پەتای فەرهەنگیە یا ئاڵامەتی فەرهەنگی/حەمەشەریف عەلی ڕەمایی

نویستەی مەتنیە سەرو مەوزوعیوە ئاندٚە ئەهمیەتش هەن کە نوسەر وەر جە گرد چێویە تەکلیفو وێش چەنیش رۆشن بکەرۆوە کە پەیچێ مەنویسۆ و پەی کێ مەنویسۆ ، مۆخاتێبش کێن ؟ ئەگەر حەر پەی دڵو ویش مەنویسۆ ، هەر جۆریە کە کەیفش وازۆ متاوۆ بنویسۆ، وەلێ ئەگەر گەرەکش بۆ پەی ئانەیە بنویسۆ ، کە خەڵکان تەریش یاواشەنە و سودش چەنە بەرا ،ئێتر چێگەنە مەسڵەحەتی شەخسی بە نەفعەو مەسڵەحەتی عمومی ،مەكێشۆ کەناروە و نویسەندە چاریەش نیەن ئیلا ئانە نەبۆ کە مل کێشۆرە پەی نەفعەی عمومی و جەماوەری و جە خەیرەو تاکەکەسی چەمپۆشی بکەرۆنە و ویش جە سەکۆیە بەرز تەرەنە ، نیشانە بدٚۆ ئەگەر گەرەکش بۆ نویسیاکەش بۆ بە میراسیە نەتەوەیی و ماندگار ، مشیۆ پەی ئا هەرمانێ چندٚە چێوێ نەزەرە گێرۆ شایەد پاسە بتاووٚ بە هەدەفیش نزیکوە گنۆ پێسەو :
١—زوانو نویسیەی ، چەنی زوانو قسەکەردەی ، بە تایبەت جە مەقالە نویستەینە و مەوزوعی عمومینە،جە یۆترینی جیا کەرۆوە . پەی ئانەیە ، گردکەس بە راحەتی بوانۆشوە و حاڵیش بۆ .
٢—چی نەوعە نویستەینە، رەوان نویسی کەرۆ بە عادەت بەڵام جە نویستەی ئەدەبی پێسەو داستان نویسی، زوانو قسە کەردەی یاموحاورەی ،لازمەن چون جە شەخسیەت پەردازینە ،شەخسیەتەکان هەرکام مەشیۆ،بە لەحنو وێشا قسێ کەرانێ .
٣—ئەرەمتەو نوسیەکەیش،ویریە وێمانە بۆ نەک تەرجومەو فارسی یاکوردی .فرەو جە ئێمە ،هیچ مەلاحیزیەما سەرو ئینەیوە نیەن کە ئا مەتڵەبە مەنویسمێش، ئایا هەن چوارچێوەو جوملەپەردازی هەورامیانەینە یا خەیر؟ 
 ٤ـ کاریەما کە فرە شپرزەو خراوەن ئانەنە ، جومڵێ کوردیی، مارمێ دلێ نویسیاکاما .کەچی وێما ئاجومڵامانە هەنێ بە مانایە تروە پێسەو: کەڵک ، مێژو ، کاریگەری،و....
٥—فرەۆ نویسەندەکاما، جە نویسای مەتڵەبەکان، کەلیمەکان ،هەرپاشێوە مەنویسا کە وەختو قسەکەردەی ماچانێش پێسەو :
چون کە جە واتەینە ماچمێ چن وەلێ جە نویسیاینە مشیۆ ئەسڵەکەش بنوسمێ کە مەوۆ : چند. چنە =چندە یا مەنویسا: گۆژ کە درۆسش ، گۆشەن ، دەرز = دەرس .
جە کوردینە، کەڵک بە ماناو سودین و چون هەورامینە ، کەڵک مانایەتەر مەدٚۆ درۆس نیەن بارمێش ئێمە کەڵک بە لچو بانی  ماچمێ (کەڵکە پاسار) یا رێز کەحەر فرە ناشیانە کەوتەن یاگێ ئێمە بە ماسەی، ماچمێ رێز  یاریزەوڵ یانێ رێزەنان وهەر پاسە مێژو بە یاگێ ویەردەی ئێمە بەزاڕۆیی گەمە کەرێنمێ بە یۆترینی واچێنمێ : وڵێشو مێژو من بەتۆ مێژو .چی جومڵەنە مێژو بە دوێ مانای ئامان مێژوی ئەوەڵ عەدەس مێژوی دوەم ئەرزش .پێسەو: مێژو  ،مێژی ، مێژۆ ، مێژمێ ،مێژدێ ،مێژا و....
٦— فرەو کەسا بە تایبەت هەورامیەکاو ئەودیمێ وەختیە هەورامی قسێ مەکەران جە سەدی نەوەدشان کوردین و هیچ رەبتیەش بە زوانی هەورامیوە نیەن .
قەرزکەردەی(وامگیری) جە زوانیەو پەی زوانیەتەر وەختیە زەرورەن وێت واتێ یا کەلیمێت نەوا وەیلا ئاوردەی بێ حێساب و کێتاب کەلێماتی زوانیەتەر بێ پەشیمانی چێوێەتەر نیەن زوانی ئەسڵی هەر وەختیە وێش شەکناوە ئەویشان مەوزۆ بەروە .
دەمایین مەوزوع ئانەنە بە راسی گردما گیرو گرفتی نویسیای و قسەکەردەیما هەن بەشکو زەڕیە مەسئولیەت  قەبوڵ کەرمێ چون ئانە کە مەنویسمێش هەم دەسمانە بەرمەشۆ وهەم دماتەر مەمانۆوە ومەگنۆ وەرو قەزاوەتو بەرەی دمایینی .
        حەمەشەریف .ع ٩٩/٤/٨ سنە



طبقه بندی: فرهنگی و هنری، اجتماعی، ادبیات/شعر، زوانی هه‌ورامی، موحەممەدشه‌ریف عه‌لی ره‌مایی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،پەتای فەرهەنگیە یا ئاڵامەتی فەرهەنگی /حەمەشەریف عەلی ڕەمایی،
نوشته شده در تاریخ یکشنبه 8 تیر 1399 توسط همایون محمدنژاد
.: Weblog Themes By Abdollah Habibi :.