمێ 
بەشکەم دەوا بۆ به مەڵهەم زەخمێ
 
هەنگەکەو خەمی پورەش دان جەسەی
وەی ئامان حزوور پـەی پەیمان بەسەی

ماچان جـه ڵاو تۆ مۆراڐ دەوا بۆ
دەواو بێ ڪەسی دڵ ئەسیرا بۆ 

ماچان ئاسانـەت  خەیڵێن  مەڵهەما 
با خاکش کەرمێ به سۆرمەو چەما

به سجدەو عەشقی کەرمێ هاوارێ 
بەش یاوۆ دەوا پـــــەی دەرڐەدارێ 

یا پیرم به عەشق بێسارانی عەشق 
دەواما ڪــەری به دەرمانی عەشق 

ڕوەم وستێنه ئــەو بێسارانی 
باباشێخه کەم دەرڐەم مزانی
 
فێڐای ئاسانەت مۆراڐ گیرانەن 
ئاسانەت پـەناو دڵ ئەسیرانەن 

کەرەم کەر شێخم به سەوزی دەست 
به ئا پەیمانه چەنی حـــــــەق بەست

دەوایێ بنیەی وەسەر زامەوە 
شـەرابی شەفا بنیەی جامەوە 

جه ئاسانەی تۆ کەس خاڵی مه لۆ 
بێ یاوای موراڐ دەس هاڵی مه لۆ
 
لاچەمێ شێخم مۆراڐ حاسڵ بۆ
ئۆمێڐ بڕسۆوە هـەزاران چڵ بۆ 

شەرتەن ئەر شەفا یاوۆ وە زامان 
ئاسانـــەت په ی من ببۆ وە باوان

#خەمیار_هەورامی


‍ (باباشێخ)

هــــۆباباشێخم،پەنای دڵ ڕێشان
هانام ئاوردەن،وێنەی دەروێشان

هامفەردێ کەوێش شیفان پەی زامان
پەی شیفای زامان،پەی لاو تـــۆ ئامان
 
ئامان بە جەسەی خەستەی ئێشەوە
ئــــــەوگارەن بەزام دەردی وێشەوە

پێکای پەیکان نیــــــم نیگای یارەن
دڵ ناواك وەردەی عەشقی دڵدارەن

هامفەردم لێـــــــوەی بێ مەیلی لەیلەن
پەوکای قەیس ئاسا ماواو تۆش مەیلەن

ئازیز دڵســــــۆتەی ئاهیــــری عەشقەن
(سیاوکام)شێوە،هەرعەشقش مەشقەن

قەلەنـــــــدەرئاسا، بە ڪەشکۆڵەوە
دڵ ڪەیلی مەینەت،خەم بەکۆڵەوە

ســــــــەر بە ئاسانەی مەزارت ساوان
زام زەڐەی عەشقەن،مەگێرەش تاوان

خۆجە بارگەو تۆڪەرامات بێ شۆن
دەردەڐار پــــەناش بە هیمەتوو تۆن

یاپیــر، هامفەردم پەی شیفا ئامان
مەرحەمەت بەتۆن،دەسم بەدامان

ماچان جەلاو تۆ مـــــوراڐ حاسڵ بۆلل
عاشق بە دیڐار مەعشووق واسڵ بۆ

مەڵهەم بە پەی زام ، هۆ باباشێخم
بەڵ یاوۆ بــە ڪام ، هۆ باباشێخم

بایەقــوشی خـەم باڵێ نەشانۆ
وە ئاسانەش دا هەرگیز نەوانۆ

هەنی نەڪێشۆ ، ئاخ،پەی شیفای زام
گیـــــــــرا بۆ ڕجای دڵەی(سیاوڪام)
------------٭٭٭٭٭٭------------
۱۳۹۷٫۱٫۱۰ ڪۆچی ڕۆجیاری

#سوهراب_ مورادنیا(سیاوکام)



طبقه بندی: فرهنگی و هنری، ادبیات/شعر، زوانی هه‌ورامی، یاسر ڕەشیدی، جەواد حەمزه (فێراق)، سوهراب مورادنیا(سیاوکام)، حێکمه‌ت موحەممەدی(خه‌میار)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨۹)،
نوشته شده در تاریخ چهارشنبه 28 خرداد 1399 توسط همایون محمدنژاد
.: Weblog Themes By Abdollah Habibi :.