کەلەبەروو شێعرا(۱۹۲)

گوشێو جە ئەفزارەکاو ژیوای قەدٚیموو
              هەورامانی

 با دەورەی وەڵین پەیت کەروو بەیان
ژیواو نازارا و  ڕەسموو قەدٚیمیان

گۆش دارە هاوار دڵەی خەمباریم
باپیری کۆڵ کێش مسیبەتباریم

یانەش نیان یۆ بە کۆڵ و زەحمەت
بە ڕەنج و شانەی غیرەت و هیممەت

بێ وچان کۆشان بە لاشەی کزۆڵ
ژیوایێ سەختش کەردەبێ قەبۆڵ

كەی فەرامۆش بۆ وەشی یاتاڵە
ژیوای ویەردەی چننەها ساڵە؟!

ئینە جە نەقڵی پیری ویەردەن
خەڵکی سادٚەپۆش عەمرش سەربەردەن

خوراکش پەتڵە و دوێنە و شەلەمین
بەرگش جە پەمەو گڵێمی پەژمین

بە بێڵە و زەنگەن کاڵای زەمینا
بە خەلە هاڕا و  ئاساو توەنینا

چۆخەوڕانک و گجی هەڵاوە
بە دەس  ورازیان هەتا کوڵاوە

فەرەنجی و پەسەک چۆخەوڕانکی کاڵ
بەرگوو هەورامی سەرچەمەی کەماڵ

خیگە و هەڵیزە و هەم کۆنەو ئاوێ
جە دەس کرداروو   باڵا  لەولاوێت

کونەڵانوو ئاوێ جیای یەخچاڵێ
یاگۆ  ماس و دۆ  کەرۆ  بزەخاڵێ

یەرەکۆچە  پایەو ئارگا هەڕینێ
ساجێ ماسۆڵەو تەشتە مسینێ

تاق و تەرواڵە و     لاکان و یانەی
جیای کابێنیتی  پەی مەدٚبەخانەی

كەنووڵەی هەڕین یاگێ ئاردەکاش
تفاقش  جەم بێ  پەی  نازارەکاش
ت
تەیمان و نەیجەی تێخە و یانەکەیش
دایێم نوور  وارێ بەر و  بانەکەیش

شۆڵەو چراوێش جە دار ئەرخەوان
پەی  ڕۆشنایی  تاریکەوشەوان

قەندانێ چوێنێ  پیاڵەی هەڕین
پەی دەسکرداراش هەزار ئافەرین

کیسەو تەماکۆیش گڵێمە پەژمینێ 
جیای قاقەزجگەرەیش سەبیلە چوینێ

نەیە جە پەمەی موومشان  کێشتەن
پەی ئەفزاریشان  نەخشان  ڕەشتەن

نەیەی مووم کێشیای جیای نەبڕی
پەی دەورەگێرتەو کڵاشوو کڵاشدڕی
 
دووکەو دوو کاوێچ  دەزگاوکاری بێ
ئەفزاروو  جوڵای  قەدٚیم  یاری بێ

بە دەفە و هەوجەڕ پەنجێ نەخشینێ
ڕازنان گڵێم و   مەوجێ  ڕەنگینێ
 
تەنافەو  دەسوو  یارانوو  خێڵی      
جە موو  بزێ بێ  جیای  بۆکسێڵی

بارووت وەش کریان بە دەسوو وێشا
 جە گەردو مەڕاو   بەرزوو ئاکەشا

مەتێش ڕازنان جە دواڵ و کەمان
یۆ جە ئەفزاراو   سەناتی زەمان

تۆکڵوو هەناری  تیجارەت کریان
بریان  سونگرو  خەلە  ئاوریان

ساقە تەماکۆ  مەشهوور بە دەمار
جە ئێراق  ئامان  بە کۆڵ و  بەبار

پۆسوو گاومێشی  پەی چیرەپاڵا
سەناتی هەورام  خاستەرین کاڵا

تۆکڵ و بەلووی   ڕۆنیاس و  لیلەنگ
پەی جل وبەرگی پەنەش كریان ڕەنگ

خمخانە بیەن    دەگاو نوێنی
ماواو هونەر و  خاکوو نگینی  

چوخەوڕانک و  فەقیانێ  چەرمێ
مشکی ئەڵوەننی کڵاشێ نەرمێ

هەنجیر و  وەزی باخەکاو دەرەی
پەی زمسانی بێ وەخت و شەوچەرەی

ئینە بێ گۆشێو    ئەفزارو کارا
ئەفزارو  ژیواو    قەدٚیم  نازارا     

 منویسوو هەورام وێش کەفاک زانان 
کاڵای خارجیش  بە هیچ  نەوانان

#عوسمان ڕەحیمی هەجیجی(مورید)  

شۆڵەی شەرای گڕ وەنینم بەرزەن
قرچە و کڵپەی هوون یاران سەرتەرزەن
شاهۆڵە هەرچن بێڕەحمیت نمانا
پارێزنایت پەرێ ئازیزان فەرزەن

جەواد ـ حەمزە
# فێــــــراق



ڕۆ ڪە لار بۆوە  بەقت لاڵ وانۆ
قشقێڕە مەیۆ وێش بە بەق زانۆ

مڵێ یانەڪەیت ، ئاسنیت  ژاوا
لوقمان بی ڪەرات شوانەوگاوا

#حامی- غەریبی



طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، عوسمان ڕەحیمی(مورید)، حامی غەریبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱۹۲)،
نوشته شده در تاریخ چهارشنبه 11 تیر 1399 توسط همایون محمدنژاد
.: Weblog Themes By Abdollah Habibi :.