سەرچەمەو مەرێ ، شێعرێوە جە کاکەقەیۆم دانشوەر


‍ سەرچەمەو مەرێ :

هەر زاوەر وەشەن هامساو تەوێڵێن
ئاوەو  هانەکاش، مەڵهەموو زێڵێن

ئاوەو هانەکەو کەمەرە سیاوی
ئەر وەری، مە بی دووچاروو یاوی

هانەو دەرەو وێ، و هانە گماڵێ
ملانێ سەرشا، ئا سۆسەن خاڵێ

ئاوەو هانەکەو سۆفی هەسەنی
یا ئاوەو هانەو چەمەو دەربەنی

ئاواتە وازان خەڵکوو گەرمیانی
تکێوش تکنا ، سەروو زوانی

بازیانە قووڵێ، وەربیر ، هانەوان
پەرێ وادٚاری، ئاویشا دەوان

هانەو دۆڵانا و ملە هەساری
باخەکا دارا و مجیانێ واری

هانە کویلە، و کەمەرە دەرە
بە جۆت کەوتێنێ ئا وەراوەرە

خسووس هانەکەو سەرچەمەو مەرێ
وستێنێش هاژە ئا دەرە دەرێ

هانەو کمکمەی، هانەو هامنۆی
پەرێ فێنکی ماس و کەرێ و دۆی

لەزەتشا بەرا، هەوار نشینێ
پەوکەی ماچاشا چەمچە نەخشینێ

ئاوەو هاناش، کاسە وەرواوا
دوە هەسارە، تا هانەو ساوا

هانەو مێدٚالەی، هانەو مەرجانێ
باخێ زاوەریش پەنە دارانێ

ئەگەر نەلینە  ئەو بزازەرا
نەنۆشی ئاوەو ئا هانە و دەرا

پێسەنە عەمرت مۆفت لوابۆ سەر
چوون نەکەردٚەنت، تەواف جە زاوەر

هانەو لاردٚەرەی، گمەو داڵانی
مەر هانە لاروو لاو کۆساڵانی

ئاندٚە دڵگیر و وەش گەوارابۆ
سازگار چەنی، پەلکێ یارا بۆ

مەر بلی چنی، چنووروو کاوا
وەری جە ئاوەو ، هانە قاڵاوا

ئاوەخت بزانی فەرد هەر ئا فەردەن
جە زاوەرەنە زینگانیش کەردەن

ئاوەو سەربەسی و چەمەو مالمینی
سازگارتەرێ، جە هەنگڤینی

یاگێ خاسانێ و تەعات و ڕۆچەی
هانە سیاوو ، هانەو هەڵووچەی

هانەبەرچەمی گێروو گیانەوە
پاسە وێش بەستەن هەورامانەوە

بەنامێ تۆوە، ئەی هانەبەرچەم
هەورامانەکەم، خەمش بیەن کەم

هەرچی بنویسوو هەڵای هەر کەما
ڕۆح و گیانم، هانەبەرچەما

ئاشناییم هەن، فرە هەتا کەم
جە هارەسێڵێ و بابا بنیادٚەم

پەی ئاوەوەرەو  گوار و بەقی
وەشا وەژنانێ و هانەو سادٚقی

هانەو حەبیبی، وەزە قاڵاوێ
زاوەرشا کەردٚەن مێرگ و شەتاوێ

شراش و تاشڵێ، تا هانە مارا
چینەو ژەرەژا، ویتەو گوارا

ڕازنۆوە هەردٚوو دەگاو زاوەری
(قەیۆم)!بە تاریف لەزەتش بەری؟

وێت لوە هانەو حەممەدٚوو جانەی
تێر ئاوی وەر جە سەروو هانەی

بسمێللا کەرە، ڕەحمان و ڕەحیم
جە هانەو مزگی گێرە، دەس و دیم

پیرشەمام نماو نیمەڕۆی وانە!
بۆرێ مانگڵێ، ئانەنە  هانە

گردٚوو زاوەری هانە بە هانە
سەرکێشی کەرە، نما بوانە

تا هانەو لاسەو حاجی سمەیلی
نما وانەکە، ئاشقوو لەیلی

سۆفی ڕەحمان و هەسارەو مەڵڵای
هانەو زوهرەی ، نێعمەتوو ئەڵڵای

ویرت نەشانێ، لابدٚە لاشا
هەرچندٚ ڕاگاکە کەمەر و تاشا

هانەو دڕەیێ  خۆ دڕەی داڵا
بەڵام ئەر نەڵی گێڵایت بەتاڵا

جە دەست نەشۆ ، با ئی سەیرانە
هانەو ئازیز ی، تا وەهارانە

یا گەرمەدۆڵە و هانەو نساری
هەردٚوو هامنۆی سەر هەتا واری

هەسارەو کاکۆ ی، هەسارەگولانێ
هانەو چنارەیت جە ویر نەشانێ

یاران، هامسەران، گەشتوو ئی هەردٚا
بیناخاتروو ئا هانە سەردٚا

گێرتەنم جە وەر چی وەهارەنە
هیچ نیەتێو تەر ، نیا کارەنە

مادام مەرامم کەش و کۆ نیا
بێ نامە بەردٚەی، مازووشا جیا

بینایی دیدٚەم یاری زاوەری !
پەی کەم و کۆڕیش گلەیێ نەکەری

#قەیۆم دانشوەر نەروی  ۱۳۹۹/۱/۲۷

سڵام و سپاس پەی جەنابیت کاکەقەیۆم گیان! دەسێت نەناڵا،فرە وەشت زاوەر و چەم و دۆڵ و کەش و هەوارش لاونانتەو،زەوقی شاعێرانەت کۆ بە کۆ، هەوار و هانە و چەم و دۆڵش گێرتەنەرە وەر، منیچ پێسەو زاڕۆڵەو زاوەری ماچۆ:

دەست وەش بۆ کاکەقەیۆم گیان
هەناسەو شێعرێت یاوانەو ئاسمان

#هومایون موحەممەدنژاد

جوابوو کاکەقەیۆم دانشوەری

وەڵڵا وێم لایێقوو هیچی مە زانوو کاکە هومایون گیان ، من پەی نوونگێوی گێڵوو سەروو یۆ بە یۆو دەگایەکاو هەورامانیەو چێوێو بنویسوو تا ئا نامە ڕەسەنێ گمێ نەبا، جەنابت یاڕەبی ئا دەس و دیدٚەتە هەر بەرقەراربۆ نوونگەت دانێ دەسەو پەی هانەو باخەکا زاوەری، حەیفم ئاما وێم لادەو چا نێعمەتیە کە هانەبەرچەمەنە وستەبێت ڕوە .
ئیجا من ئەسڵوو هانەبەرچەمیم جە شێعرەکێنە ڕەبت دانەوە بە سایتەکەو جەنابیت، یانێو من تیرێوەو دوێ نیشانێم گێرتێ،
ئاخر بەیتش خێتابا بە جەنابیت بە ڕەوتوو ڕمەزی. پەوکەی ڕاسەڕا نامەکێت نەدٚام بۆنەو مەزەو ڕەمزەکەیشەو

#قەیۆم دانشوەر




طبقه بندی: فرهنگی و هنری، اجتماعی، ادبیات/شعر، اخبار، زوانی هه‌ورامی، جفرافیا، شهرها و روستاهای هورامان، ده‌گاو زاوه‌ری/روستای دز‌آور، تصاویرومناظرطبیعی وتاریخی، هومایون موحەممەدنژاد، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،سەرچەمەو مەرێ،شێعرێوە جە کاکەقەیۆم دانشوەر،
نوشته شده در تاریخ چهارشنبه 27 فروردین 1399 توسط همایون محمدنژاد
کەلەبەروو شێعرا(۱۷۲)پەی کۆچوو کاکەباقی شەفێعی

دیسان تەم و خەم نشتەو دیاران
نەواو شمشاڵێ نمەی هەوران
شادٚ و گەش نیا هەوراوو جاران
باربەندٚنیش کەردەن یۆ تەر جە یاران
بەر و بووم دیسان بزمش وناران
ئەدەب ماتەمەن نەواری واران
ئەنجمەن ماتڵ مووزە ئێنتێزار
ئێرشاد ماتڵەن سەر باری دیار
مەحزوون جە تاران دیل و گرفتار
میرزا هاوارش هاوار هەی هاوار
پاپا ژەرەژان هەراڵەو داران
ئێساڵ نمیا بەر نەواری واران
کەی قەڵەم تاوۆ تۆ کەرۆوە یادٚ
کێ هەن بتاوۆ وێش کەرۆ سەیادٚ
شاعێری بەرزم ڕۆحت شادٚی شادٚ
سەر بەرزو هۆزی گەردەنت ئازادٚ
هەورامان مڵکش سەیادٚی داران
مەزاری تازێش نەواری واران

         #فەیسەڵ هێدایەتی

‍ نمارۆ شەماڵ سۆزەی سۆب سەحەر
نەوای شمشاڵێ وەش و ڕۆح پەروەر

ماچی  نەوسوەیل ناوەشا ئارۆ
مەرەجیۆم واوەی هەواڵێ نارۆ

بەش نەکەردەبۆش فەڵەك خیاڵێ 
نمەیۆم نە گۆش سۆزەی شمشاڵێ

دووربای تەمبارەن سەراو و هانەی
ڪوشیانەو چراوو عەنتیکەخانەی

مەیخانە وێران ، خەمبارەن ساقی
کۆن نەوای لوولەی سۆزدار "باقی"

نمەیۆ نەوای شنۆی شاغەزەڵ
ڕوباعی  پۆخڵ ، قەسیدە شەخەڵ

خامە بێ هاز و ڕەحشەی دەس بێ شۆن
زوانم لاڵ بۆ  ، واوەی شین و ڕۆن!

مەرگت مەرگەسات قافیە و فەردمەن
ئاخ  لالۆ پەی تۆ  ، داخ و دەردمەن!!

نێشتەنا بە کۆس بەزمێ تازەوە
بە گران خەمێ بێ ئەندازەوە

کێن خامە نە ڕووی حەریرێ شانۆ
بە مەرسیێوە (هەڵەبجەی) لاونۆ

"هانەساو" بێ ئاو؛ "وێمیر" زویرەن
"هەوڵی" هەوڵشەن ، پاوە دڵگیرەن

"ئاتەشگا" خەمبار ، شاهۆ ناشادٚەن
سەردەرە مل کەچ دووری(سەیادٚەن)

نیەن سەیادێ پا جاسووسگاوە
بێ "سەیادٚ"ییەن دوور بای جە پاوە

کۆن پەی مەولەوی دیسان جە نۆوە
گەوهەرێ بارۆ بە یاڎوو تۆوە

ناسك خیاڵاو دەورەو ویردەی
میرزایاو پاوەی، سەیدی کۆچ کەردەی

چنی هامفەرداو هێزی یا ئارۆ
پەی کۆتەئاڵات کەرانە شارۆ

کۆڕە شێعرێ بۆ بە یادٚو تۆوە
بەش بێ خەم بووسی نە سای گڵکۆوە
---------٭٭٭٭٭----------
پەی کۆچوو دمایی مامۆسا باقی شەفێعی
#سوهراب_مورادنیا
۹۹٫۱٫۱۷ کۆچی ڕۆجیاری


سڵام مامۆساهومایون گیان 
کۆچوو مامۆساباقی شەفێعی کارەساتێوی گران بێ پەی دنیاو ئەدب و هونەر و ڕەسم و یاساو هەورامانی..گردش داخدار ڪەردیمێ..ڕۆحش شادٚ و ماواش بەهەشت بۆ..یادٚش باقی بۆ پەی هەمیشەی جە دڵیمانە...


ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، شهرها و روستاهای هورامان، جەواد حەمزه (فێراق)، سوهراب مورادنیا(سیاوکام)، حامی غەریبی، سه‌باح حه‌سه‌نی شیانی، باقی شه‌فێعی، میرزامەجید عەدەمی و فەیسەڵ هێدایەتی، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱۷۲)پەی کۆچوو کاکەباقی شەفێعی،
نوشته شده در تاریخ یکشنبه 17 فروردین 1399 توسط همایون محمدنژاد
کەلەبەروو شێعرا(۱۷۰)

داستانە

کەشاوەرزێ  بێ  و  کناچێ خاسە
ژیرە و زەریفە و پەڕ دەنگ و باسە

جوانێویچ بێ عاشقوو باڵایش بێ
گەرمی ئەشقینە کەسی نەژناسێ

مامۆسا و تاتەش ملا پەی داوایش
تا تیما‌ر کەرا زامی خاس یاوایش

تاتەکەش ماچۆ بە شەرتێ مدٚەوش
چن گاوێ شێتێ وەر مدٚەونە حەوش
 
قلیچکەشا گێرۆ جا سەروو چەما
کناچێ وێتانە  ئانە کەی خەما؟!

بەرەشا کەرد و گاوێ بازشا بەردٚ
چەنەشا تەرسێ چ مەردٚ چ نامەردٚ

ئەوەڵی بەرشی دەسش پەی نەبەرد
وچکلەتەر چادٚیچ دەسش نەویەرد

یەرەمین ئاما کە گورەکڵە بێ
چێروو دەساشنە ئەجیێ مڵە بێ

ڕەما شۆنیشرە ئادٚیچ نەگیریا
تاتەش جە دوورەو گڵوەزێش گیریا

واتش ڕۆڵەرۆ! هیچش من مەشۆ
گورەکڵە چیشا دەسشنە بەرشۆ؟

نەزانێ کوڕە مشکڵش چێشا
چوون فرسەت لوا ئاخ وئەندێشا؟

گاوی زل لۆا دەسش پەی نەبەرد
فرسەتوو دویچ  دەسشنە  ویەرد

واتش گورەکڵە     گرتەی ڕەحەتا
کەی ئێننەوگاوێ شێتی زەحمەتا

شانشرە ڕەما دەسش وس ملش
وەشی  وەساڵی خرپیا دڵش

واتشا ئافەرم گورەکڵە گیریا
دەسماڵوو وەشی دەورێ هۆرسوڕیا

دەسش بەرد گێرۆش تا بۆ بە زەما
تمەز یەرەمین قلیچکەش نیا

"حامی"کە فرست جە دەسنە بەرشی
کەی تاوۆ  چنۆش کارخانەو فەرشی

#حامی غەریبی
هۆرگیڵنایەو سەروو نەزمی

کۆرپەشێعرێ/شارۆ
ـــــــــــــــــــــــــ
تۆ کە
   سەرچەمەو وەشەسیایی بی
من 
  گەورەتەرین ئێستێعمارگەرنا...


۹۹/۱/٤

(۲)

وەختێوە کە
       مانگەشەوە بۆ

چەمێم چەنیش
          ملا تا وەرم...!
۹۹/۱/٦

(۳)


ڕۆنە کە هیچ...
شەوێچەنە
خەیاڵم سەرپەندٚاما و
    لچێم  
        مجاترە وەرم و وڕاوێ

سەعبانەیچ
   ئەدٚامەنە و 
      ڕاپۆرتوو کووچە و کۆڵانی...

٥ـ۱ـ۱۳۹۹


ادامه مطلب

طبقه بندی: فرهنگی و هنری، اجتماعی، ادبیات/شعر، زوانی هه‌ورامی، شهرها و روستاهای هورامان، هومایون موحەممەدنژاد، بێهرووز موحەممەدپوور(شارۆ)، حامی غەریبی، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۱۷۰)،
نوشته شده در تاریخ سه شنبه 5 فروردین 1399 توسط همایون محمدنژاد
پەیامەکاو نەورۆزوو ساڵەو ۱۳۹۹ جە لاو شاعێرا و نویسەراو هەورامانی و هامکار و هاموەڵاتیەکام، پەی هەمێشەی جە دڵمانە،یادگار مەناوە


 سەفای سەیرانگا و سارا و سەرهەردان

مەناڵۆ پەی بەزم  جەرگەی هام فەردان

       مەولەوی 

برای ئازیز و وەشەسیا کاکە همایۆن گیان ! 
سڵام و و ڕەحمەتوو پەروەردگاروو وەهاری و ژووژنایۆ تەبێعەتیت وەنەبۆ 

هۆمێۮوارنا  ئی ساڵەی تازێ ، ساڵەو تەمامیای گردوو  مەرارەتوو ژیوای ناوەشوو خەڵکی بۆ  و خوۮا کەرۆش بە مایەو پیت و بەرەکەت و لاشەساقی  و واران ئاسا وارۆ ملوو وێتا و کەس و کاری ئازیزیتارە 

برات : حەمەی فەهیم  نەورۆزوو ۹۹

نەسیم مەحرەم مابەین یاران
ماچان وەهارەن، سەوزەن دیاران
گیان وە بێ تاقەت موینوون ئارۆ
زاهێرەن هەوای لای ئازیز دارۆ
"مەولەوی"
سڵام و حورمەت مامۆساهومایون گیان
نەورۆز و ساڵی تازەیتا مەبارەڪە بۆ،هیوام ئانەن ساڵێوی پەڕ خەیر و بەرەڪەت بۆ پەی وێتا و خانەوادەو موحتەرەمیتا..دوور جە ناوەشی و ناڕەحەتی بۆساڵێ تازێتا..
#سوهراب مورادنیا

سڵام و  سەعادەت بە نسارت بۆ
هەر سات و زەمان خودٚا یارت بۆ

هەر چندٚ فرە دێر جوابم داوە
مەگێرەم تاوان چوون دوورا، پاوە

هەتا مەریوان کەل و ملێنێ
هەر کاو و دۆڵا تاش و تڵێنێ

خسووس کرۆنا کارێوش کەردٚەن
برا جە برای دەس  و دڵسەردٚەن

نە دیدٚەو دیدٚار نە دەس ماچ کەردٚەی
تەرسەو بێ دەوای تا تەرسەو مەردٚەی

سەبر و قەرارش جە دەس بەردٚێنمێ
شەرمەندٚێ  دیدٚەو یاراش کەردٚێنمێ

ئیسە پێخامت بە مەژگم  یاوا
خێرا دڵ و مەژگ کەردٚەشا داوا

دڵ واتش مەژگی چندٚ سادٚارە نی
وتەو(گۆشی)نی  بارە  لارەنی

نە ڕەفێق نەیار نمەوزی یادٚم
تۆ فرماندەنی؟ڕەنجی وە بادٚم؟

مەژگی وات ئەی دڵ مەگێرەم وەنە
هەزاران  ویرێم  گێڵانێ  چەنە

ویروو بێ نانی، ویروو بێ دانی
ویروو دەردٚی بێ، دەوا و دەرمانی

به هاوارێشا من بێدار بیا
چندٚ فەردم ئەو سەر ئی سەفحە نیا

ساڵێ تازێتا بەڵ سەدٚ ساڵێ بۆ
گردٚ ساڵێش دوور جە دەردٚێ تاڵێ بۆ

ئافەت و بەڵا و کرۆنا ویرووس
دوور بۆ جە شمە،دۆ کوانی(ڕووس)

بە قەدێمیانە، بەڵایای خەتەر
دوور بۆ باڵایتا گنۆ کۆی بێ بەر

"قەیۆم دانشوەر نەروی، ۱۳۹۹/۱/٥

 تایبە پەی کاکە هومایوون موحەممەدنژادی


سڵام هومایۆن گیان فرە ئازیزەنی.
ساڵێ تازێت پیرۆزە بۆ.
جە خودٚایم تەڵەبا وێت خانەوادەی ئازیزت جە به‌ڵاوکرۆنای و تەماموو بەڵایا مەحفووزێ بیدێ.
#ئێبراهیم شەمس
سڵام کاکە گیان 
سەرمەنگوڵوو ژیرا هەورامانی
یانەباوانوو  شێعر و فەرهەنگوو هەورامانی
ئیشەڵڵا وەهارت به وەشی دەس پەنە کەری
و لاوانەزەرڐ پەژارە و مەینەت جە دڵت هۆر کەنۆ
دڵتنە بەختەو وەشی پاسە بنجە پێکو کە هیچ  خەزانێ دەسەیاو نەبۆ بە کامەرانیت
وەشما  گەرەکنی
بە  وەشی  ژیوی
کاکە هۆمایون  گیان
قۆمپەولەکێ هۆنەر  و زانشتی

#سەعدی عەزیزی هەورامان

ادامه مطلب

طبقه بندی: فرهنگی و هنری، اجتماعی، ادبیات/شعر، اخبار، تاریخ، زوانی هه‌ورامی، جفرافیا، شهرها و روستاهای هورامان، ده‌گاو زاوه‌ری/روستای دز‌آور، هومایون موحەممەدنژاد، جەواد حەمزه (فێراق)، شۆرش عه‌زیزی/"ئاوات"دیارکهن، سوهراب مورادنیا(سیاوکام)، عوسمان ڕەحیمی(مورید)، حامی غەریبی، دوکترسه‌یێدمه‌هدی سه‌جادی، سه‌باح حه‌سه‌نی شیانی، هادی سپه‌نجی(خاڵه‌)، پویا تالب نیا، فەرید زاوەری، حسه‌ین خورا(خه‌یاڵ) ، کەرەمەڵڵا ئەمیری(ک الف یاس)، جه‌زا کامران(ئه‌دوای)، موحەممەد وەلی کاکایی، قەیۆم دانشوەر، یه‌حیا سه‌مه‌دی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،پەیامەکاو نەورۆزوو ساڵەو ۱۳۹۹ جە لاو شاعێرا و نویسەراو هەورامانی و هامکار و هاموەڵاتیەکام،پەی هەمێشەی جە دڵمانە،یادگار مەناوە،
نوشته شده در تاریخ جمعه 1 فروردین 1399 توسط همایون محمدنژاد
شه‌ونشینی فه‌رهه‌نگی«شه‌وچه‌ره»(به‌رنامێوی تایبه‌تی فه‌رهه‌نگی‌ جه‌ ئه‌ره‌مه‌رزیاو شنه‌و فه‌رهه‌نگوو هه‌ورامانی)  

بە پاو هەواڵوو کاکەئێبراهیم شەمس"ی پەی هەورامان هانەبەرچەم"ی:شه‌ونشینی فه‌رهه‌نگی «شه‌وچه‌ره»(به‌رنامێوی تایبه‌تی فه‌رهه‌نگی‌ جه‌ ئه‌ره‌مه‌رزیاو شنه‌و فه‌رهه‌نگوو هه‌ورامانی) جە شاروو پاوەی لوا ڕاوە.
ئه‌ره‌مه‌رزیاو شنه‌و فه‌رهه‌نگوو هه‌ورامانی جه‌ درێژایی جموجووڵه‌ فه‌رهه‌نگیه‌کاشه‌نه‌ دایمه‌ حه‌ولش دان تا به‌ عالته‌رین شێوه‌ به‌ فه‌رهه‌نگ و کلتووروو هه‌ورامانی خزمه‌ت که‌رۆ. یۆ جه‌ ئا ڕه‌سم و ئایینا که ژیوای خه‌ڵکوو هه‌ورامانیه‌نه‌ یاگێوه‌ی تایبه‌ته‌ش بیێنه‌، ‌ئایینوو شه‌ونشینی بیه‌ن که‌ هه‌ر چن ئیسه‌ فره‌ که‌مڕه‌نگ بیه‌نه‌وه‌ و په‌ی ئێمه‌ خه‌ڵکوو شاری ئێتر مه‌گه‌ر پێسه‌و ڕازێوی په‌ی زاڕۆڵاما نه‌قڵش که‌رمێ، به‌ڵام تا ڕادێوی که‌م دلێ بڕێو جه‌ ده‌گایانه‌ هه‌ڵای به‌ شێوه‌ی قه‌دٚێم ملۆ ڕاوه‌. 
ئێمه‌ به‌ پیشنیاروو هامکاراو ئه‌نجومه‌نوو شنه‌ی بڕیارما دا ئی ئایینیه‌ به‌ شێوێوی فه‌رهه‌نگی زیننه‌ که‌رمێوه‌ و جه‌ شه‌وه‌کاو زمسانیه‌نه‌ دوێ حه‌فتێ جارێو شه‌وێوه‌ ئه‌نجومه‌نه‌نه‌ بنیشمێره‌ و ئایینوو شه‌ونشینی به‌رمێ ڕاوه‌. 
وه‌ڵ جه‌ گردٚ چێوی با بزانمێ وه‌ڵینه‌کێما ئی شه‌ونشینیێشا چه‌نی گێرتێنێ:
خه‌ڵکوو هه‌ورامانی جه‌ ویه‌ردٚه‌نه‌ خه‌ڵکێوی فره‌ زه‌حمه‌تکێش بیه‌ن و گردٚوو ژیوایشا سه‌روو هه‌رمانه‌و باخداری و کشت و کاڵ و تا ڕادێوی که‌میچ ئاژه‌ڵداری چه‌رخیان. به‌ جۆرێو که‌ شش مانگه‌و وه‌هاری و هامنی یه‌کسه‌ر هه‌رمانه‌ش که‌ردٚێنه‌ و وێره‌گا به‌ له‌شێوی شه‌که‌ت تا ساعبێ وته‌ن.
به‌ڵام شه‌وه‌کێ پایێز و زمسانی که‌ شه‌وێ سه‌ردٚێ و درێژێ بیێنێ، خه‌ڵکی په‌ی ئانه‌ی بتاوا وه‌ختوو وێشا په‌ڕ که‌راوه‌ به‌ نۆبه‌ شه‌ونشینی لوێنێ یانه‌و یه‌کترینی و تا یه‌رێ چوار سه‌عاتێ به‌ قسێ وه‌شێ و ڕازئه‌وه‌گێڵنای و به‌ گه‌مه‌ که‌ردٚه‌ی و به‌ شه‌وچه‌ره‌ واردٚه‌ی شه‌وه‌کێشا دێنێ سه‌ر.
سه‌مه‌روو باخه‌کاو هه‌ورامانی فره‌ته‌ر یا هه‌ناری بێنێ یا وه‌زی. جه‌ ئی شه‌وانه‌ بڕێو وه‌ختێ ئی شه‌ونشینیێ یاردٚی دایچش پاڵه‌نه‌ بێ و وه‌زه‌ره‌ماڕای و مه‌ژگه‌ چنیه‌ی و هه‌ر پاسه‌ هه‌ناره‌کوای و ڕۆگنار گرینایچ به‌ گه‌ل جه‌ ئا شه‌وانه‌ ئه‌نجام دریێ.
وه‌ختێو باسوو شه‌ونشینی کریۆ بێ ئێختیار زه‌ینما ملۆ سه‌روو دویه‌ر چێوا:‌ گه‌وره‌وه‌بازی، ڕاز ئه‌وه‌ گێڵنای و شه‌وچه‌ره‌واردٚه‌ی‌.
گۆره‌وه‌ بازی یۆچا گه‌ما بێ که‌ فره‌ته‌ر پیای و کوڕێ جوانێ ئی گه‌مه‌یه‌ که‌رێنێ و پاڵشه‌نه‌ گرم و قاڵ بێ و گۆرانیه‌ واته‌ی و شادٚی و خه‌ڵک گردٚ پێسه‌و یۆی بێ نه‌ که‌س ده‌وڵه‌مه‌ن بێ و نه‌که‌سیچ ئاورایێنه‌ سه‌ره‌ نیێوه‌.  
شه‌وچه‌ره‌ ئا واردٚه‌مه‌نیه‌ بێ که‌ شه‌وه‌کاو پایێز و زمسانی دلێ شه‌ونشینیه‌کانه‌ دلێڕاسه‌و یانه‌یه‌نه‌ سفره‌ یاوێنێره‌ و شه‌وچه‌ره‌ش که‌رێنێ سه‌ر و گردٚ پێوه‌ره‌ وه‌رێنێش. شه‌وچه‌ره‌ جه‌ هه‌ورامانه‌نه‌ تایبه‌ت بێ به‌ ئا سه‌مه‌را که‌ باخه‌کانه‌ بێ. فره‌ته‌ر هه‌ناری بێنێ و مژگه‌ و هه‌چکوچی و هه‌نجیره‌ وشکێ و ساوه‌ لتێ و قه‌یسی و .... ئیجا ڕه‌سمێو بێ دماو هه‌نار واردٚه‌ی ئافته‌وه‌ و له‌گان ئارێنێ و پیای ده‌سێشا شۆرێنێ.(ئه‌ڵبه‌ت ئینه‌ نموودێو جه‌ پیاسالاری بێ).
به‌ڵام جه‌ ویاری فه‌رهه‌نگیو ئی باسه‌یه جه‌ شه‌ونشینیه‌کانه‌ باسوو ڕاز ئه‌وه‌گێڵنایا. ئاوه‌خت که‌ هیچ ڕه‌سانێو نه‌بێ؛ نه ئینترنت و نه‌‌ میدیا و نه‌ ڕادیۆ و نه‌ ڕۆنامه‌ و گۆڤار و حه‌تتا نه‌ کتیب بێ، ڕاز ئه‌وه‌گێڵنای فره‌ ڕه‌واجش بێ. خه‌ڵکی دماو یه‌ک ڕۆی کاری یا چن ڕوێ کاری په‌ی ئیسراحه‌تی و ده‌مه‌ته‌قێ شه‌ونشینیه‌نه‌ ده‌وروو یۆی گلێرێ بێنێوه‌ و داوا که‌رێنێ جه‌ پیایوی شاره‌زای باسه‌وادٚی که‌ پنه‌ش میرزا واچینێ ، تا ڕازه‌شا په‌ی گێڵنۆوه‌. و ئه‌پێسه‌ چن سه‌عاتێو وه‌ختوو وێشا ویارنێنێ. ئی شه‌خسه‌ که‌ ڕازه‌‌کێ گێڵنێوه‌، ئێننه‌ ڕازه‌‌کێش ملوو خه‌ڵکیه‌ره‌ و به‌ تایبه‌ت جوانا و زارۆڵاره‌ کاریگه‌ریش بێ، ئا خه‌ڵکه‌ وێشا نیێنێ یاگێ پاڵه‌وانه‌کاو ڕازه‌کێ. ماچا جارێوشا جه‌ یۆ جه‌ ده‌گاکاو هه‌ورامانی وێره‌گانێو دماو نانوو وێرێگای خه‌ڵکی فره‌ سه‌روو حه‌وزی گلێرێ باوه‌ و کیانا شۆنه‌و میرزافڵانه‌که‌سی که‌ ڕاز ئه‌وه‌گێڵن بیه‌ن. میرزا به‌ ئاو و تاو ده‌س که‌رۆ ڕازه‌وه‌گێڵنای که‌ فڵان پاڵه‌وان شمشێره‌که‌ش کێشا و به‌ زه‌رب ماڵاش دژمه‌نه‌که‌یشه‌ره‌. چا عانه‌نه جوانێو ئێننه‌ دلێ ڕازه‌کێنه‌ بۆ و وێش نیان یاگێ پاڵه‌وانه‌که‌ی، خه‌نجه‌ره‌کێشۆ و که‌رۆش له‌مه‌و یۆته‌ریه‌ره‌ که‌ پاڵشه‌نه‌ نیشته‌نه‌ره‌. ئینه‌ گرد کاریگه‌ری ڕازێ و ڕاز ئه‌وه‌ گێڵنای جه‌ شه‌ونشینیه‌کانه‌ بیه‌ن.

ادامه مطلب

طبقه بندی: فرهنگی و هنری، اجتماعی، ادبیات/شعر، اخبار، جفرافیا، شهرها و روستاهای هورامان، نه‌سیمووفه‌رهه‌نگوووهه‌ورامانی، ئێبراهیم شه‌مس، فه‌تحوڵڵا ڕه‌زایی، وەلی فەتاحی، میرزامەجید عەدەمی و فەیسەڵ هێدایەتی، فایق لوتفی، حه‌بیبه‌ڵڵا موسته‌وفی، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،شه‌ونشینی فه‌رهه‌نگی «شه‌وچه‌ره»(به‌رنامێوی تایبه‌تی فه‌رهه‌نگی‌ جه‌ ئه‌ره‌مه‌رزیاو شنه‌و فه‌رهه‌نگوو هه‌ورامانی)،
نوشته شده در تاریخ جمعه 18 بهمن 1398 توسط همایون محمدنژاد
کەلەبەروو شێعرا(۹۱)

ئی خەڵکە عەمرێن کە دڵ مەردێنێ
باخ   و   باخات  و  گردی  زەردێنێ

هەرمانەو هارەق متەی پەی ئیشان
ئانێ   تێرێ  با ،  مشتێ جەردێنێ

قەدیم ئی خەڵکە ئاوەز بێ و هازە
داخۆم ئیسە چێش حیزش کەردێنێ؟!

دەروونشا بیەن  بە کوورەو ئایری
هەناسە  کێشا   یۆ یۆ   سەردێنێ

ئەورایی پاسەش کەردەن بە خەڵکی
ئاواتەکێشا   ،    دڵنە    مەردێنێ

ئیسە نەی شۆنەو نانە لەمێوە
جە فیشەک لوخێشا ویەردێنێ

ئانێ پێسەشا کەردەن بە خەڵکی
مەر خود٘ا  زانۆ   چ   نامەردێنێ

#پەرویز   بابایی 

 خەم دەمش دڕیانەرە ، شاد٘ی کەسی مەدارۆ

هەڵمەو دەموو زمسانی چەمێ پیای بەر مارۆ

تۆزە مەتەکیۆ پەیما گژەو داخا نمازۆ

هەنارەکێ زەردێنێ کەس نیا باخی دارۆ

پەنجەرە ماتش کەردەن چیروو دیوارێ بەرزی

کەس ونەو مریچڵەکا ئی هەڵمەتێ مەوجارۆ

قەراخوو ڕاو وەهاری پەڕا هەرس، کێ ماچۆ؟

ئی زمسانە تا مەنەن ئەپی کەشا مەیارۆ!

من و مایەیوە بەرزەو چنارێ وشک و بێ گیان

ماچی وێم وزوورە وار تا نەکریانا دارۆ

تێخەی مەسانا ژیرێ  بڕا دەسوو زەمانەی

هەتا زمسانی پێسە کەس زاتش نەبۆ بارۆ

#فەرید عەباسی



ادامه مطلب

طبقه بندی: ادبیات/شعر، زوانی هه‌ورامی، فەرید عەباسی، په‌رویز بابایی، حامی غەریبی، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۹۱)،
نوشته شده در تاریخ سه شنبه 31 اردیبهشت 1398 توسط همایون محمدنژاد
.: Weblog Themes By Abdollah Habibi :.

تعداد کل صفحات : 2 :: 1 2