کەلەبەروو شێعرا(۹٥)

ئاسمان زوڵفێ شەوێش ئاردێرە کارش پڕچنا
دووکەڵوو سینەو شەماڵی ڕۆجیارش پڕچنا

هەمهەمەو باخوو هەنارا شەربەتەو دیداروو تۆ
نازوو عێشوەو هاڵەکۆکێ ئێختیارش پڕچنا

بوومەلەرزەو شارووعەشقی کەردەنش وێرانە دڵ
مەویەری،چەم ئێنتێزاری ئێنتێزارش پڕچنا

باسوو تەرتیبوو هەسارا و باسوو مانگێ چی کەری
تاقوو قەوسوو بروەکات لەیل و نەهارش پڕچنا؟!

دڵ بیەن باخوو هەناسا،چەم بیەن هانەو چەنا
ئننە عازیەت باڕەنا زەوقم دەمارش پڕچنا

بێ شەماڵی کوشتەنا ئی زوقمە تا کەی حەر مەنۆ
بێ موبالاتی گوڵا ئانا وەهارش پڕچنا؟!

#فەرید عەباسی

‍ 
لەتەرێ وا دە، خەمەکام ڕێسە
با زوو تەمامیا ، با  بە وەرێسە

وەروو بەرەیتا، بۆ دەم سێدارە
با کەم زەلیل بۆ بەند٘ەی بێچارە

#حامی-غەریبی

داره وەنەکێ سووەیلش ڕەشتەن

یه هوونی دڵەن وه ڕووشدا وەشتەن

#ناسر ئەخدەر ٭ ۹۸/۳/۱۲

‍ پەی تۆ هەن جە گێڵ دیدٚەی ڕۆچەوان
وەسەن کەم فیز کەر ،جە تاقی ئاسمان

شێوەی ئەبرۆی یار کەردەنی تاراج
وەرنە چوون تۆ هەن هەزاران کەمان

#فێراق



ادامه مطلب

طبقه بندی: فرهنگی و هنری، ادبیات/شعر، زوانی هه‌ورامی، فەرید عەباسی، جەواد حەمزه (فێراق)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۹٥)،
نوشته شده در تاریخ جمعه 17 خرداد 1398 توسط همایون محمدنژاد
کەلەبەروو شێعرا(۹۳)

ئە تۆ وارانوو پایێزی ئەمن بەرگەیوە هۆر کنیا
بەرەو عومروو وەشەسیایی بە جەوروو تۆ سەرم ژنیا

چراوەو وێرەگاو بەختێم  نەکوشیەیبێ هەتا بێنی
شەوەوپاێیزو دووری تۆ ، هەناروو دڵ وەشیم ڕنیا

مەزانوو کێ دڵش بەردی  منت پی وێرەگا وەردا
دلوو گەردی پلێ گۆشتا دڵوو تۆ پەڕ جە ئاسنیا؟

نەمەن زەوقوو وەشەسیایی چراوەوقەومی کوشیاوە
بە ڕەحمەت بانێ بێگانێ هەنارێ دڵوەشیت منیا

دڵم حەر هەورێ مژمارۆ سەروو ئاسمانوو ویراتۆ
شەوێ ویرت نەکردانێ هەتا تەرموو خەما بنیا

چریکەو بوڵبڵوو تاسێم دڵوو باخەیوە هۆر ناوۆ
ئەگەر دەردەودڵی بازۆ تەماموو شێعرەکا ونیا

#فەرید عەباسی

جەستێوە بیەن بێ ڕۆح پێشێنێ بیێنێ نەی
چا وەختەو کە واتانێت ڕاو مننە ڕوێ پوویەی

وەختێو کە دڵێ مەڕیۆ تەسویرێ گنانێ چەم 
ئی هەرسێ کە تکیارە تارێخێ  کەرانێ تەی 

نەقشێو کە دڵێ منیۆش تەقدیروو جوانیوە
دەسماڵێ زەمانەی گر ئی عەکسی کەرانێ وەی

هەر نازێوە تۆ کەردەن ،دەورێوە  جوانیما
تاتەڕۆ  چەنی کریۆ ئی نازێ مرانێ دەی

من ئیسە کە گێڵووە جادەینە کە پیمانم 
هەر قەنچێنە سەد جلوێ کەپرێنێ کەرانێ سەی
         
               #ژیواری

ئەگەر ئەشق توحفەی مەعبودی عەبدەن

سەنعان پەی ئەو ڕاز سوجدەی وێش بەردەن

بە تاقێق یاوان بەو سڕی حەقێق

ناڕەوا موهری بەد٘نامیش بەردەن

#فێـــــــــراق

لەیلەتولقەدرا  خوۮایا من جە بێ قەدریم غەمین
شەرمەسار و پەڕ جە تاوان دڵ بە داخ و ماتەمین

موعتەرێفنا هەر بە جورم و کەجڕەوی شی عەمرەکەم
قەترە هەرسێوەم بە ئیخلاس پەی نەچکنای ئەو زەمین

خەتمە قورئانێ نەوانام شەونمایێوەم نەکەرۮ
بێ تەراوێح شی جە دەس مانگی سیامی عەنبەرین

سوجدەگام هەر تەڕ نەبی جارێ بە ئاوو خەجڵەتی
تاقەتم تاعەت نەتاوان یا ئیلاهەلعالەمین

ئەر شەوو قەدری فەقەت شەو زیندەدارێ گێرۆ وەر
ئەی خەراباتی پەشێو و ئەی گوناکاری حەزین؟!

بەحروو عەفوێت ئەر شەپۆل شانۆ و نەگێرۆ گرۮ خەسێ
كۆن سیفاتو بەخششیت ئەر بەی نەبەخشی موزنێبین؟!

بۆ جە بۆنەو ئەحمەدی موختاری بەخشەم یا غەفوور
بێ بەهانە و بێ بەها دەم،قەسر و غیلمان حووری عین

یاروو غاری فارۆق و وەیسەلقەرەن عوسمان عەلی
حەققوو وێشان ئەر شەوو قەدری بیاونیشا یەقین

ڕەحمەتت وەختێ فەراگیرا گوناو من تاونۆ
سا کەرەم یاڕەب تۆفەیلێ پەی سێڕاجی شەرع و دین

سەد کە "سەعدی" هەر نەبی تاعەت گوزارێ سەر بە ڕا
خەرمەنت هەر مفتە بەخشانت غەریبیچ خۆشەچین
#سەعدی غەریبی




طبقه بندی: ادبیات/شعر، زوانی هه‌ورامی، فەرید عەباسی، جەواد حەمزه (فێراق)، سه‌عدی غەریبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۹۳)،
نوشته شده در تاریخ یکشنبه 5 خرداد 1398 توسط همایون محمدنژاد
کەلەبەرووشێعرا(۹۲)


 ڕەیوە بێ ، دوێ یاگە پایێ وێرەگا بێ و سێبەرە
ڕۆجیارێ بێ غەریب و  حەر  خود٘ا بێ وسێبەرە

کۆنەداخێ تیره شانێ هەڵمەت هەڵمەت پەی دڵیم
پەیجە نریابێ تەموومەو هەر گەڵا بێ و سێبەرە

شێرکەتوو قەندی کە بەسیا پەو لچاتۆ  کەوتەرە
تاڵە تام و ژاروو ماری تا بەڵا بێ و سیبەرە

دڵم کەردەن قونتراتوو سەرچەمەو ئاوەو چەمام
خزمەتوو دەردێنە بێنێ بێ دەوا بێ و سێبەرە

پەی نویستەی تاموو زوڵفاو تۆ قەڵەم ئاوارە بی
سەد٘وەرەق دریاوە لا هێشتای سەما بێ و سێبەرە

من بیا مەژنوونە وێڵەو خێڵوو دەشتەو زوڵفەکات
وستەبێناشا هەوارەی حەر جەفا بێ و سێبەرە

#فەرید عەباسی





طبقه بندی: ادبیات/شعر، زوانی هه‌ورامی، فەرید عەباسی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەرووشێعرا(۹۲)،
نوشته شده در تاریخ پنجشنبه 2 خرداد 1398 توسط همایون محمدنژاد
کەلەبەروو شێعرا(۹۱)

ئی خەڵکە عەمرێن کە دڵ مەردێنێ
باخ   و   باخات  و  گردی  زەردێنێ

هەرمانەو هارەق متەی پەی ئیشان
ئانێ   تێرێ  با ،  مشتێ جەردێنێ

قەدیم ئی خەڵکە ئاوەز بێ و هازە
داخۆم ئیسە چێش حیزش کەردێنێ؟!

دەروونشا بیەن  بە کوورەو ئایری
هەناسە  کێشا   یۆ یۆ   سەردێنێ

ئەورایی پاسەش کەردەن بە خەڵکی
ئاواتەکێشا   ،    دڵنە    مەردێنێ

ئیسە نەی شۆنەو نانە لەمێوە
جە فیشەک لوخێشا ویەردێنێ

ئانێ پێسەشا کەردەن بە خەڵکی
مەر خود٘ا  زانۆ   چ   نامەردێنێ

#پەرویز   بابایی 

 خەم دەمش دڕیانەرە ، شاد٘ی کەسی مەدارۆ

هەڵمەو دەموو زمسانی چەمێ پیای بەر مارۆ

تۆزە مەتەکیۆ پەیما گژەو داخا نمازۆ

هەنارەکێ زەردێنێ کەس نیا باخی دارۆ

پەنجەرە ماتش کەردەن چیروو دیوارێ بەرزی

کەس ونەو مریچڵەکا ئی هەڵمەتێ مەوجارۆ

قەراخوو ڕاو وەهاری پەڕا هەرس، کێ ماچۆ؟

ئی زمسانە تا مەنەن ئەپی کەشا مەیارۆ!

من و مایەیوە بەرزەو چنارێ وشک و بێ گیان

ماچی وێم وزوورە وار تا نەکریانا دارۆ

تێخەی مەسانا ژیرێ  بڕا دەسوو زەمانەی

هەتا زمسانی پێسە کەس زاتش نەبۆ بارۆ

#فەرید عەباسی



ادامه مطلب

طبقه بندی: ادبیات/شعر، زوانی هه‌ورامی، فەرید عەباسی، په‌رویز بابایی، حامی غەریبی، قەیۆم دانشوەر،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۹۱)،
نوشته شده در تاریخ سه شنبه 31 اردیبهشت 1398 توسط همایون محمدنژاد
کەلەبەروو شێعرا(۹۰)

تاقەتم بەستەن کرێڵوو بوخچەکەو دڵداریەو

حەر هەناریێوەم وەسێ بێ دڵ بەسوو دیواریەو

سەردەنی هەر پێسە هەڵمەو شیشەکێ یانەوخەما

سەختەنی هەر پێسە تیرەی دڵ مەد٘ۆ پاساریەو

تۆ سەراپا نەی شەکەر ڕێزۆ سەروو سیماتەرە

کەوتەنا پەشتەو قڕۆڵەی پێ نەد٘امەت باریەو

مەڵهەموو ئا ڕۆیە ناری پەی چەمام ئارۆ مروو

کۆر و ناباوڕ مەنیشوو پەو خەما ئی شاریەو

دووکەڵوو سوبەوخیاڵێم بەرمەشۆ پی بانەرە

تا نەیاوو پا گڕێ سووچوو بە بارێ زاریەو

هۆرزه بۆ ،دابۆ ،هەناسەم گم بیەن چی شارەنە

من مەزانوو کێ تەلش بەستەن قژا هاوریەو

تۆ بە شەرتەو زەهرە ماری جامڵێ عەشقم مەد٘ەی

من کەرا شێچت بە دڵما ، هەنگوینت شاریەو

جوولەکێ زوڵفات هەمیروو بێ دڵی منشا متەن

تازە  یاوانا  بە ئاوێ  وشکەساڵی  ناریەو

#فەرید عەباسی 

هۆش و ویرم ئینا لاتەو، عەزیزمەنی، دڵ وگیانم
وەختێ هایما،وەختوو وتەیم،وەختوونمایم،بە ئیمانم!

چێشم واتەن،چی تۆریەێنی،دا بۆرێوە شنەو شێعریم
سەیلوو تاسەی وەختا بەرۆش،بەجارێ یانەوسامانم؟

#سوهراب_مورادنیا(سیاوکام)

قەسەم  بە ئاوەو  هانەی خرۆشان
بە ڕانکەوچۆخە و فەرەنجی پۆشان
بە هۆبە و هەوار هەم شنەوهەردی
ئانەی کە ژیوای  مەردێ  بە مەردی
زوانم نەد٘ۆ  بە دەم  ئاوی لێڵ
نەبوو بە تاپۆ دلێ خاو و خێڵ
وێم نەبوو ئەساس پەرەی نەزانی
ئەرکان حەر  ئینەن ،  ڕۆڵەبزانی!
ڕوو کەرە قیبلەی زەید و ماواوێۆ
وێت کەرە بەخێو ،با نەکەرات خێۆ
بێگانە هارەن ، وەرگەن ، ڕواسەن
ئەغیارەن،نارەن،دووسەرئەڵماسەن
‌#سەباح شیانی سنە
دڵ وڵ وڵ بیەن پێسەو لاشەو نەی
زایێف و زەردەن وێنەی زەردی بەی
دایێم پەی ئامایت ماچۆ داخۆم کەی
کەی بۆ  کام ڕۆ بۆ  قەرار بۆ تۆ بەی؟!
دەردی ئێنتێزار دڵ کەردەنش پەی
هۆردا پێسەو نەی زایڵەو وەی وەی
مەتەرسوو ئازیز  ڕویە  بۆ  تۆ  بەی
پێسەو شەهریار واچوو ئیسە مەی
#سەیوان ئێبراهیمی



ادامه مطلب

طبقه بندی: ادبیات/شعر، زوانی هه‌ورامی، فرهنگی و هنری، فەرید عەباسی، سوهراب مورادنیا(سیاوکام)، سه‌باح حه‌سه‌نی شیانی، سەیوان ئێبراهیمی(گوازی)، بێهرووز موحەممەدپوور(شارۆ)، جەواد حەمزه (فێراق)،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(۹۰)،
نوشته شده در تاریخ شنبه 28 اردیبهشت 1398 توسط همایون محمدنژاد
کەلەبەروو شێعرا(٨۷)

‍ 
تۆ خودٚا مووچیاری ئا زوڵفا کەرە
با وەسم ئەشکنجە  دانێ لا بەرە

با کەلیمێ حەق بێ جارێو دەمتەرە
چی هەق و ناهەق مەیا وەرچەمتەرە؟

گا چنووری نەوڕەس و گا مارەنێ
گا چەنی سروە و شەماڵی یارەنێ

گا پێسەو هەوری وەری پێوار کەرا
گا پێسەو گەوری موسوڵمان هار کەرا

ئیسە ئامان ڕەنگ و مەنگی تازە باو
گا شەرابین گا زەڕین فام گا سیاو

شانە بەعزێ جار وزۆشا قینەرە
ئەفعی ئاسا چززێ ساوا سینەرە

نەسحەتوو هەورێشمی خاویت کەرە
وا دەمێ شانۆش پێگە و گا پۆگەرە

با پێسەو وێشا پەرێشان دڵ نەبوو
پێچ پێچین و سەرکەش و سەرچڵ نەبوو

گێرەشا پەلکە و کەرەش زەنجیروو من
یەکیەتی تەنیا کەرۆ تەگبیروو من

تۆ من و تۆ وەش کەری و تۆ بی جیا
تەفرەقەت نەقشەو دەسوو سەعدی نیا

#سه‌عدی غه‌ریبی

سەعاتە
نە دوانزەو شەوێن و 
نە پەنجوو سۆحی
نە بە وەختوو فەلەستینی 
تەوەنینە و
نە بە وەختوو شاماتی
 بارووتا!

زەمان
بە وەختوو ئێگەی 
چەپڵێ وارانینی و
سەماو شەتاوا و
چووپی قەڵوەزەی

چرکە
بە وەختوو ئێگەی
لەنجەو شەماڵین و 
ڕەشبەڵەکوو
 هەناری و 
         هەواری

ئەرێ باوان
سەعاتە
بە وەختوو ئێگەی
هەورامانا
        هەورامان

# بێهرووز موحەممەدپوور (شارۆ)

***********

دەی بۆ کەسم واچوو پنەت
       باوڕت بۆ درۆ نیەنە!!
بۆنەو تۆوە دڵوەش بیەنا
    گیرەم باوشی،
       هەتا سەوای ،ورکەم نیا
سوورەچنار!،تۆ بی خود٘ا
ڕازەودڵیت ،واچە پنەم!!!
ئەشکووفەکەم 
  خۆ تەنگیاوە دلێ بەرەو 
چەماو  تۆنە
         قەڵەم سوور
 و 
        ڕەنگ تاونۆوە
 نامەکێ تۆ 
                      برقە دۆوە
ساڵەی تازە ، هۆرگیسیۆنە ،
  جلێ سوورێ
کەروونە من 
 گڕی واتش هۆرزە بۆرێ
تێکەڵ کەرمێ 
             گجیێ  سوورێ
هەرچن 
   بیەن فڕەو جارا ،
 هامدەنگ چەنی خۆ هەسارا
         گوزەر کەرمێ ، پێسەو جارا  
ئەفسانەیچ بۆ  
 شاد٘ی وزمێ ئەو هەناری
هەوار بەسمێ کۆ و کۆساری
    واچوو پنەت باوڕت بۆ
       کەوا و پانتوڵ،

سوخەمە و پەسەک
 پەی ورموو شاعێروو پاری
              زاڕۆڵێ، وەش ویارێنێ
بۆرە بلمێ  هانەو لاری 
           هەرچن نەمەن وەشی پاری
     گێرەم باوشی ،هەراڵەڕەنگ
            سوورەساوێ ،مد٘و سەمەر
       باوڕت بۆ هیشتا مەنەن 
                  قەوڵ و قەراروو جارانی
          ئەر باوڕت مەنەن پنەم!!!
                    #هومایون موحەممەدنژاد
                    @paylway




ادامه مطلب

طبقه بندی: فرهنگی و هنری، اجتماعی، ادبیات/شعر، تاریخ، زوانی هه‌ورامی، شهرها و روستاهای هورامان، ده‌گاو زاوه‌ری/روستای دز‌آور، نوشتارهای همایون محمدنژاد، هومایون موحەممەدنژاد، فەرید عەباسی، بێهرووز موحەممەدپوور(شارۆ)، سه‌عدی غەریبی،
برچسب ها:هه‌ورامان‌هانه‌به‌رچه‌م-کتابخانه‌هورامان،یانه‌وکتێبووهه‌ورامانی-هه‌ورامان-هۆرامان-اورامان-اورامانات-دزآور(زاوه‌ر)-لهون-تخت-ژاورود-پاوه-نوسودـ نودشه (نۆتشه)زرده-پریان-رێژاو(ریجاب)-شریف‌آباد-زاغه-کندوله-گەورەجوـ ته‌وێڵێ-بیاره-ساور-نودیجه-هه‌ڵه‌بجه-خۆرماڵ-مریوان-سروآباد-کرمانشاه-کردستان-دالانی زاوەرـ سنندج-چهارقلعه‌عبدالملکی(زاغمرز-زینوند-حسین‌آباد-امیرآباد)هورامی های شمال ایران)عکس-شبک-سنجارـ باجلان-کاکه‌یی-یارسان-ساور-نودیجه-زازا-زازاکی-قلعه قروه-چورژی-هومایون موحه‌ممه‌دنژادـ سه‌فه‌ره‌کێ گالیوێری ـ وه‌سیه‌ت په‌ی مه‌زهه‌ری ـ یانەوخەما،کەلەبەروو شێعرا(٨۷)،
نوشته شده در تاریخ شنبه 7 اردیبهشت 1398 توسط همایون محمدنژاد
.: Weblog Themes By Abdollah Habibi :.

تعداد کل صفحات : 12 :: 1 2 3 4 5 6 7 ...