کەلەبەروو شێعرا(۱۹۰)

‍ (عوسمان هەورامی)

ئەر واوەی مەعدووم دەس بڎۆ خامە
وێش ئاسا تەبعش ڪەرۆ ڕەنگامە

تەوسیف کەرۆنە بەقوو سەرکەشا
عوسمان هەورامی پاڎشاو دەنگوەشا

سەدٚئەننەتەریچ ئەر پەرێچ واچیۆ
زەوقە بە شەوق بۆ ، قەریحە ساچیۆ

خامە گەوهەربۆ ، جەوهەر جە زەڕ بۆ
کاغەز چوون حەریر ، ئەشعاریچ تەڕ بۆ

هەنگوو خیاڵی هەر بێ قەرار بۆ
پەی شیرەو شێعری هەر نە گوڵزار بۆ

ئەر شاعێر سەعدی یا شەهریار بۆ
ژیر و وەش ئاوەز ، شیرین گوفتار بۆ

پەرێ ئەوسافش وێڵ و عاجزەن
شێعرش ئاڕەفتە، خامەش سەرکزەن

جە کام حەنجەرە باروو نیشانی ؟
پەرێ هام شانی دەنگوو عوسمانی

ئاڎ گەوهەرێوەن جە وێنەش نیەن
مەر مێژوو زانۆ عوسمان کێ بیەن

بەهاش مەدٚریۆ چوون گران سەنگەن
لەعلەن ، مەرجانەن ، داوودی دەنگەن

عوسمان سەمبولەن پەی کوردستانی
شکۆ و شەرەفەن پەی هەورامانی

دەك بە ڕەحمەت بۆ ماما مریەمە
ماواش بەهەشت بۆ، نەوینۆ خەمە

پەی گەوهەرێوە ئاردەش دنیارە
سیاوڕەیحانێش پەیما نیارە

بێ شەك خەلەفش فەخروو وڵاتین
دەنگش ئامیانوو حەز و ئاواتین

سیاوچەمانەیش شەماڵوو ژیواین
ئاوەو حەیاتین..سەمفۆنیاو هیواین

ئەرسەدٚ ئاٚڎ دەنگش تێك شیەن تەمام
نامش هەر مانۆ ، تا قامی قیام

سەبتەن نە سینەو دڵوو زەمانی
مەحاڵەن بەیۆ پێسەو عوسمانی

حەیفەن ئادەنگی بەیۆش وشکارۆ
نەزانێ بەیا ڪەرانێ شارۆ

پاکۆ و پاشێل بۆ هەراڵەو باخی
باخەوان داخڎار ، هۆرکێشۆ ئاخی

مەر دیسان گەردوون بینا نریۆوە
دەروازەو  ژیواو  دنیای ڪریۆوە

خالق دەس بڎۆ بە سەنعێ سانی
بارۆوە یۆتەر پێسەو عوسمانی

سەدٚ چوون(سیاوکام) کەرا ئەوسافش
دیسان ڪەم مارا پەی تەوسیفاتش

یاران پەی واتەیم مەڎەیدێم تانەی
هەر هاڵەکۆکەن سەوقاتوو شوانەی

 ۹۹٫۳٫۲۱ کۆچی ڕۆجیاری

#سوهراب_مورادنیا (سیاوکام)

‍ تەنیاییم
هۆشێش ئاستێنێرە
بێدەنگیم
چوارشەقوولانێ وەزە کەمکۆڵێش پۆوەنێ
ماتیم
دڕەیەقووڵو هاواری خنیکیای پۆژنانەرە.
تاسیاییم چەنە چکۆرە.
مەزانوو نا
من بێدەنگیی دۆنوو
یا ئەو
خەریکا من لاونۆ.
"ج.قەقنەس"



ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، سوهراب مورادنیا(سیاوکام)، جه‌لیل عه‌باسی(قه‌قنه‌س)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱۹۰)،
نوشته شده در تاریخ چهارشنبه 4 تیر 1399 توسط همایون محمدنژاد
کەلەبەروو شێعرا(۱٨۹)

‍ ‍ تەزمینێو سەروو شێعرێوەو مامۆسا مەولەوی

ئازیز ئەر وینی وای هەناسەی سەرد
داخ دووری تۆ تا به ئەفلاک بەرد
به جام فەسڵت پەنەم وەردی دەرد
"گۆیا جە لای وێت ئینە خاست کەرد 
جیاییت چەنی من وە بەین ئاوەرد"

به مار هێجران کۆرپەی وەفات گەست
ئیسه چەنی کێ نەوپەیمانت بەست
بەش هەست شەوقت کەرۆ به ناهەست
"هەی پەی وێت نەبۆ شۆخ دید٘ە مەست 
یارێوتەر وێنەی من بگنۆت وە دەست"

کێ بۆ پێسه من نیشته بۆ پای تۆ
سەرمەست ئەحواڵ حاڵ و هەوای تۆ
به گەردەن گێرۆ وەی ناڕەوای تۆ
"بکێشۆ نە ڕای جەور و جەفای تۆ 
بزانۆ وە حاڵ غەمزەی ئیمای تۆ"

بەڵام تۆ به من یەند زۆخاو وەردی
ڕەنگم مەرده‌‌شێو نیشتەن وه زەردی
ئەغیاران ماچان یه چۆن نەمەردی
"سا چوونکە وەی تەور قیبلەم پێم کەردی 
وەفای عەهد و شەرت وە سەر نەبەردی"
 
یا چوونکە وەفام تەعبیر دای وە شێت
ئاخر ئەی بێ دڵ بسپارووت وە کێت؟
ڕەویەی بەد٘حاڵیم برمانۆ پەرێت
"مەسپارووت وە دەس بێ‌وەفایی وێت 
 تۆیچ سەرگەردانی من بەیۆ نە ڕێت"

      #یاسر_ڕەشیدی

چا ڕۆوە لەنجە و عێشوەت کەفت نە چەم
سینەم بی مەزرای کشت و کاڵی خەم

چەم ئاسا نە چەم سەرڕێزی سینەم
فێراق بی فەرهاد، تۆیچ بە شیرینەم

ئاڐ تاقوەسان کەرد بە نەقشی دڵبەر
سەنگ کەرد وە تەختی شازادەی خاوەر

ئارەق مت نە پای تاشیای قۆڵەنگ
ئێران و تووران دەنگش دا وە دەنگ

کەی حەننەر کەردەن فەرهاڐی چینی
سەنگ کەردەن مەنزڵ ئەشقوو شیرینی

تەوەن کەی بیەن وە ماوای دڵبەر؟
مەحاڵەن داری ئەشقش بەێ سەمەر

بەڵام ئازیزەم شۆخەی مەکینەم
من تاشام نەخشت، نە تەختی سینەم 

متم هوونی دڵ پای عەهدی وساڵ
ڕەشتم خاڵی زۆنج گۆشەی لچی کاڵ

تا هەر سات نەفەس باوەرۆت نەزەر
سینەم مڵکی تۆن شۆخی نازپەروەر

نە سەنگی خارای بێستوونی سارد؟
نەخشی شیرینش ئەو جا بەرد فەرهاد

جەواد ـ حەمزە
فێــــراق  ۹؍٤؍۹۷


ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، یاسر ڕەشیدی، جەواد حەمزه (فێراق)، سوهراب مورادنیا(سیاوکام)، حێکمه‌ت موحەممەدی(خه‌میار)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨۹)،
نوشته شده در تاریخ چهارشنبه 28 خرداد 1399 توسط همایون محمدنژاد
کەلەبەروو شێعرا(۱٨٨)

دوورەنی و دڵم دایێم بیەن پاڵا پامەنە
وەشی گم بیەن بێ تۆ سەفەر ئینا ڕامەنە

خەمێم کەردێنێ شانە سەرم بیەن پەنجەرە
وەیوڵەبادٚێ مەزیۆرە تازە ، میا چەمامەنە

چا وەختەو تاقوو بروات بیەن بە سوجدەگاهم
سوجدە نەمەن تەڕ نەبۆ جە هەڵمەو هەرسامەنە

بێ تۆ ئی کاکەشانی مەکێشۆ باروو دەردام
تۆ واچە بێژگەم چەمات دەرمانوو من کامەنە؟

دەسم نەیاوا زوڵفات واتم بەرزەڵنگ بەرزا!
ئی گردە من گێڵانێ ماچا ئینای جامەنە !

خەتوو دڵیت خرابا پەیاموو من مەیاوۆ
بێخەبەری کوشتەنا کار نەمەنەن نامەنە !

دووری تۆ ئینا دڵمەو لایچمەنە هەر دوورەنی
ئای چندٚ بێ تاقەتتەنا وەختێ ئینای لامەنە !

#فەرید_عەباسی

              ( ئەد٘ا)

ئەڎاگیان ، خاسیت نەشیەن جە یاد٘م
بە خەمت خەمین ، بە شاد٘یت شاد٘م

ئەو ڕۆی تەوەللود پەید٘ا بیم بە جەخت
جە ئاورایینە گرەوێنێ بە سەخت

بە زەحمەت مەمەت مەنیا دەموو من
تاجە گرەوای دڵم بۆ ساڪن

پەنجەی وێت منیا وە بانی لێوان
تا زەردەخەننەت بە من دا نیشان

دەست گرتانێ ، پامت واڕاوە
تایەواش ، یەواش بەردانیت ڕاوە

قسێ ڪەرێنی بە جیا ، جیا
تا قسە ڪەردەی جە تۆ فێربیا

بە لایە لایە بێشکێ جمنێنی
تا من نەوتانێ ، تۆ نەوسێنی

ئەد٘اگیان بیەیم هەر جە بیەو تۆن
ئەر تۆ نەبیانی ، بیەو من جە کۆن

خود٘ای فەرماوان نەبی دڵگران
(رضای ما ، در رضای مادران)

#سەعدوڵڵاخەدیری_هەجیجی

ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، فەرید عەباسی، میرزاسه‌عدوڵڵا خه‌دیری،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨٨)،
نوشته شده در تاریخ سه شنبه 27 خرداد 1399 توسط همایون محمدنژاد
کەلەبەروو شێعرا(۱٨۷)

#کــــۆی_شـــاهــــۆ

کۆی شاهۆ یاگێ دووی هەناسەمەن
نەسیمش ئارام هۆی هەناسەمەن

شاهۆ حەکیمەن گیواوش دەرمان
دەرد کەرۆ ساکت شەفا پەی زامان

سایەش پەرێ قەلب ئارامی دڵەن
بەر کەرۆ خەمان نەسیمی گوڵەن

سەیرانش ئارام شەفا پەی دەردەن
بۆی عەتری سەحەر خەم تاڵان کەردەن

شاهۆ وەش دەماخ نەو وەهار ئامان
سەوزەن پای تاقان گوڵان جە دامان

دەنگ مەدٚۆ وە کۆ ناڵەی وەرواوان 
نەوای بوڵبوڵەن جە پای شەتاوان

"سەیادٚ" شراخەی نەو وەهارانەن
کەمەران زەردان ماوای یارانەن


 #باقی_شەفێعی (سەیادٚ)

وەرزی بێ واران
گۆشێ
کۆڵانێ و جادٚەی
دووری مەژنەوا

یاگە پای کاڵیای 
مەکاڵاوە
پەرێ 
بنجەو هاواری
تا
هەنگامێ
تاریخیەتەر
شەتڵە کەرا و
ڕەقەمیەتەر هۆروەزۆ !.!

#جەواد ــ حەمزە
فێـــراق   




طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، باقی شه‌فێعی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨۷)،
نوشته شده در تاریخ سه شنبه 20 خرداد 1399 توسط همایون محمدنژاد
کەلەبەروو شێعرا(۱٨٦)

بنیەیمێرە 
چەمەکاو من
کەوتێبانە ئیشتیبایێ دۆزەخانە
ئەی خاس، چێش بێ
کە چەمێ تۆیچ
بەهەشتانێ " نا "شا   نەشا.

#ڕئوف.مەحموودپوور     

        ئاخ پەێ گرمەوقاڵ،دەورەی مناڵی
جەدنیای بێگەرد،نەبێشی حاڵی
ئیسە زەمین وئاسمان وژیوای
حەر پلێ مەتەقنا،بە لەمەێ هاڵی،

#سەباح شیانی
کوویان
پووەش
تۆرێنج و هەناسەیم
بە کەڵکیتوو زوانی 

تانش
تاڵ، تاڵ
گرێ دریان
بە ویر و زاتی
لەم‌ئاوردی
 ئیفلیجی کۆنەرە

چنیانا
بە کیلەو مەزاریرە
و
دەماو دەمی بێ‌کەردەوەی

پەوکەی 
بە هەزار گرێ کۆرێ
ورازیانا
پەراوێزەرە !.!.!

#جەواد ـ حەمزە
فێـــــراق



طبقه بندی: فرهنگی و هنری، ادبیات/شعر، زوانی هه‌ورامی، ڕه‌ئوف مه‌حموودپوور، جەواد حەمزه (فێراق)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨٦)،
نوشته شده در تاریخ دوشنبه 19 خرداد 1399 توسط همایون محمدنژاد
کەلەبەروو شێعرا(۱٨٥)


ویرت نەشۆ شۆڵەم نیا ئی ڕا مەزانوو کۆ مەلۆ
ئی پا نمەی تا سەر چەنیم تەرسوو هەتا مەقسەدٚ شەلۆ

چیروو چەماو مانگەشەوێ یاگێ نەفەس کێشتەی نیا
من چن غەریب کەوتەنا، نە هەن کەمان نە لۆم بە لۆ !

دەردٚەم قەتارێ مەینەتا هووهوو ملۆ دەم دەم کەرۆ
هەرچننە دەم بنیەو دەمش هێشتا مەنۆ گاڵم، گەلۆ

شۆڵەو چراوەو قامەتیت مانگە بڕۆ شەوگارەنە
تەرسوو نەیاوو ئوو سەرە تاریکە بۆ ڕاکێ کەلۆ

من هەر دیارا بەختەکێم تا ئاخروو ئەژنۆی وەزۆ
تۆ پا چەما چارەم کەرە چەم چەرخنی ناڵۆ چەلۆ

مەر بەینە وەرمم تۆ شەوەی شیشێ شەرابیم لیپە بۆ
گیروو یەخێ دەرد و خەمی حەر من دەلوو ئادٚیچ دەلۆ !

من چل چراوەو خزمەتی تۆ سەروەشەو غەنیمەتی
من خاج و پیکم پەی مەبۆ تۆ هەر تەماشێوەت دەلۆ

#فەرید_عەباسی

ئاخ پەی ویەردەی ، وەشڵەی پاوەختی
هیچێوما نەبێ  غەیر  جە وەشبەختی

دڵ و دەروونما بێ ڪینە و ساف بێ
دوور جە دووڕەنگی و ڕیاوگەزاف بێ

ئیسە گردٚ چێو هەن غەیر جە وەشبەختی
سەرباروو باران  ڕەنج و بەدٚبەختی

#سوهراب_ مورادنیا


ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، سوهراب مورادنیا(سیاوکام)، فەرید عەباسی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱٨٥)،
نوشته شده در تاریخ سه شنبه 6 خرداد 1399 توسط همایون محمدنژاد
.: Weblog Themes By Abdollah Habibi :.

تعداد کل صفحات : 17 :: 1 2 3 4 5 6 7 ...