کەلەبەروو شێعرا(۱۹٥)

قوربان!قوربانەن ، جەژنەن ، شادیەن 
دەس نە گەردەنەن ، رۆی ئازادی یەن 

هەی دەس بۆس دەس بۆس وەش نیگارانەن 
خەیر ، پا بۆس پا بۆس خاتر دارانەن 

کۆن کوشتێو ، باردێی گوڵ جەمینانەن 
هەی سەر ، هەی ئەرواح دڵ خەمینانەن 

هەرکەس گیان وە کەف پەی نیگارێوەن 
هەریەك قوربانی وەفادارێوەن 

سیوای سەودایی هەراسانەکەت 
مەحرووم جە کەفتەی پای ئاسانەکەت
 
نە پەی چەم سورمەی گەرد پاڵاتەن 
نە پەی گیان قوربان بەژن باڵاتەن 

مەرد پەی "ئۆسا دەی"بێ درێغە کەت 
بسم اللە تەکبیر دەس بە تێغە کەت 

پەی قوربان کەردەی ناڵە نەی ڕەنگ بەی 
چێش مبۆ ئەر بەی ؟ وەی پەی من ئەر نەی 

سا تویچ من بەرە ، وە قوربانی کە 
من وە قوربانی ڕای ڕەببانی کە 

ئەوسا تۆیچ پەی وێت خەیرێت کەردە بۆ 
منیچ کەم تەر زووخ دەردم وەردە بۆ 

مەعدوومی بەدٚبەخت ناتەمامەنی 
ڕاسەن بێ دەوڵەت خەیاڵ خامەنی 

قوربانی مشیۆ جە عەیب بەری بۆ 
فیدایی پەسەند ڕای دڵبەری بۆ 

تۆ پا شکستەی بەرد هەردەی دەرد 
چەم کۆر مەینەت ، تەن زایف ، ڕەنگ زەرد 

خەیاڵێت کەردەن جە رووی نادانی 
چ لایق وە تۆن ڕوتبەی قوربانی

#مامۆسامەولەوی
چراغ قوربانەن... 
ئینە عیدی نۆ جەژنی قوربانەن 
زەمزەمەی تەوحید ڕای حاجیانەن 
قوربانی قوربان ئەمری سوبحانەن 
داراو نەدارا مسکێن و دەروێش 
هەر کەس مەکەرۆ قوربانی پەی وێش 
تۆیچ ئەمن بەرە بۆ قوربانی گاە 
قوربانیم کەرە چوون خلیل اللە 
تیغی بێ درێغ بنیەم نە گەردەن 
تۆ(ساحیب)سەواب من شاد وە مەردەن 
منیچ بەو قوربان منەت بارەنان 
قوربانی قوربان باڵای یارەنان

#مامۆسابێسارانی

‍ (ئازیزدیم بە چەم)
ئازیز دیم بە چەم ، ئازیزدیم بە چەم
دڵ بە موژدەی خەیر ، ئازیز دیم بە چەم

زۆڵفان سیامار ، گەنجی زەڕ پۆشان
دڵ زەهری تاڵیت چوون شەربەت نۆشان

توڕڕەی تاووسی وستەن بە وەردا
پەخشانەن وە ڕووی قەوس و قەمەردا

گۆنات پەڕەی گوڵ ، دەم عۆنچەی بەیان
دەدان چوون سەدەف ، بەعاڵەم عەیان

چوون بەرقی شەهاب جە ڕاگۆزەردا
ئاییر وە ڪۆگای سەبری من وەردا

دەم بەئیشارە ، چـەم بە نازەوە
چوون ئاییر بد٘ان هەواگازەوە

سۆچنان حاسڵ مەزرەعەی هەستیم
ئەسەر کەرد جەدڵ حاڵەتی مـەستیم

بە ناز وات یەقین مەیلم جە لاتەن
نەزانام جواب من چێشم واتەن

وێنەی کەڕ و لاڵ هەر بە ئیشارە
بە دوو دەس وە ڕووی دید٘ە نیارە

دڵ پەڕ جە حەسرەت ، زوان شی وە بەند
وێنەی کارەبا ، ئەرواح جە من سەند

نە عەقڵ و نە دڵ ، نە مەغز و نەفام
نە شەرم و شوعوور ، نەمەندەن جەلام

دڵبەرڪە زاناش بێ ئێختیارم
وێش بی بە دۆکتۆر ، وێش پەرەستارم

پەی تەسکینی دەرد ، دەس نیاوەدڵ
ساتێو ساکن بی دڵ جــە ئێش و چڵ

هەوای هەناسەم کوورەی دڵ جۆشان
بڵێسەش وە ڕووی دەشت و دەرپۆشان

مــــــــــەگەر وە باران لافاوی دید٘ەم
خامۆش بۆ ئاییر هیچکەس نەدید٘ەم

پەی هەوای ئازاد٘ مەیلەکەی جاران
ماڵـــۆ تەموو خەم جە سەر دیاران

(سەعد)ساکن بۆساتێو بە بێ دەنگ
جەستەی سیاڕەنگ وێنەی نەقشی سەنگ.

#میرزاسەعدوڵڵا هەجیجی(سەعد)
                 
        (٦۸٫۱۱٫۹کۆچی ڕۆجیاری)


نە تەمادٚارێ سڵامی، نه قسێ ڕێکێ، جه تۆ
نە جە یانێوەنە شەربەتیە چەنی کەیکێ جه تۆ

دڵوەشیم ئانەنە وەرمێ وەشێ وینوو بڕێ جار
نایمێ یەک یاگەنە پەیکێوە جە من، پەیکێ جه تۆ

قافیەم تەنگۆ بییەن جۆرێ تەری ڕارە بلوو
بەشکە بنویسیۆ چن شێعرێوە عەنتیکێ جە تۆ

خۆزگە با ڕۆیە پەیامێوە جە تۆ دۆنۆ دڵیم
چەمەکەم بگنۆ موارەکیە، بە تەبریکێ جە تۆ

پاسە هەر جارێوە وینوو جل و بەرگت بە زەریف
بژنەڤوو بەشکەتە چن دانێ قسێ شیکێ جە تۆ

مامەڵەن بەینوو من و تۆنە مدٚەو شێعرێ پەنەت
ئانە گیروونە خەم و چن شەوێ تاریکێ، جه تۆ

تۆ نگایێ تەڕێ، تازێ، وزە شێعرانێمەرە
تا نەوێ بانێوە بەش شێعرێ کلاسیکێ جه تۆ

#پەرویز_بابایی

سەرخێڵی خیاڵ، خەرامانی خەم
ئەبرۆ هیلالی تاقی کەسرای جەم

تۆحفەی زاتی حەی، وەش نیگاری خێڵ
نەچیری هەوەس ڕەژیای خاڵ و مێڵ

فەریدەی ڕەگەز ئامیانی هەستی
،پەرداخی هەوەس پەستی بە مەستی

هەمتەرازی حور جەنەت الماوا
تالیم‌یانەی ئەرز ساوا بە یاوا

تەسخیری هەر دوو، عەرش و فەرش وە هەم
ڕەزایەتی حەی، سینە و چەموو دەم

چێشەن ئەی مەقام ڕۆتبەی ڕەبانی
واڕانی پەرێ هەوای یەک عانی

ڕەفتی ئەڐایی کۆتاە کەردەنی
کێشت جە نیهان هەزار مەردەنی

ڕشتەی ئی مەقام وە پۆی حیاتەن
مەماڕە شیشەت حیات حەیاتەن

شەرمت مەماڵە، پەی چەم و دەمێ
بە وەسڵێ باوەر شێر پەی عەجەمێ

جەواد ـ حەمزە
فێــــراق ۱۱؍۵؍۱۳۹۹ی 


بنە تۆموو وەرزوو پاری
پووچ و زۆڵەک

تەقدیر تەقیان مانگەو زمسانیوە
" کڵاش "
هیتیار ویرە کۆنێ چینە مەکەرۆ
پەی بنە تۆمی
بەڵ گنۆ وەهار حیاش ماشۆوە

مڵکی کڕێس و
یەرەقی شڕڕ
نەقیزەی کول و
 گاوەسنی کۆڵ

حەزوو سەرگاوخانیش دوورە دەسەن 
و
مشتەکۆشەی شەقە و
سەرەی بێ گاو !
نمیاو بڕەو سەرگاوخانی 
و
هێڵەی بێ تۆم
دڕەینێ 
سواڵەو درەوانەکەیش

جەواد ـ حەمزە
فێراق   ٤ و ۹٨ی کۆچی

برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱۹٥)،
نوشته شده در تاریخ شنبه 18 مرداد 1399 توسط همایون محمدنژاد
.: Weblog Themes By Abdollah Habibi :.