کەلەبەروو شێعرا(٤٨)

شۆڵەو شەموو کەیفی کزا ، ماچا فەڵەک شادیٚ دزا
شۆکرانه بۆ ئەر بۆ قەزا ، ئێنسانەکێنێ دڵ گەزا

زەڕڕێو شەرف هەن نەم نەما ، بارێ فرێ یاوەر کەما
خاتر بیابانەو جەما ، ئێنسانەکێنێ دڵ گەزا

هەر ئاوەڕوون بۆ دەس به دەس ، ناکەس به زەڕ کریۆ به کەس
مارێ مەکەردێ ئەو قەفەس ، ئێنسانەکێنێ دڵ گەزا

شارێو شعوورش مەرده بۆ ، خەڵکش شەوانەی جەرده بۆ
ڕەنگەو ژەنێش ئەر زەرده بۆ ، ئێنسانەکێنێ دڵ گەزا

هەر چی دەم و دەی بێ وەنەت ، تا بەش گەزەن بڕیۆ چەنەت
با ئی هەقێ واچوو پەنەت ، ئێنسانەکێنێ دڵ گەزا

داخۆ ڕوێو بارا خەبەر ، داروو وەفای گێرتەن سەمەر
مدٚیۆ شەفا زامی خەتەر ئێنسانەکێنێ دڵ گەزا

#یاسر ڕەشیدی
 ‍   
Sayd jalal aloz:
زاڕۆڵە عالە گیانا 
شیرینە وەش زوانا 

گوڵە سووراو وەهاری
ئومێد٘او   کوردەواری 

بەیدێ دەس پەنە کەرمێ 
نامێ خود٘ا گیانی  بەرمێ 

ئیمانما هەن  بە  خود٘ای 
بە  دین و  رەسوولەڵڵای

موحەممەد    پێغەمبەرا 
سەردار و هەم سەروەرا

ئەد٘او تاتەش زانی کێنێ 
عەبدوڵڵا   و   ئامینێنێ ؟

مەککەنە    پێد٘ا    بیەن 
مەدینە فەوتش کەردەن

فەرماوۆ پێغەمبەر گیان 
رەسوولی   ئاخر  زەمان 

من هیچ وەخت تاتەم نەد٘یم 
بێ کەس کەوتانێ  و  هەتیم 

بیانێ بە شش ساڵێ 
بێ تاتەنە و بێ واڵێ 

ئەد٘ێچم  ئاسا  جیا 
هەقەتی هەتیم بیا 

مامۆیم چایلای بەردانی 
ئێتر ئاد٘ی وەی  کەردانی

وەختێ بیانێ چل ساڵێ 
جبریل ئاما     بە     باڵێ 

بە ئەمرەی خود٘ای ئەکبەر 
چایلای    بیا     پێغەمبەر

قۆرعان کریا خەڵاتم 
ڕۆشن  کریا   وەڵاتم 

دا دەی زاڕۆڵە خەپڵەکا 
شیرینە   فرە  وەشڵەکا 

هەر کەس حێفزێشا کەرۆ 
نوقڵێ و   شیرینی  وەرۆ 

#مامۆساسیدجەلال  ئەکبەری( ئاڵۆز)‍  

ادامه مطلب

طبقه بندی: مامۆساسیدجەلال ئەکبەری( ئاڵۆز)، فرهنگی و هنری، ادبیات/شعر، زوانی هه‌ورامی، جەواد حەمزه (فێراق)، عەتا عەلی پوور، یاسر ڕەشیدی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٤٨)،
نوشته شده در تاریخ دوشنبه 18 تیر 1397 توسط همایون محمدنژاد
کەلەبەروو شێعرا(۳٦)
‍    
هەرمانبەر
خاکی وەشەویس مایەو حەیاتیم
گەنج و گەوهەروو گردوو ئاواتیم

هەرچن ژیوایێم هەر نە چەپ وکۆن
بەڵام   ئیرادٚەم  هەر  خزمەتوو  تۆن

سەدٚ جارێ نیشوو  باروو خەماوە
بە دڵ  منیەونەت سەروو چەماوە

یارانی سەربەرز   تاقمەو هەژاری
زحمەت کێشەکەو  خاکی  نازاری

پاڵەوانەکەی  پەنجە نەخشینم
هەرمان بەرەکەی گۆشە نشینم

خاکت بە پەنجە و تۆوە  ڕەنگینەن
دەسرەنجت مایەی گەنج و نگینەن

نەخش و زەحمەت و پەنجەیت دیارەن
وەڵاتش   پۆشان    گرد   یادگارەن

بە هێز و پەنجە و پینە بەستەکەیت
بە ڕەنجوو شانەو لاشە خەسەکەیت

هەر هێممەتوو تۆن  یاگوو ئاواتی
ئاوەدٚان   کەرۆ   خاکوو   وەڵاتی

غیرەتت کانگاو سەرمایەی گەنجەن
هارەق و هوونت شاهێدٚی  ڕەنجەن

قەسەم بەقەترەو هارەقوو لەشیت
بە لێوی تەژنەو بە دیدٚەی گەشیت

قەڵەم منویسۆش وەسفوو ڕەنجەکەیت
وەسفوو زەحمەتوو دەس و پەنجەکەیت

بە بێ ڕەنجوو تۆ وەڵاتت ماتەن
دماکەوتێوی    بێ    دەسەڵاتەن

هۆرێزە  سا  دەی  ئاواتە  وازە
بە ڕەنج و خیرەت وەڵاتیت سازە

ژیوای بەسەنات سەنات بە زانای
زانای بە عەقڵ و خیرەتوو  وانای

دەورش وە تاوەن  ڕۆزگار و زمان
دەردوو ژیوایێ بە کار بۆ  دەرمان

سەرکەوتەی وەڵات پایەش هێممەتەن
عێلم و  زانایی و  ڕەنج  و  زەحمەتەن

هەر خێڵێو مەدٚیەی ئامان وە مەیدٚان
بە دەسرەنجوو وێش شادٚەن و شەیدٚان

عالەم گرد یاوان  عێلم و سەناتی
یاوان   بە  پایەو  بەرزوو  ئاواتی

با تۆیچ خەم وەری  خاکوو وەڵات بی
ئوستادی سەربەرز  عێلم و سەنات بی

دماکەوتەو  ئێمە   جە  بێ  کاریەن
هەر عێلم و سەنات ڕای   ڕۆزگایەن

#عوسمان ڕەحیمی هەجیجی
 
بەبۆنەو ڕۆ هەرمان بەریەو

بایەقوش وەسشا لوەو مزگی وەشا تا یانەما
شەولەبانەو بانەکەو ئاگەی کەرەو توختانەما

ئەر بەهەشتێو بۆ پەرێ تۆ،  بازە پەیما دۆزەخی 
خەم جە وێرانەو بەهەشتی خەم کەرۆ سەرشانەما

چێگە دنیاما کەری دۆزەخ بە ویژدانم ئەگەر
ئینە وەرما بۆ بەهەشتی تۆ کەری وێرانەما

پڕچە لوولێما جە ناڵەو تۆوە ڕێزەی بایەقوش!
تۆ بەرەش  ئا بانە با کەرمێش خەڵاتت شانەما

تازیەو مەردەی ئەگەر چل شەو بۮۆ سەر سخڵەتا
چێگە چل ساڵێ زیاتەر خۆ بیەن هەرمانەما

بایەقوش قورئانە گەورەو مزگیا دەیمێ گژیت
جەژنەما هەر ماتەما تا تۆ بۮەی جەژنانەما

#جەماڵ قادرپوور‍      

خەرمانی تەڕ
  خەلەی بێ بەر
 چێش پەی میراس؟!

  ئەی هەی برا ! 
ئێمە پووت؟     ئێمە حەڵەب؟!

تەوێڵەتوە 
   بە خەتی پان
      کێ نەخشانش..؟
               "خروس نشان"

#فەرشید_مورادی

ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، عوسمان ڕەحیمی(مورید)، جەواد حەمزه (فێراق)، جەماڵ قادرپوور، شاهۆ مەعازی، عەتا عەلی پوور، فەرشید مورادی، ناسر ئەخدەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۳٦)،
نوشته شده در تاریخ پنجشنبه 13 اردیبهشت 1397 توسط همایون محمدنژاد
کەلەبەروو شێعرا(۲۷)

بازه دڵ پەرێت هەر وێرانه بۆ
با هەر تەشریفت لای بێگانه بۆ

ئەر به ناوەشیم كەیفوو تۆ سازا
زانه  نازەنین  وەشیم   ئانە بۆ

دووری مەتاوۆ کەم کەرۆ مەیلت
تۆ  هەر  نه  دڵنی تا  زەمانه بۆ

مەبڕۆ تەماعەت دیدٚەی بێ کەیفم
ئەر سەدٚ كه گۆشم پەڕ جه تانه بۆ

سەوزەو قەراخوو جۆگاو هەرسوو من
دا ساتێ ڕەحمت  بەو هەرسانە بۆ

یۆسف چا میسره هەتا کەی مانی
ڕوێ مێ و مەیلت ئی كەنعانه بۆ؟

ئه ر قابل زانی تا وه ڕۆی مەردٚەن
 دڵەی  غەریبیت  قەدٚیم  یانه بۆ
#مامۆساهەیاس غەریبی

شەوەن یانەی دڵ ئاماد٘ە باشەن
پیری مەی فروش کۆنە فەڕاشەن
مەستان جام بە دەس بە ئاهەنگەوە
یاران   بە   باڵای   ئاڵای    شەنگەوە
ساغر   زڕەزڕ   بە   مەی   ئاڵەوە
مەهوەشان دوو دەس وە پیاڵەوە
پیری مەیخانە مەستی بادەی مەی
مەستان بە زێکری هەی هەی وحەی حەی
باڵاعەرعەران   مەهوەشان  بە  ناز
دەس  وە  پیاڵە بە تەمکین  و  ناز
ڕەندان قەلەندەر ئاسا بە حەی حەی 
مەستان مەستانە دەم وە جامی مەی
ساغر و ساقی دەف و چەنگ و نەی
ڕەقس وسماع و وەجد وحەی و مەی
نەوای گۆش نەواز تار و نەرمە نەی
ساقی  هاوارەن     بادە   پەیاپەی
"شرام هەورامی"مەست ومەنگ وەی وەی
 وەشەن تا سەحەر حەی ومەی و بەی

#فەریدوون بەهرامی(شرام هەورامی)

چرکیه‌ که‌ لوا
نیه‌ن.
چرکیه‌ که‌ نامان
نیه‌ن.
هه‌ڕه‌و  ئی چرکه‌یه‌نه‌ چه‌قاینا
        - ژیوایه‌ ده‌میا جه‌ ئاژینو مه‌رگی _.
ئه‌رامه‌نه‌ییم  بوینه‌
ئاڵوچیاینا باوڕیره
         _گێلانه‌ ‌فێڵیه‌ _       
که‌ نانۆ و کوانتۆمیچه‌نه‌
ته‌ڕه‌بنیه‌ په‌ی پێچ دای مێزۆوه‌!.

#مه‌هدی ئه‌بری(هەورام)

ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، مه‌هدی ئه‌بری(هه‌ورام)، مامۆسا هه‌یاس غه‌ریبی، یاوه‌ر هه‌ورامی، موحەممەد خدری(ئەدیب)، ناسر ئەخدەر، جەماڵ قادرپوور، عەتا عەلی پوور، فه‌ریدوون به‌هرامی"شرام"، خەندە هەورامی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۲۷)،
نوشته شده در تاریخ پنجشنبه 16 فروردین 1397 توسط همایون محمدنژاد
 کەلەبەروو شێعرا(۲۱)
شێعرێ جە بارەو پێغەمەری (ص)

بادەنۆشی جام جە مەیخانەی یار
نوقتەی پەڕگاری  حەڵقەی کردگار

ئاهەنگی نەزمی بەزمی دڵوەشان
تاقه بورهانی  شەوقی  دڵکەشان

گۆش گیری سۆزی ناڵەی دەردی خەم
هۆردەری  پەردەی  نیستی و  عەدەم

دەفتەرچەی تەریق شێوەی وەشی ژین
نیشتەجا نەسووج  مەنزڵانی دین

هۆ شەمعی تاقچەی یانە تاریکان
دەسگیری دڵسۆز  ڕاگە باریکان

هۆ ئەد٘او تاتەی تفڵی تازەی ئەشق
جەماڵی سوورەت جەهەر نامەو مەشق

لایەعنای مەفهووم فەهمی  دڵڕێشان
بەحری گم کەری قەتەرەی دەروێشان

وەشکەری باڵای وەیوەکەی جەماڵ
جەلادەری دڵ   زەما کەی   کەماڵ

ئاڵا هورگیری لەشکەرەکەی شەوق
نیشتەجا نەسەر تەختی شاهی زەوق

یانەی ئەشقی تۆ جای فریاد ڕەسی
پیاڵەی پەڕی بادەی سەرمەسی

سەختی سەنگی دڵ یاوان و ئەو حاڵ
حسەین کۆکەنیچ مەکەننۆش سەد ساڵ

نە تۆی گەردەلوول بێ مەیلی هەردە
تاوانان یەکسەر ڕوو سیاو  کەردە

نە تۆی پەلکەی زوڵف دنیا یەک ساتێ
هیچ تەقاڵایێ مەدۆش نەجاتێ

ئەوگار نەمابەین سەد تووڵەڕایێن
هەر ڕۆ بە نەوعێ تازە زەمایێن

دنیاش پەرێ وێش مارە بڕیێنە
شەو و ڕۆ ئەجۆش تازەش چڕیێنە

نە هیچ تەرفدا خەلاسیش نیەن 
هەر وە دەسی وێش ئاوڕووش شیەن

دنیا وەحوسنی کازبش هەر دەم 
سوورەتێ پێکۆ نە گلێنەی چەم

هەزاران سۆزش نە دڵ جا کەردەن
بنچینەی ئاڤەز تا عەدەم بەردەن

وەگردین قۆرەت چەنگ پێکان نە دڵ 
هەستیم سەرانسەر ئاوەردەن وە چڵ

دەس و پای هێزی تۆبەمان بڕیان
پەردەی ڕوو سووری وە خجڵەت دڕیان

چوون ماساوی ژاڵ ئەرامەنەنان
مەزانوو زیننە یا خەیر مەردەنان

چا ڕۆنە جەستەم کە بۆ بە خاپوور
بە چە شەرمێوە ڕۆح باروون حزوور

هەم ئاسانەی تۆ هەم ئاسانەی لەیل 
سەعادەتەن دڵ بکەرۆش دوجەیل

بەڵ بە ڕەحمی وێت نەو ڕا گوزەران
هێمەتێ کەری  چەنم بویەران

وەرنە مەر مەنوو وێم و دەردی وێم
تا سەرا مەنزڵ خەجڵەت بارا پێم

          # ژیواری

زێدم کەنوولەن، کەنوولەی نازار
مایەو سەربەرزیم، مایەی ئێفتخار

چن وەشا سەفا و باخ و گوڵزارش
زمسانش وەشەن عەینی وەهارش

عەتر و بۆی مێوەش دنیاش کەردەن مەس
شەقایێق مەدهۆش، جام مەی وە دەس

ماچی سا ئارۆ، فەسڵی وەهارەن
فەسڵی عەیش ونۆش، گوڵ و گوڵزارەن

ئەلحەق کە "پەریان"یاگەی خاسانەن
ماوای عێبادەت  ،حەق  پەرەستانەن

"شەریف ئاوا" واچه ماوای عێبادەت
نیشتەن وه سایەی هومای سەعادەت

"شەریف ئاوا"کەم، ساحێب سەنعەتەن
پێسەو«پەریان»ی، هێمەتش بەرزەن

"پەری" مەردمش، خودٚا مزانۆ
مەلایێک و عەرش دوعاش مه‌کیانۆ

"کەنووله" و پەریان" دیاری یارەن
"شەریف ئاوا"کەم  ماوای  دڵدارەن

پیرافتەی نازار ئارام کەرەی دڵ
فێداو مەزاریت ،  گیان ناقابڵ

نامێت مونەوەر ڕەوشەنی ڕۆوەن
کەنووله ڕۆشن جە نووری تۆوەن

پیرافتەی نازار ،‌ من هیچم  نیەن
یانەی وێرانم وێت وە چەم دیەن

«دەرمان زامان ده‌رده‌که‌ی کاریم
هامڕاز ناڵەی شەوان بیدٚاریم

سۆچنۆم حه‌سره‌ت ده‌رد جیاییت»
«کەرمەڵڵا» فێدای داخ  تەنیاییت

#کەرەمەڵڵا  ئەمیری(ک الف یاس)

عەتری وەهاران

وەهارن سەوزەن نەورۆز گوڵ خێزان
وەشەن   پێشوازی  بە   چەپڵە ڕێزان

قەتارەی گوڵان زەردو چەرمەو سوور
دانشان  تەد٘ارەک ، نزیک  هەتا دوور

گوڵ بە هەزار ڕەنگ،قومری نە سەرچڵ
هەر یۆ  بە  نەوعێ  ، فەرەح  وزان دڵ

بەڕەزای  شاخان  شکۆفەی داران
ڕەحمەتەن  چەنی نم نمەی واران

چەم ودۆڵ چیمەن،سەوزە کەردەن فەرش
پەی وەشی ئێمە،مەلایێک جە عەرش

هەردو کۆساران،سەحرا و دەر و دەشت
پەی ئۆمەتی وێش، کەردەنش  بەهەشت

مەنیشە یانە  سەر کێشە  نە دەر
سەڵوات بد٘ە سەر،ڕەسووڵی سەروەر

گوڵ بە عەترەوە وەهار عەتتارەن
عەتتاری  وەهار ،  زاتی سەتتارەن

شەوبۆ گوڵ نەرگێس،عەترشان پاشان
عەتتار   نیشانش  نیەن  جە    لاشان

بۆژانە و چنوور،نەرگێس و شەوبۆ
بەردم عەتتاری،عەتتار کەرد وە بۆ

عەتتار پەی عەتر گوڵان بێ درەنگ
زوان وشک و لەنگ،واڕیا جە رەنگ

کەرد بە ستایش،عەتری نەو وەهار
سەجدە بەرد نە سای،ئاسانەکەی یار
#موحەممەد خدری داریان‍       


ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، مه‌هدی ئه‌بری(هه‌ورام)، یاوه‌ر هه‌ورامی، جەواد حەمزه (فێراق)، سۆبحان خالدی، موحەممەد خدری(ئەدیب)، عەتا عەلی پوور، کەرەمەڵڵا ئەمیری(ک الف یاس)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۲۱)،
نوشته شده در تاریخ شنبه 19 اسفند 1396 توسط همایون محمدنژاد
کەلەبەروو شێعرا(20)
         پەی وەهاری
وەهارەن کەم کەم   ،  هانا بە ڕاوە 
شەماڵەن     شانۆ   پا  سەر  کواوە 
بەڕەزان    زوڵفی   دێزش  مەشانۆ
بوڵبوڵەن مەس مەس دەیریەن وانۆ
وەنۆشەن    مل کەچ   بناری   باخان 
پیقەی کەڵ ڕەمەن بەرزی ئێڵاخــــان
هاناوان  یۆیۆ   چوون ئاویی زەمزەم 
تەقان جە هەر لا مەجۆشان کەم کەم
قاسپەی    ژەرەژان     بەرزە    یاڵەوە
گەلەی   نەچیرەن   پای   قەد٘   پاڵەوە 
گوڵان خەیمە دان سارا و دەر و دەشت
ڕازیان  زەمین   بە   وێنەی     بەهەشت 
خسووس هەورامان چوون تازە عەرووس 
گوڵان خەیمە دان  پەریێ  ماچ  و  بووس
بەڵام هەر کەسێ چوون من خەم نە کۆڵ
خاستەرەن   نیشۆ  زەیدی   بیدی   چۆڵ

            8/3/2018
#خەندە هەورامی

هــــــــــــــە‌ڵۆ
داڵ کەی گێرتەنش ڕەویەی هەڵۆ باز
کەی جاگەی ناڵبەند دریان  بە  بەزاز؟

ئەر هەڵۆ جای  وێش  بد٘ەرۆ  بە  داڵ
مەلان مەر نە وەرم ،بد٘ان شەقەی باڵ

هەڵۆ ئاوراینە ، گیان تەسلیم کەرۆ
چوون داڵ جە لاشەی تۆپا نموەرۆ

مەرگ و ئاورایی شەرافەت دارەن
تێر  بە نامەردی  ڕەوڵی  کەفتارەن
#جەواد ـ حەمزە
فێـــــــراق

ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، سەیوان ئێبراهیمی(گوازی)، جەواد حەمزه (فێراق)، کاوه شکری(سەراو هەورامی)، حەسەن عەزیزی(خەیات)، عەتا عەلی پوور، خەندە هەورامی، موحەممەد خدری(ئەدیب)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(20)،
نوشته شده در تاریخ پنجشنبه 17 اسفند 1396 توسط همایون محمدنژاد
کەلەبەروو شێعرا(۱۹)
دڵه‌ ها یاران به‌رشین جه‌ زامن
گردٚ ته‌فره‌قه‌ بین چوون خه‌یاڵ من

گه‌ردٚ کۆچشان ئانا دیاره‌ن
ده‌ک لێڵاویت بۆ چوونت قه‌راره‌ن

سه‌نگی بار هۆش، پێش بار فامت
ده‌وار شادی، چێخ ئارامت

لوان چه‌نی کۆچ خاڵۆکه‌ی هام فه‌رد
ئیسه‌ بار وسته‌ن نه‌ هه‌وارگه‌ی هه‌رد

تۆ چێش مه‌که‌ری که‌م هۆش که‌م فام
په‌ی ڕووی ڕیایی نیشته‌نی جه‌ لام

سا چه‌نی ئه‌رواح یاوه‌ وه‌ یاران
با ته‌ن بۆ وه‌ سه‌نگ مه‌نده‌ی هه‌واران
#مه‌ولەوی تاوەگۆزی

‍    زوانی ئەد٘ایی
هیچ هونەر نیەن، بە زوانی قاڵ
گوفتار تووتی وار شەقە دەی وە باڵ

چوون تفڵی نەوپا زوان  لەنگ و ڵال
هەر کەس بە جۆرێ،پەرسینە ئەحواڵ

شەرت ئانەن تاوی، زاڕۆڵەی یەکساڵ
غەیر بە زوان حاڵ ، بارین گڕ و گاڵ

بێڕاهە  نەلی ، بگنینە  چاڵی
لای لای ئەد٘ایەن،زوانوو حاڵی

شێعر:موحەممەد خدری داریان

هیچ دەرد٘ێ دەوا مەکەرۆ

ئەگەر: هەزاران ڕۆجیاری
ئاسمانەنە درۆشیا و
بەڵام
دڵوو تۆنە فانۆسڵێ وە نەخۆوۆ
دەرد٘ە مەوەرۆ

ئەگەر خەزێنەو دنیای
دلێ کۆنجوو ڕۆحیتەنە بۆ

بەڵام تۆ نەتاوی

رۆحیت گێری دەسوو وێتەو

به چه درد٘ێ وەرۆ؟

هەزار شارێ گێڵی
 بەڵام 
ڕا ئێننەو دڵۆ وێت نەبەری

به چه درد٘ێوە وەرۆ؟
سەد٘ان هەزارێ یارێت بانێ
بەڵام
نەتاوی دڵیت کەری دۆسوو وێت
.
به چه درد٘ێ وەرۆ؟
ئەگەر
جە هەر چی مرواریەو بەحرەکا
ملەوانێوە 
وەشە کەری پەی کناچێ وێت
بەڵام 
نەتاوی
دڵیت پێشکەشش کەری

هیچ دەرد٘ە مەوەرۆ

#لەتیف هەڵمەت
#هۆرگێڵنایەو :
#سەیوان ئەمینی
ویراستار:
#هومایون موحەممەدنژاد

بۆی وەهار 

بۆی وەهار مەیۆ....بۆی وەهار مەیۆ
بۆی شنەی شەبۆی مێرگەوار  مەیۆ

یاران ئەر سەیرەن بەیدێ  مێرگەوار
ویندێش ڕەنگینەن جە سەرتا بە وار

گوراڵەسوورەی   بەرزی  مێرگەوار
 دیبای حەریرەن جە سەر تا بە وار

سوورەهەراڵەش شۆهرەتی خاکەن
گیواوش  دەرمان دڵەی  خەمناکەن

چنوور و شەوبۆش عەتری وەڵاتەن
پەی  دڵی   ئاشق   یاگەی   ئاواتەن

جە مێرگەوار و هەم جە شانشین
مەگەر  عەواڵان  پاسە بۆ ڕەنگین

جە فەسڵی وەهار بەرزی مێرگەوار
جە عەتری  چنوور مەبۆ  بە گوڵزار

ئاواتە وازەن   بوڵبوڵی    گوڵزار
پەی سەیرو وەشی بلۆ مێرگەوار

سەیوان کۆتا کەر جە وەسفی  وەهار
دڵوەش بی وەشەن سەیری مێرگەوار

نەک بە وێنەو تۆ وامەنەی خەجڵ
دایێم چەنی  خەم  کەری  درد٘ەدڵ

#سەیوان ئێبراهیمی(گواز)

وەشەسیا
وەشەسیا ئینای دڵمەنە،مەکریۆم پەی بەرت ڪەروو
مەنەناوە بەکام خامە تەعریف و تەوسیفت ڪەروو
بیەنی ئامیانوو خیاڵیم بەریم ئاسانەوئەشعاری
حەیرانەنا بەکام واچە نامـە شیرینەکەت بەروو
مەحبووسی یاسای فێــراقت،پابەندی دامی دوورینا
هــــــەر وێم زانوو چن بە سەخڵەت جە دووری تۆ بە سەر بەروو
مــــەیخانەو عەشقوو یاد٘وو تۆ بیەن پەناگای خیاڵم
سەرسامەنا ئەشۆم تاڪەی شەرابی فێراقت وەروو؟!
جە مــەکەتبوو وێساڵیتنە بێ شۆکەروو مەشقووئەشقی
عاشقتەرجە هـــــــــەرمسیارێو دەرسی عاشقیت بەر کەروو
کڵێڵوو بێ دەنگی دریان سەروو زوانوو دڵیمرە
وەقــــرەم بڕیان، وەرمیچمەنە مەیاروو نامێ تۆ بەروو
وەروو تانـــەو ناحەزاوە مەتاوۆ بەونەهەوارگەت
زەوارئاسا بە تاسەوە تەوافوو ئاسانەیت ڪەروو
------------٭٭٭٭٭٭-------------
۱۳۹٦٫۱۲٫٦کۆچی ڕۆجیاری(سیاوکام)
#سۆهراب مورادنیا

دووێ کوڵه‌شێعرێ قه‌دیمیێ
1
جه‌ لێژایی سینه‌یش  گێرته‌م
ته‌نیا جاریه‌
گواریه‌
چه‌کنام جه‌ پاییزو لچاش ونه‌ هه‌ناریه‌
ده‌ک له‌عنه‌ت
ئه‌چی قماریه‌ .
2
جه‌ هانه‌و لچاش ته‌ژناییم ماڕد
و
نیگام
شیرین گلێریا لێژایی سینه‌یشه‌ره‌
نشتێ پلووره‌
هه‌ر ده‌ هه‌ننوسێم
تاموو هه‌نگوێنی نمه‌دانه‌
ده‌سێم؟
#مه‌هدی ئه‌بری(هەورام)

وەهار
یاران   مزگانی   ئامای   وەهارەن 

ئامای وەرزەکەی گوڵ و گوڵزارەن

نه هەر جا مد٘یەی سەر سەوز دیارەن

نیشانەی   خێلقەت   پەروەردێگارەن

چیا و دەشت و دۆڵ  وێشان  وناران 

قەتاره     بەسا ن    سپاو    گوراڵان 

تەبێعەت کاڵای ڕەنگا وڕەنگ پۆشان 

باد٘ەش نه جامی نەو وەهار نۆشان

وەنەوشەی وەشبۆ جه سینەی باخان  

بۆژانه و  شەوبۆ  جه  پای  ئێڵاخان

چنوور شنەشەن جه  بەرزە  شاخان  

سوورەهەراڵه سوور کەرد٘ەن  زاخان  

نەرگێس وه مەس مەس چوون دید٘ە مەسان 

مڕفانۆ نه دەس ڕۆح و دڵ و گیان  

موبارەکتان بۆ نەو  وەهار  یاران  

خەم و پەژاره دوور  بۆ  چەنەتان  

بنیشدێ به شاد٘ نه  پای  کۆساران

به کەیف و ئاهەنگ به سەفاوسەیران  

وەهاری "ناسر" ئێشەن  و   هێجران  

ئەسیرەن به دەس دەرد٘ی بێ دەرمان  

#ناسر ئەخدەر

ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، ده‌گاو زاوه‌ری/روستای دز‌آور، نوشتارهای همایون محمدنژاد، هومایون موحەممەدنژاد، مه‌هدی ئه‌بری(هه‌ورام)، سەیوان ئێبراهیمی(گوازی)، سه‌لیم هه‌جیجی(خه‌مبار)، سوهراب مورادنیا(سیاوکام)، ناسر ئەخدەر، عەتا عەلی پوور، خەندە هەورامی، مه‌ڵڵاعه‌بدولوه‌هاب ئاریانی(مامۆسابه‌دبه‌خت)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-نوسود-تخت-ژاورود-پاوه-نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس -شبک(شه‌به‌ک)-سنجار-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژاد،سه‌فه‌ره‌کێ گالیوێری،وه‌سیه‌ت په‌ی مه‌زهه‌ری،یانەوخەما،کەلەبەروو شێعرا(۱۹)،
نوشته شده در تاریخ سه شنبه 15 اسفند 1396 توسط همایون محمدنژاد
.: Weblog Themes By Abdollah Habibi :.

تعداد کل صفحات : 3 :: 1 2 3